یو افغان وګړی وروسته له هغه د جرمني په ختیځ کې د پولیسو په ډزو ووژل شو چې پر خپل یوه هېوادوال او درېیو نورو کسانو یې مرګونی برید وکړ.
د جرمني پولیسو وايي، د دې هېواد په ختیځ کې یوه افغان وګړي، د یورو ۲۰۲۴ د فوټبال د ټورنمنټ د پیل لوبې د نندارې پر مهال لومړی پر خپل یوه هېوادوال مرګونی برید کړی او وروسته یې څو نور کسان ټپیان کړي دي.
د جرمني پولیسو پرون شنبې وویل، دې ۲۷ کلن افغان د جمعې د ورځې په مازیګر د برلین په ۱۳۰ کیلومترۍ کې په وولمیر شتاد کوچني ښار کې لومړی چاقو ته د یوې ورته وسیلې په ذریعه پر یوه بل افغان چې ۲۳ کلن دی، برید وکر او سخت یې ټپی کړ.
دې ځوان د همدې ټپونو له کبله وروسته ساه ورکړه.
اسوشېټېډپرېس خبري آژانس د جرمني پولیسو له قوله خبر ورکوی چې بریدګر وروسته پر یوې ډلې چې د خپل شخصي کور په انګړ کې یې د جرمني او سکاټلنډ ترمنځ د فوټبال لوبې ننداره کوله برید وکړ، درې جرمنان یې ټپیان کړل چې د چارواکو په وینا، د دوو تنو وضعیت نازک دی.
د جرمني پولیسو پرون دا هم وویل چې بریدګر د همدې وسیلې په ذریعه پر هغو پولیسو هم برید وکړ چې د امنیت لپاره سیمې ته استول شوي وو.
خو دوو تنو پولیس افسرانو پر هغه ډزې وکړې او ټپي یې کړ چې وروسته یې په روغتون سا ورکړه.
پولیسو ویلي چې د دې برید علت تراوسه نه دی مالوم.
د اسوشېټېډپرېس د راپور له مخې د جرمني د کورنیو چارو وزارت ویلي چې د امنیت د ټینګښت لپاره یې د وولمیرشتاد په ګډون د زاکسني انهالت ایالت ټولو سیمو ته اضافي پولیس استولي دي.
د اروپايي ملتونو د فوټبال جام چې پرون د جرمني په بېلابېلو ایالتونو کې پیل شو، د جولای تر ۱۴مې پورې دوام کوي.
