خبرونه
د دوحې په غونډه کې د فعالانو پر نه ګډون د کاناډا خوابدي
د کاناډا د بهرنیو چارو وزارت د ملګرو ملتونو د تنظیموونکو پر دې پرېکړه مایوسي څرګنده کړې چې غیرطالب ګډونوال، د ښځو مدافعانې، د مذهبي او قومي اقلیتونو غړي او د بشري حقونو د ډلو نور غړي د دوحې درېیمې غونډې له اصلي بحثونو څنډې ته کړای شوي دي.
دغه وزارت پرون په یوه اعلامیه کې وویل، کاناډا له اوونیو راهیسې په ښکاره ویلي، چې د دوحې له درېیمې غونډې د ښځو او د مدني ټولنې پر حذف کولو مایوسه ده.
د دوحې په درېیمه غونډه کې د کاناډا ځانګړی استازي ډېوېډ سپرول (David Sproule) هم برخه لري. د دې دوه ورځنۍ غونډې له اصلي بحثونو د ښځو او مدني ټولنې استازي څنډې ته کړای شوي، خو د سې شنبې په ورځ د ښځو او مدني ټولنې استازو ته په یوه حاشیوي غونډه کې د ګډون بلنه ورکړل شوې ده، ځینو ښځو دا حاشیوي غونډه تحریم کړې ده.
د افغانستان په اړه د دوحې د غونډې ګډونوال به نن د دې غونډې په دوهمه ورځ هم خپلو بحثونو ته دوام ورکړي. تمه ده په نننۍ غونډه کې به د ملګرو ملتونو او د طالبانو د حکومت استازي د افغانستان او نړیوالې ټولنې پر لومړیتوبونو او ننګونو خبرې وکړي.
د ورځې تازه خبرونه دلته ولولئ
د افغانستان د فوټبال د اتلانو لیګ د څلورم فصل په اوومه اوونۍ ۲ مسابقې وشوې
د افغانستان د فوټبال د اتلانو لیګ د څلورم فصل په اوومه اوونۍ کې پرون ماسپښین هم دوې مسابقې وشوې.
په لومړۍ هغه کې د هرات د صرافانو ټیم د سرپل له خدیم اف سي ټیم سره خپله لوبه ۲-۲ مساوي کړه.
په دویمه مسابقه کې د هرات د سرخ پوشان خوافي لوبډلې د کندهار له عینو مېنې صفر د یو په وړاندې لوبه وګټله.
د افغانستان د فوټبال د اتلانو لیګ د څلورم فصل سیالۍ د هرات په کوربه توب د ۱۲ لوبډلو په ګډون سره د لیندۍ/ قوس پر ۱۶مه پیل شوې.
د پاکستان پوځ د ۱۳ وسلوالو د وژل کېدو خبر ورکړ
د پاکستان پوځ، د دغه هېواد په شمال لوېدیځ کې ډیورنډ کرښې ته څېرمه د ۱۳ وسلوالو د وژل کېدو خبر ورکړ.
د اسوشېټېډ پریس خبري اژانس د راپور له مخې، د پاکستان پوځ ویلي، چې امنیتي ځواکونو د پنج شنبې په ورځ په شمالي او جنوبي وزیرستانونو کې د دوو حملو په نتیجه کې ۱۱ افراطي وسلوال ووژل.
د راپور له مخې ۲ نور افراطي وسلوال په بنو سیمه کې وژل شوي دي.
د پاکستان پوځ دغه راز ویلي، چې د پوځ یو جګړن په شمالي وزیرستان کې له افراطي وسلوالو سره د ډزو په تبادله کې وژل شوی دی.
دغه سیمه پخوا د تحریک طالبان پاکستان یا (TTP) د تحرکاتو عمده مرکز و.
ټي، ټي، پي په وروستیو کې د پاکستان پر امنیتي ځواکونو خپلې حملې زیاتې کړې دي.
ناټو د اذربایجان د یوې الوتکې د سقوط د څېړنې غوښتنه وکړه
د شمالي اتلانتیک پوځي تړون یا ناټو پرون د اذربایجان د هوايي شرکت د یوې الوتکې د سقوط په اړه د بشپړو څېړنو غوښتنه وکړړه.
دغه الوتکه چې ۶۷ کسان په کې سپاره وو، د چهارشنبې په ورځ د قزاقستان د اقتاو ښار ته څېرمه نسکوره شوه، چې له امله یې ۳۸ کسان مړه شول.
د ناټو ویاندې فرح دخل اله پرون پر خپله ایکسپاڼه (پخواني ټویټر) لیکلي، چې د الوتکې د سقوط د پېښې قربانیان او کورنۍ یې د دوی په سوچ او دعاګانو کې دي.
هغې ټپیانو ته د عاجلې شفا او د الوتکې د سقوط د پېښې په اړه د بشپړو څېړنو غوښتنه کړې ده.
ځینو سرچینو رویټرز خبري اژانس ته ویلي، چې دغه الوتکه د روسیې د هوايي مدافع د دستګاه له خوا ویشتل شوې ده.
له اردن څخه سوریې ته د کډوالو ستنېدل پیل شوي
د اردن د کورنیو چارو وزیر وايي په سوریه کې د بشارالاسد د حکومت له ړنګېدو وروسته د سوریې شا و خوا ۱۸زره وګړي له اردن څخه، خپل هېواد ته ستانه شوي دي.
مازن الفراية پرون دولتي ټلویزیون المملكة ته وویل، د ډسمبر پر اتمه د اسد د رژیم تر ړنګېدو وروسته تر پرون پنج شنبې د سوریې شا و خوا ۱۸زره وګړي بېرته خپل هېواد ته تللي دي.
د هغه په وینا له کله چې په ۲۰۱۱م کال کې په سوریه کې کورنۍ جګړه پیل شوه، د سوریې یو ملیون او ۳۰۰زره وګړي اردن ته کډوال شول، چې ۶۵۰زره یې له ملګرو ملتونو سره رسماً راجسټر شوي وو.
ههنگاو: ایران کې د اعدام شویو افغانانو شمېر ۷۱ ته ورسېد
د ایران د بشري حقونو یوه اداره وايي، د یوه بل افغان وګړي په اعدام سره، په روان میلادي کال کې په ایران کې د اعدام شویو افغانانو شمېر ۷۱ تنو ته ورسېد.
د ههنگاو په نوم د ایران د بشري حقونو غیردولتي بنسټ، پرون پنج شنبه په یوه راپور کې ویلي، چې د شېراز په عادل اباد مرکزي زندان کې د چهارشنبې په ورځ د یوه افغان په ګډون دوه بندیان اعدام شول.
په راپور کې ویل شوي، د کاتب سیدنیان په نوم افغان وګړی د "عمدي قتل" په تور اعدام شوی دی.
د بشري حقونو سازمانونو او مدافعانو تر دې مخکې ویلي، چې په ایران کې د تورنو کسانو د دوسیو د څېړلو بهیر عادلانه نه دی او اکثره تورن کسان نه شي کولی چې مدافع وکیل ولري.
ملګري ملتونه وايي، په برمل کې ملکي وګړي وژل شوي
په افغانستان کې د ملګرو ملتو مرستندوی پلاوی وایي چې د سې شنبې په شپه د پکتیکا په برمل ولسوالي کې د پاکستاني الوتکو په برید کې په لسګونو ملکیان وژل شوې دي.
یوناما نن په یوه بیان کې وویل چې نړیوال قوانین پوځي ځواکونه اړباسي چې د عملیاتو پرمهال د نظامي او ملکي کسانو توپير وکړي او داسې هڅې وکړي چې ملکیانو ته زیان ونه رسیږي.
د طالبانو مرستیال ویاند حمد اله فطرت د چین سینهوا اژانس ته پرون وویل چې د پکتیکا په برمل ولسوالي کې د پاکستان د جنګي او ډرون الوتکو په بریدونو کې یو پنځوس تنه وژل شوي او شپږ تنه نور ټپيان دي. تر دې مخکې د وژل شویو شمیر شپږ څلویښت تنه یادیده.
یوناما د دې پیښې د څیړنې غوښتنې کړې ده او ویلي یې دي چې د داسې پيښو د مخنیوي او د قربانیانو د حقونو د حفاظت لپاره تحقیقات ضروري دي.
د خوړو او کرنې ادارې په افغانستان کې میلیونونه څاروي واکسین کړي
د ملګروملتونو د خوړو او کرڼې اداره، FAO وایي، روان ۲۰۲۴ م کال یې په افغانستان کې د معیشیت د خوندیتوب لپاره ۶،۸ میلیونه څاروي واکسین کړي دي.
د افغانستان لپاره د دې ادارې څانګې نن پنجشنبې په خپله ایکس پاڼه یا پخواني ټویټرکې لیکلي چې دوه ملیونه غواګانې، درې ملیونه پسونه او وزې، اته لکه شیدې ورکونکې غواګانې او یوملیون څاروي له چینجو څخه د پاکیدو پخاطر واکسین شوي دي.
د ملګروملتونو دې ادارې ویلي چې واکسینونه څاروي خوندي کوي او هم د ملیونونو کسانو لپاره د خوړوخوندیتوب تضمینوي.
په افغانستان کې د معیشیت د خوندیتوب لپاره د ملګروملتونو د مرستندویه ادارو د هڅو سره سره د خوړو نړیوال پروګرام او یوشمیرنورو ادارو خبرداری ورکړی چې په را روان ۲۰۲۵ کال به هم په افغانستان کې نژدې ۲۳ ملیون وګړي بشري مرستو ته اړتیا ولري.
ایراني پولیسو په تهران کې افغاني کافي بنده کړه
د ایران پولیسو په تهران ښار کې د یوه افغان کډوال کافي تړلې ده.
د تسنیم خبري اژانس د راپور له مخې د خانه کابل په نوم دغه کافي پرون چهارشنبه د جواز نه درلودو او د غیر مجوزو کسانو د استخدام له کبله مهرولاک شوه.
ایراني چارواکي هغو افغان کډوالو ته چې اسناد نه لري، د غیر مجوز اتباعو خطاب کوي.
خبر کې راغلي چې دغه کافي د افغان کډوالو د ټولیدو او بنډارونو ځای و.
تر دې وړاندې ایراني چارواکو په یزد ښار کې شاوخوا شل هغه سوداګریز مرکزونه مهرولاک کړي وو چې بې اسناده کډوال یې په کار ګمارلي وو.
ایران په دې وروستیو کې پر افغان کډوالو کړۍ تنګه کړې او ګڼ شمېر دغه کډوال یې نیولي او اخراج کړي یې دي.
په غزې کې د پنځو خبریالانو په ګډون لس تنه وژل شوي
د غزې روغتیایي چارواکي وایي، د اسراییل د بریدونو له کبله چې نن پنجشنبه (د مرغومي شپږمه) سهار وختي شوي، د پنځو خبریالانو په ګډون لس تنه وژل شوي دي.
دغو چارواکو ویلي چې اسراییلي الوتکو د غزې ښار په زیتون سیمه کې یو کور په نښه کړی چې په کې ۵ تنه وژلي او ۲۰ نور یې ټپیان کړي دي.
ویل شوي چې دغلته د مرګ ژوبلې د زیاتېدو احتمال ځکه شته چې یوشمېر کسان ممکن تر خاورو لاندې وي.
د چارواکو په خبره په یوه جلا پیښه کې پنځه خبریالان هغه مهال ووژل شول چې د هغوی موټر تر برید لاندې راغی.
دغو خبریالانو القدس الیوم تلویزیوني شبکې ته کار کاوه او پر موټر یې د غزې العوده روغتون ته نژدې نن سهار برید وشو.
اسراییل تراوسه په دې اړه څه نه دي ویلي.
د افغانستان ۷۲ سلنه کلیوالي سیمې له لومړنیو روغتیايي خدماتو بې برخې دي
د طالبانو د حکومت د عامې روغتیا وزارت وايي چې د افغانستان د کلیوالي سیمو ۷۲ سلنه نفوس لومړنیو او ثانوي روغتیايي خدمتونو ته لاسرسی نه لري.
دې وزارت په یوه راپورکې چې پرون چهارشنبې یې خپورکړی ویلي چې د هیواد له ۴۰۰ ولسوالیو څخه، یوازې ۹۳ یې روغتونونه لري.
د دې وزارت په خبره په کلیوالي سیمو کې د روغتونونو د نشتوالي له امله، ناروغان ډیری وختونه ان د کوچنیو روغتیايي ستونزو د درملنې لپاره ولایتي مرکزونو ته سفر کوي.
دې وزارت په لرې پرتو سیمو کې د روغتیایي خدماتو د پراخولو پراړتیا په ټینګار سره، ویلي چې د طالبانو د مشر هبت الله اخندزاده لخوا په ولسوالیو کې د ۳۱۸ روغتونونو د جوړولو لپاره بودیجه ځانګړې شوې او د قانوني او اداري پروسو له بشپړیدو وروسته به د دغو روغتونونو د جوړولو چارې پیل شي.
د عامې روغتیا وزارت په وینا، اوس مهال په هیواد کې د ټولو روغتونونو د بسترونو ظرفیت ۱۳۰۰۰ ته رسیږي چې تمه ده د نویو روغتونونو په جوړولو سره به پرې ۱۰۰۰۰ نوربسترونه اضافه شي.
د عامې روغتیا وزارت د افغانستان په لیرې پرتو سیمو کې خلکو ته د روغتیایي خدمتونو د کموالي خبره داسې مهال کوي چې په دې وروستیو کې یې ښځې د طبي زده کړو په مرکزونو کې هم له زده کړو منع کړي دي.
د ملګرو ملتونو امنیت شورا څه کم دوه اونۍ مخکې د طالبانو له خوا له طبي زده کړو څخه د ښځو د منع کولو پر وروستۍ پریکړې ژوره اندیښنه ښودلې او ویلي و چې په نتیجه کې به یې په دې هیواد کې په ملیونونو ښځې او نجونې له روغتیایی خدمتونو څخه بې برخې شي.