د لاسرسۍ وړ لېنکونه

تازه خبر
پنجشنبه ۱۰ غبرګولی ۱۴۰۳ کابل ۰۷:۵۲

نړۍ

د اوکراین ولسمشر د امریکا د نوې مرستې د اعلان هرکلی وکړ

د اوکراین ولسمشر ولادمیر زیلینسکي
د اوکراین ولسمشر ولادمیر زیلینسکي

د اوکراین ولسمشر ولادمیر زیلینسکي له اوکراین سره د امریکا د استازیو جرګې له خوا د ۶۰ ملیارډ ډالرو نوې مرستې هرکلی کړی، خو له واشنګټن یې غوښتي چې هرڅومره ژر چې کېدای شي دغه لایحه پر قانون بدله کړي ترڅو دې هېواد ته د وسلو د لېږد پروسه پیل شي.

ښاغلي زیلینسکي له امریکایي ان بي سي شبکې سره په مرکه چې نن یکشنبې خپره شوې، دغه راز ویلي چې د امریکا د استازیو جرګې دغه اقدام روسیې ته یوقوي پیغام ورکوي او هغه دا چې واشنګټن له کییف سره ولاړ دی او اوکراین به دوهم افغانستان نه شي.

د نوموړي په باور، دغه ملاتړ به د اوکراین ځواکونو لا پیاوړي او د روسیې په وړاندې جګړه کې به د دوی د بري چانس زیات کړي.

هغه له اوکراین سره د امریکا د مرستو په تړاو د افغانستان د پرتله کولو په باب نورڅه نه دي ویلي، خو د امریکا متحدو ایالتونو په افغانستان کې له شاوخوا شل کلن پراخ حضور وروسته د ۲۰۲۱ م کال د اګسټ میاشتې په پای کې خپل ټول ځواکونه له دې هېواده داسې مهال وایستل چې د همدې میاشتې په پنځلسمه نېټه یې طالبانو بیا افغانستان لاندې کړ.

د ورځې تازه خبرونه دلته ولولئ

د اسراییل پوځ له مصر سره پر پوله د غزې د یوه ستراتیژیک کوریډور کنټرول ترلاسه کړی

له مصر سره پر پوله د غزې یو کوریډرو
له مصر سره پر پوله د غزې یو کوریډرو

د اسراییل پوځ وایي، له مصر سره پر پوله یې د غزې د یوه ستراتیژیک کوریډور کنټرول ترلاسه کړی دی.
اسوشیتید پریس خبري اژانس ویلي، اسراییل غواړي په دې کار سره حماس سخت دریځې ډلې ته چې امریکا او اروپایي ټولنه یې ترهګر بولي، قاچاقي تونلونه له منځه یوسي.

خبر کې راغلي چې د فیلادیلفي په نوم د دغه کوریډور نیول به ممکن د اسراییل او مصر اړیکې هم پیچلې کړي، ځکه مصر له پخوا شکایت کړی چې اسراییل یې د پولې خو اته پرمختګ کړی دی.

د اسراییلو یوه پوځي چارواکي د نوم نه ښودو په شرط ویلي، دوی مصر ته د دغه کوریډور د نیول خبر ورکړی.

دغه چارواکي زیاته کړې، د عملیاتو په ترڅ کې یې شاوخوا شل تونلونه چې یو شمېر یې دوی ته معلوم نه و، موندلي او دغو تونلونو ته د لاسرسي ۸۲ لارې یې هم پیدا کړي دي.

فرانس پرېس خبري اژانس د مصر د دولتي خبري اژانس القاهره په حواله ویلي، اسراییل د تونلونو ادعا د دې لپاره کوي چې د رفح عملیات توجیه کړي.

امریکا د ډیموکراسۍ پر لوري د مولداویا پرمختګونه وستایل

د عکس ښي لور ته د مولداویا ولسمشره مایا ساندو او چپ لور ته د امریکا د بهرنیو چارو وزیر انټوني بلېنکن د روغبړ پر مهال
د عکس ښي لور ته د مولداویا ولسمشره مایا ساندو او چپ لور ته د امریکا د بهرنیو چارو وزیر انټوني بلېنکن د روغبړ پر مهال

د امریکا د بهرنیو چارو وزیر د مولداویا له پلازمینې کیشینوف څخه د کتنې په ترڅ کې د ډیموکراسۍ پر لوري د دې هېواد د پرمختګونو ستاینه وکړه.

انټوني بلېنکن د مولداویا له ولسمشرې مایا ساندو سره له خبرو وروسته په یوه ګډ خبري کنفرانس کې له دې هېواد سره د انرژۍ د تامین او د روسیې له غلطو تبلیغاتو سره د مقابلې په برخو کې د ۱۳۵ میلیون ډالرو مرستې اعلان وکړ.

د ازادي راډیو د خبرد مرکزي څانګې د راپور له مخې نوموړي همدارنګه په اروپایي ټولنه کې د مولداویا د شاملېدو او د هغو ګواښونو پر وړاندې له دې هېواد څخه د واشنګټن په ملاتړ ټینګار وکړ چې د روسیې له‌خوا په اوکراین کې له جګړې وروسته دا هېواد ورسره مخامخ دی.

د امریکا د بهرنیو چارو وزیر هغه وروستي پرمختګونه وستایل چې کیشینوف د فساد پر وړاندې د مبارزې او له اروپایي ټولنې سره د یوځای کېدو په ګډون په ځینو برخو کې کړي دي.

بلېنکن له مولداویا څخه داسې مهال کتنه ترسره کوي چې د روسیې له‌خوا دې هېواد او ګرجستان ته ګواښونو یوځل بیا اندېښنې زیاتې کړي دي.

جرمني کې د ناقانونه نشه یي توکو د کارونې تلفات په بېساري ډول زیات شوي

د جرمني بیرغ
د جرمني بیرغ

په جرمني کې د ناقانونه نشه یي توکو د کارونې له کبله د مړینې شمېر په تېر ۲۰۲۳ کال کې بې سارې کچې ته لوړ شوی دی.

د جرمني خبري اژانس ویلي، تېر کال ۲ زره او ۲۲۷ کسان د دغو توکو له کبله مړه شوي چې دغه شمېر د وړم کال پرتله ۲۳۷ زیاتوالی ښيي.

دغه ناقانونه نشه یي توکي چې جرمني کې د خلکو د مړینې لامل شوي کوکاین، کریک کوکاین، هیروین او مخلوط نشه یي توکي بلل شوي دي.

د اعتیاد او نشه یي توکو په برخه کې د جرمني کمشنر بورخارد بلېنرت دغه شمېرې خطرناکې بللي او ویلې یې دي، تېرو لسو کلونو ته په کتو دوه برابره زیاتې شوې دي.

د امریکا او چین دفاع وزیران روانه اونۍ سنګاپور کې سره ویني

د امریکا او چین بیرغونه
د امریکا او چین بیرغونه

ټاکل شوې د امریکا او چین د دفاع وزیران د همدې اونۍ په پای کې په سنګاپور کې کم ساري لیده کاته وکړي.

د فرانس پریس خبري اژانس د راپور له مخې لویډ اسټن او ډونګ جون به د شانګري-لا ډیالوګ د غونډې په څنډه کې سره وګوري.

د دغې امنیتي غونډې بحثونو کې د پام وړ مسلې د تایوان پر سر د چین او امریکا پر ناندریو ورټولې وي.

دا لیده کاته یوه اونۍ وروسته تر هغه کیږي چې چین د تایوان ټاپو شاوخوا پوځي مانورې وکړې.

متحده ایالتونه د یوه ډیموکرات او خپلواک تایون ملاتړ کوي، خو چین بیا غواړي چې د دغه ټاپو واک په خپل لاس کې ولري.

له تېرو اتلسو میاشتو راهیسې لومړی ځل دی چې د متحده ایالتونو او چین لوړپوړي پوځي مشران مخامخ سره کیني.

اسراییل د نړیوالو له نیوکو وروسته هم پر رفح بریدونو ته دوام ورکړ

د رفح ښار یوه څنډه
د رفح ښار یوه څنډه

وروسته له دې چې د ملګرو ملتونو امنیت شورا بېګا په رفح کې د هغه برید په اړه چې د نړیوالو سخت غبرګونونه یې وپارول بحث وکړ، اسراییلو نن د غزې په دې جنوبي ښار کې نورې حملې وکړې.

د حماس ډلې پرضد په عملیاتو کې د ملکي وګړو د تلفاتو په اړه د نړیوالو له اندېښنو سره سره د اسراییلو د پوځي عملیاتو د بدلون هېڅ نښې نښانې نه ښکاري او په غزه کې د اوربند لپاره د نړیوالو هڅې بې نتیجې پاتې دي.

امریکا او اروپايي ټولنه حماس د یوې تروریستي ډلې په توګه پېژني.

د امریکا ولسمشر جوبایډن په رفح کې د پراخو عملیاتو په اړه اسراییلو ته خبرداری ورکړی، خو د بایډن ادارې پرون ټینګار وکړ چې اسراییلو تراوسه له خپلو حدودو څخه پښه نه ده غځولې.

د اروپا د ۵ متحدو هېوادونو مشرانو د اوکراین په ملاتړ ټینګار وکړ

د اوکراین ولسمشر زیلنسکي - ارشیف
د اوکراین ولسمشر زیلنسکي - ارشیف

د اروپا د پنځو متحدو هېوادونو مشرانو پرون (د مې ۲۸مه) د چک جمهوریت په پلازمېنه پراګ کې په خپله غونډه کې له اوکراین څخه پر خپل ملاتړ ټینګار وکړ.

د دې غونډې د بحثونو تمرکز د چک جمهوریت پر هغه پلان و چې هدف یې له اروپايي ټولنې بهر له ځینو هېوادونو څخه اوکراین ته د توپونو د اته لکه مرمیو برابرول دي.

د دې پلان له مخې د چک د چارواکو او خصوصي کمپنیو د هڅو په نتیجه کې د نړۍ له بېلابېلو هېوادونو څخه د اوکراین لپاره مهمات راټولېږي.

د اروپايي ټولنې او ناټو ۱۵ غړو هېوادونو ژمنه کړې چې د ۱،۶ میلیارد ډالر په لګښت دا پروژه تمویل کړي.

د چک جمهوریت صدراعظم پیتر فیالا چې د پولنډ د ولسمشر اندرې دودا، د هالنډ د صدراعظم مارک روټ، د ډنمارک د صدراعظمې میټي فریدریکسن او د لاتویا د صداعظمې ایويکا سیلینا کوربه و، وویل، تمه ده چې اوکراین به په راتلونکو څو ورځو کې د لسګونه زره ۱۵۵ میلي متري توپونو د مهماتو لومړۍ جوپه ترلاسه کړي.

د غزې رفح ښار کې د اسراییلي ځواکونو له عملیاتو سره جګړې زور اخیستی

د رفح یوه څنډه
د رفح یوه څنډه

د غزې د تړانګې د رفح ښار اوسېدونکي خبر ورکوي چې په سیمه کې د اسراییلي ځواکونو د عملیاتو له پراخېدو سره هلته جګړو زور اخیستی دی.

اسراییل وايي د رفح په ختیځ کې د مصر سرحد ته نژدې محدود پوځي عملیات کوي.

امریکا او د اسراییل نورو متحدانو په رفح کې د لویې کچې پوځي عملیاتو په اړه خبرداری ورکړی.

د عیني شاهدانو، د بېړنیو خدماتو د کارکوونکو او روغتيايي چارواکو په وینا د رفح په لویدیځ کې د اسراییلو د تېرې شپې په توغندويي او هوايي حملو کې لږترلږه ۳۷ کسان وژل شوي دي.

دا حملې په هغو سیمو کې شوي چې د تېرې یکشنبې په ورځ د بېځایه شويو فلسطیني کډوالو پر یوه کمپ له برید وروسته د اور لګېدو په پېښه کې ۴۵ کسان ووژل شول.

د ازادي راډیو ګرجستاني برخه به خپل فعالیت ته دوام ورکړي

د ازادي راډیو د ګرجستاني برخې لوګو
د ازادي راډیو د ګرجستاني برخې لوګو

د ازادې اروپا/ازادي راډیو مشر، وايي چې د دې راډیو د ګرجستان سرویس به د ګرجستان لپاره د خپلواکو خبرونو له رسولو شاته نه شي.

کاپس دغه څرګندونې د سه شنبې په ورځ (می ۲۸) وروسته له هغه کړي چې د ګرجستان پارلمان د دغه هېواد د ولسمشر د ویټو په لغوه کولو سره د «بهرنیو اجنټانو» قانون تصویب کړ.

سټیفن کاپس پرون په یوه بیان کې وویل چې همدا لامل دی چې په لسګونو زره ګرجستانیان د دغه قانون پر ضد د مظاهرو لپاره سړکونو ته راوتلي دي. هغه ویلي دغه خطرناک نوی قانون «د روسیې قانون» دی.

د کاپس په وینا، د ګرجستان د "بهرنيو استازیو/اجنټانو" قانون، لکه د روسیې په څېر، د بیان د آزادۍ غلي کولو، دیموکراتیکو ارزښتونو ته زیان رسولو او د استبدادي رژیم په لور د شاتګ په خاطر جوړ شوی.

سټیفن کاپس دا هم وویل چې د آزادې اروپا/ازادي راډیو به د پخوا په پرتله اوس زیات د خبرونو رسولو ته دوام ورکړي ځکه د هغه په وینا ژورنالېزم جرم نه دی.

یوټیوب شبکې د ایران د بهرنیو چارو وزارت چینل وتړه

د ایران د بهرنیو چارو وزارت دروازه
د ایران د بهرنیو چارو وزارت دروازه

یوټیوب د دې ټولنیزې شبکې له مقرراتو څخه د سرغړونې له امله د ایران د اسلامي جمهوریت د بهرنیو چارو وزارت رسمي چینل بند کړی دی.

د ایرنا دولتي اژانس ایرنا خبر سه شنبې په ورځ اعلان وکړ چې یوټیوب دغه اقدام څه موده وروسته له هغه وکړ چې د بهرنیو چارو وزارت په یوټیوب په انګلیسي ژبه د «مقاومت، د فلسطین لپاره یوازینی انتخاب» تر سرلیک لاندې یوه ویډیو خپره شوه.

ایران د خپلو اعلاناتو او خبرونو لپاره د یوټیوب ټولنیزه شبکه داسې وخن کاروي، چې دا پلیټ فارم په ایران کې فلټر شوی او خلک یې د کارولو حق نه لري.

تر دې مخکې د «میټا» شرکت چې د انسټاګرام او فیسبوک خاوند دی، په دغو ټولنیزو شبکو کې د ایران د اسلامي جمهوریت د رهبر علي خامنه اي رسمي اکاونټونه بلاک کړل.

هسپانیا او ناروې فلسطین په رسمیت وپېژنده، ایرلنډ به هم نن دا کار وکړي

هسپانیا تېره اوونۍ د فلسطین د په رسمیت پېژندلو اعلان کړی و
هسپانیا تېره اوونۍ د فلسطین د په رسمیت پېژندلو اعلان کړی و

هسپانیا او ناروې نن فلسطیني دولت په رسمیت وپېژنده او تمه ده چې ایرلنډ به هم ورته اقدام وکړي.

د اروپا دا درې هېوادونه باور لري چې د دوی نوښت به یو لوی سیمبولیک اثر ولري او ښايي نور هېوادونه وهڅوي چې فلسطیني دولت په رسمیت وپېژني.

په دې ترڅ کې دوی د اسراییلو او فلسطینیانو ترمنځ د سولې په خبرو کې د ناروې او هسپانیا د تاریخي ونډې یادونه کوي.

دا پرېکړه ښايي په غزه کې پر روانه جګړه اغېز ونه کړي خو تمه ده چې پر تل ابیب به نړیوال فشار زیات کړي څو په غزه کې د حماس ډلې پرضد په ځوابي عملیاتو کې نرموالی راولي.

امریکا او اروپايي ټولنه حماس د یوې تروریستي ډلې په توګه پېژني.

نور راوښيه

XS
SM
MD
LG