د لاسرسۍ وړ لېنکونه

تازه خبر
جمعه ۴ غبرګولی ۱۴۰۳ کابل ۰۰:۰۳

افغانستان کې بارانونه او سېلابونه؛ د مړو شمېر ۶۶ کسانو ته رسېدلی


وروستیو بارانونو او سېلابونو له کبله په ننګرهار کې د اوښتو زیانونو یو انځور
وروستیو بارانونو او سېلابونو له کبله په ننګرهار کې د اوښتو زیانونو یو انځور

د افغانستان په بېلابېلو ولایتونو کې له کوچني اختر راهیسې د درنو اورښتونو او سېلابونو د دوام له امله د مړو شمېر ۶۶ او د ټپیانو ۳۶ کسانو ته رسېدلی دی.

پېښو ته د رسېدنې په چارو کې د طالبانو حکومت د دولت وزارت ویاند جانان سایق د وري په ۲۸مه د سېلابونو له امله د زیانمنو شویو سره د مرستې په موخه په بېړنۍ غونډه کې ویلي چې په دې طبیعي پېښو کې شاوخوا ۱۲۳۵ کورونه په بشپړ او قسمي ډول ویجاړ شوي او نږدې ۶ سوه څاروي هم تلف شوي دي.

یاد وزارت د خپل وټس‌اپ په یوه ګروپ کې د یوې خبري اعلامیې په خپرولو سره لیکلي چې په دې بېړنۍ ناسته کې، پېښو ته د رسېدنې په چارو کې د طالبانو حکومت د دولت وزارت سرپرست عبدالرحمن زاهد ویلي: "وروستیو سېلابونو په څه باندې ۲۳ ولایتونو کې پراخ مالي او ځاني زیانونه اړولي دي، له همدې امله د لا زیاتو انساني تلفاتو د مخنیوي لپاره بشري مرستو ته اړتیا ده."

په دې ناسته کې، د ملګرو ملتونو اړوند مرستندویه سازمانونو په ګډون یو شمېر نړیوالو مرستندویه بنسټونو سېلاب ځپلو ته د روغتیايي، نغدي، خوراکي، د څښلو اوبو د برابرولو او موقتي سرپناه د جوړولو په ګډون د بېړنیو مرستو رسولو ډاډ ورکړ.

په همدې حال کې د افغانستان د بېلابېلو ولایتونو اوسېدونکي ازادي راډيو سره په خبرو کې وویل چې د وروستیو اورښتونو او سېلابونو له امله ډېر زیان ورته اوښتی دی.

د کونړ ولایت د شیګل ولسوالۍ اوسېدونکي حزب الله ازادي راډيو ته وویل: "پرون دې بارانه سره زموږ دروازه او دېوالونه رالوېدلي او اوس مو د پناه لپاره پرده ځړولې. زما دوه بچیان دي، نور مې واړه ورونه او خویندې دي. غواړم موږ سره مرسته وشي."

ارشیف: په بغلان کې د سېلابونو له کبله د اوښتو زیانونو یو انځور
ارشیف: په بغلان کې د سېلابونو له کبله د اوښتو زیانونو یو انځور

د بغلان ولایت د دهنه غوري ولسوالۍ د خلکو شورا مشر محمد حسین په یادې ولسوالۍ کې د ورپېښو زیانونو په اړه ازادي راډيو ته وویل: "په چرم آب کلي کې یې ډېر زیات زیانونه اړولي، د څښلو اوبو نلونه یې خراب کړي دي، یو جومات یې نړولی دی. د خلکو رومي، پیاز، غنم او نور کښت یې خراب کړی. د چشمه یې جینګان خوا ته یې هم کورونه خراب کړي دي. "

نوموړی د بېړنیو مرستو غوښتنوکی دی.

د هلمند ولایت د کلا بست سیمې اوسېدونکي نور الله ازادي راډيو ته د سېلابونو له امله د ورپېښو زیانونو په اړه یوه ویډيو لېږلې چې په‌کې وايي: "دې سیمې، کورونو، دوکانونو او ۳۰۰ ۴۰۰ جریبې ځمکې ته اوبو تاوان رسولی. خلک ټول اندېښمن دي چې څه به وخوري. غنمو او کښتونو ته ناست و ټول اوبو راواخیسته. "

د فاریاب ولایت د پښتون کوټ ولسوالۍ اوسېدونکی سید عبدالله ازادي راډيو ته وویل: "پشتون کوټ، المار، بادغیس او بل چراغ سیمې ته ډېر زیات زیانونه اوښتي ځمکې، کښتونه ویجاړ شوي. مالونه اوبو وړي، سېلابونه ډېر زیات شوي. "

د وروستیو بارانونو او سېلابونو څخه زیانمن شوي کسان د طالبانو له حکومت څخه د مرستو غوښتونکي دي.

د زیانمن شویو کسانو د غوښتنو په اړه مو پېښو ته د رسېدنې په چارو کې د طالبانو حکومت د دولت وزارت ویاند جانان سایق وپوښت، خو د راپور تر خپرېدو یې د ازادي راډیو پوښتنې ځواب نه‌کړې، خو نوموړي دوه ورځې وړاندې په یو خبري کنفرانس کې ویلي وو چې د روانې میلادي میاشتې له پیل راهیسې په بېلابېلو ولایتونو کې له شلو زرو ډېرو زیانمنو او بې وزله کورنیو سره بېړنې مرستې شوي او دا لړۍ لا روانه ده.

د دې ترڅنګ تېره ورځ د طالبانو د حکومت د ریاست الوزرا اقتصادي مرستیال ملا عبدالغني برادر ارزګان ته د سفر پر مهال سېلاب ځپلو سره د لازمې همکارۍ ډاډ ورکړی دی.

خو یو شمېر زیانمن شویو کسانو ازادي راډيو ته ویلي چې تر دې دمه ورسره هیڅ ډول مرستې نه دي شوي.

اړوند مطالب

XS
SM
MD
LG