د لاسرسۍ وړ لېنکونه

تازه خبر
سه شنبه ۲۸ وری ۱۴۰۳ کابل ۰۹:۱۹

افغانستان

طالبانو فراه کې یو کس د لواطت په تور په درو وهلی

د فراه ولایت نقشه
د فراه ولایت نقشه

د طالبانو د حکومت سترې محکمې نن اعلان وکړ چې د فراه ولایتي محکمې، د لواطت په قضیه کې یو تن په درو وهلی دی.

سترې محکمې په یوه بیان کې ویلي دي چې دې کس ته د ۳۰ درو او ۶ میاشتې حبس سزا ورکړل شوه، خو دا یې نه دي ویلي چې آیا دا کس په عام محضر کې په درو وهل شوی که نه؟

د طالبانو لوی مشر ملاهبت الله آخوندزاده په یوه وینا کې چې په روانه اوونۍ کې خپره شوه ژمنه وکړه چې په افغانستان کې به شرعي حدود عملي کړي.

هغه په خاص ډول د اخلاقي سرغړونو لپاره د سنګسار او په عام محضر کې د درو په وسیله د وهلو د حکم پر تطبیق ټینګار وکړ.

د ملګرو ملتونو ویاند فرحان حق پرون د طالبانو د لوی مشر د څرګندونو له کبله اندېښنه څرګنده کړه او ویې ویل چې ملګري ملتونه د طالبانو له خوا له ښځو سره د فرمانونو په اساس د ناوړه چلند له کبله سخته اندېښنه لري.

په هېواد کې دننه او بهر د بشري حقونو مدافع فعالانو هم د طالبانو د لوی مشر وینا ته تند غبرګون ښودلی دی.

د ورځې تازه خبرونه دلته ولولئ

پکتیا: د غره ښوېیدو له امله د یوې کورنۍ ۵ غړي وژل شوي

د افغانستان په نقشه کې پکتیا ولایت
د افغانستان په نقشه کې پکتیا ولایت

په پکتیا ولایت کې د یوه غره د ښویېدو په پېښه کې د یوې کورنۍ ۵ غړي مړه شوي دي.

باختر خبري آژانس چې طالبان یې اداره کوي، د سیمه ییزو چارواکو له قوله خبر ورکوي چې پېښه د دې ولایت په وزې ځدراڼ ولسوالۍ کې شوې ده.

د خبر له مخې، چارواکو ویلي دي چې د پېښې په قربانیانو کې د دې کورنۍ ماشومان هم شامل دي.

په خبر کې د پېښې وخت نه دی ښودل شوی.

افغانستان کې بارانونه او سېلابونه؛ د مړو شمېر پنځوس او د ټپیانو ۳۶ ته رسېدلی

ارشیف
ارشیف

د طالبانو حکومت په افغانستان کې د وروستیو بارانونو او سېلابونو له کبله د زیانونو تازه شمېرې اعلان کړې دي.

د طبیعي پېښو پرضد د مبارزې په چارو کې د دولت وزارت وايي، دې بارانونو او سېلابونو ۵۰ کسان وژلي، ۳۶ نور یې ټپیان کړي او ۷۰۶ کورونه یې ویجاړ کړي.

مخکې له دې چارواکو د مړو شمېر ۳۳ او د ټپیانو شمېر ۲۷ تنه یاد کړی و.

د دې وزارت ویاند ملا جانان سایق کورنیو رسنیو ته ویلي دي چې ۷۰۰ ایکره کرنیزه ځمکه هم ویجاړه شوې او همداراز ۴۰۰ څاروي له منځه تللي دي.

ویاند زیاته کړه چې په دې پېښو کې په ټوله کې له ۱۶۰۰ زیات کورونه زیانمن شوي دي.

وروستیو سېلابونو د فراه، بادغیس، ارزګان، پکتیا، زابل، هلمند، کونړ، بدخشان، غور، کندهار، تخار، پروان او پلازمېنې کابل سیمې وځپلې.

پاکستان بیا د بې ویزې افغان ناروغانو پر مخ تورخم دروازه وتړله

تورخم
تورخم

په ننګرهار کې د طالبانو سیمه ییز چارواکي وايي، پاکستان د تورخم دروازه بیا د هغو ناروغانو پر مخ بنده کړې ده چې د دې هېواد ویزې نه لري.

د ننګرهار د اطلاعاتو او کلتور ریاست د اطلاعاتو آمر صدیق الله قریشي نن رسنیو ته وویل چې د پاکستان لوری هغو افغانانو ته چې ویزې او پاسپورت نه لري، له تورخم څخه د اوښتو اجازه نه ورکوي.

له بلې خوا په تورخم کې د ناروغانو د تنظیم د چارو یوه مسوول له خلکو غوښتي دي چې تر بلې خبرتیا پورې دې له دې دروازې د اوښتو لپاره مراجعه نه کوي.

د روانې وري میاشتې په پنځمه هم د تورخم لاره د پاکستاني پوځیانو ترمنځ له خپلمنځي شخړې وروسته وتړل شوه، خو له درې ساعته ځنډ وروسته بېرته پرانیستل شوه.

وروستیو ورښتونو د نغلو او سروبي د برېښنا تولید زیات کړی

ارشیف
ارشیف

برشنا شرکت وايي د وروستیو اورښتونو له امله د سروبي، نغلو او ماهیپر په بندونو کې اوبه او د برېښنا تولید زیات شوی دی.

د دغه شرکت تازه خبرپاڼې د نورو جزئياتو له ورکولو پرته ويلي چې په يادو سټېشنونو کې د برېښنا توليد زيات شوى او ټولو عامه شبکو ته وېشل شوى دى.

د نغلو، سروبي او ماهیپر بندونه چې د تولید ظرفیت یې ۱۸۸ میګاواټه ته رسېږي، پلازمېنې کابل او د ننګرهار او لغمان ولایتونو ته برېښنا ورکوي.

د برشنا شرکت د معلوماتو له مخې، افغانستان د خپلو اړتیاوو د پوره کولو لپاره ۱۴۰۰ میګاواټه برېښنا ته اړتیا لري، خو اوس یوازې ۷۵۰ میګاواټه برېښنا تولیدوي.

افغان کرکټ لوبغاړي محمد نبي د کابل په لویدیځ کې د یوه روغتون څانګه پرانیسته

د افغانستان د کرکټ ملي لوبغاړی محمد نبي
د افغانستان د کرکټ ملي لوبغاړی محمد نبي

د افغانستان د کرکټ ملي لوبغاړي محمد نبي د کابل په لویدیځ کې د ادې روغتون د یوې څانګې د پرانیستلو خبر ورکړی دی.

ادې روغتون او ګروپ چې د یوې نړیوالې کمپنۍ برخه ده تېر کال یې د محمدنبي په نوښت په افغانستان کې خپل فعالیتونه پيل کړي.

محمد نبي په خپله فیسبوک پاڼه لیکلي چې د کابل د لویدیځې برخې د خلکو د غوښتنو په اساس یې دا روغتون چې د ده په خبره، په نړیوالو معیارونو برابر دی پرانیست.

ادې روغتون کې زېږنتون، د مور او ماشوم د روغتیا خدمات او د نسايي ولادې څانګې شاملې دي چې اکثر خدمات یې د ښځینه روغتیاپالانو له خوا مخته وړل کېږي.

محمد نبي په کرکټ سربېره په افغانستان کې خیریه کارونه هم مخته وړي او تېر کال یې ژمنه کړې وه چې د امکاناتو په برابرېدو به د زړه د ناروغیو د درملنې لپاره یو روغتیايي مرکز پرانیزي.

څېړونکی ټیم: په ۲۰۲۱ کې پر کابل هوایي ډګر د ځانمرګي برید مخنیوی نا ممکن و

د پېښې یوه څنډه - ارشیف
د پېښې یوه څنډه - ارشیف

د کابل په هوايي ډګر کې د ۲۰۲۱ کال د ځانوژونکي برید په اړه د بیا کتنې د ټیم موندنې ښيي چې له تکتیکي پلوه د دغه برید مخنیوی ممکن نه و.

د فرانسپرس خبري آژانس د راپور له مخې، په دغه برید کې چې له افغانستانه د امریکایي ځواکونو د وتلو په وروستیو ورځو یعنې د ۲۰۲۱ کال د اګسټ په ۲۶ وشو، دیارلس امریکایي سرتېري او شاوخوا ۱۷۰ تنه افغانان ووژل شول.

د دغې پېښې په اړه د بیا کتنې د ټیم موندنې هغه پخوانۍ نتیجه تاییدوي چې امریکا یې مخکې په اړه کړې وه.

د فرانسپرس په وینا، د بیا کتنې د ټیم یوه غړي د نوم نه ښودلو په شرط خبریالانو ته وویل چې له برید مخکې د حمله کوونکي په وړاندې د اقداماتو لپاره فرصت نه و او هغه په تکتیکي کچه د مخنیوي وړ نه و.

د دغې څېړنې د ټیم یوه بل غړي هم د خپل نوم نه ښودلو په شرط ویلي چې په تېرو دوو کلونو کې ځینو سرتېرو ادعا کړې وه چې دوی بریدګر په نښه کړی و او کولای یې شوای چې د دغه برید مخه ونیسي، خو اوس دوی ته څرګنده شوه چې دا خبره درسته نه ده.

یو طالب چارواکی: ګاونډي هېوادونه د پوهنتونونو د ودې له امله یې د ځان دفاع کولای شي

د طالبانو د حکومت د ازموېنو د ملي ادارې مشر عبدالباقي حقاني
د طالبانو د حکومت د ازموېنو د ملي ادارې مشر عبدالباقي حقاني

د طالبانو د حکومت د لوړو زده کړو یو چارواکی وایي، ګاونډي هېوادونه چې نن د ځان او خپلې خاورې دفاع کوي، لامل یې د پوهنتونونو وده ده.

د طالبانو د حکومت د ازموېنو د ملي ادارې مشر عبدالباقي حقاني، په غیر مستقیم ډول پر اسراییلو د ایران برید ته په اشارې وویل، د افغانستان د پوهنتونونو وړتیا هم باید لوړه شي.

هغه زیاته کړه:

" ګاونډیو هېوادونو که خپل ولس خودکفا ګرځولی دی او نن له خپل ولس څخه دفاع کولای شي، له خپل نظام څخه دفاع کولای شي، نن له خپلو سرحدانو نه دفاع کولای شي، نن د خپل یوه مظلومیت ځواب ویلی شي، وجه یې دا ده چې د دوی پوهنتونونه داسې حد ته رسېدلي چې نظام ته یې څه کړي دي، همدغه پوهنتونونه دي چې یو ملک د دونیا له هېوادونو سره سیال کوي."

نوموړی داسې مهال د پوهنتونونو د وړتیا پر لوړولو ټینګار کوي چې له تېر نژدې یو نیم کال راهیسې په افغانستان کې د نجونو پر مخ د پوهنتونو دروازې تړل شوې دي.

حقاني نن د افغان-امریکایي پوهنتون چې اوس د اسلامي پوهنتون په نوم فعالیت کوي، د ماسټرۍ او دوکتورا د ازموېنو د پيل په غونډه کې، دا څرګندونې وکړې، خو د نجونو د پوهنتونونو او ښوونځیو بندېدا او له دې کبله رامنځته شوې تعلیمي او تحصیلې تشې ته یې کومه اشاره ونه کړه.

افغانستان کې سېلابونو تر ۶۰ پورې کسانو ته مرګ ژوبله اړولې

د سېلابونو یوه څنډه
د سېلابونو یوه څنډه

د طالبانو د حکومت له پېښو سره د مبارزې په چارو کې د دولت وزارت وايي چې د تېرو دوو ورځو د سېلونو له کبله ۳۳ تنه مړه شوي او ۲۷ نور ټپیان شوي دي.

د دغه وزارت ویندوی ملاجانان سایق پرون (یکشنبې) په کابل کې یوې خبري غونډې ته وویل، په بېلابېلو ولایتونو کې د شپېتو تنو د مړینې او ټپي کېدو ترڅنګ سېلونو ۶۰۶ کورونه او سلګونه جریبه کرنیزه ځمکه هم ویجاړه کړې ده.

سایق وايي چې سېلونو ۲۰۰ څاروي هم مړه کړي او شاوخوا ۸۵ کیلومتره سړکونه یې وران کړي دي.

سېلونو تر ټولو ډېر تاوانونه په ارزګان ولایت کې پېښ کړي دي.

فراه کې ۲ تنه د سېلابونو له امله مړه شوي

د افغانستان په نقشه کې فراه ولایت
د افغانستان په نقشه کې فراه ولایت

په فراه ولایت کې د طالبانو یو سیمه ییز چارواکی په دغه ولایت کې د سېلابونو له امله د دوو تنو د وژل کېدو خبر ورکوي.

د فراه په پشترود ولسوالۍ کې د طالبانو ولسوال ملا محمد انور فېروز پرون وويل دواړه قربانيان هغه ځوانان وو چې د تفريح لپاره يوې غرنۍ سيمې ته تللي وو.

تر دې مخکې د طالبانو د حکومت د طبیعي پېښو پر وړاندې د مبارزې د وزارت ویاند ملا جانان سایق پرون ویلي وو چې په تېرو درېیو ورځو کې د کابل په ګډون د افغانستان په بېلابېلو سیمو کې د سېلابونو له امله لږ تر لږه ۳۳ کسان وژل شوي دي.

هغه د ټپيانو شمېر ٢٧ تنه اعلان کړ او ويې ويل چې د افغانستان په کليو کې د سختو سېلابونو له امله ٦٠٦ کورونه ويجاړ شوي دي.

کرزی او عبدالله: پر اسراییل د ایران بریدونه دفاعي اقدام وو

د افغانستان پخوانی ولسمشر حامد کرزی او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله
د افغانستان پخوانی ولسمشر حامد کرزی او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله

د افغانستان پخواني ولسمشر حامد کرزي او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله پر اسراییل د ایران بریدونه دفاعي اقدام او د اسراییلو د بریدونو په وړاندې عکس العمل بللی.

حامد کرزي او عبدالله عبدالله یکشنبه ناوخته په خپله ایکس پاڼو په دې تړاو بیانونه ورکړي.

کرزي ویلي چې د غزې جګړه باید سمدستي پای ته ورسیږي او هم د فلسطین، اسراییل او سیمې د ملکیانو ژوند خوندي شي.

اخوا عبدالله عبدالله ویلي د ایران له دریځه د ملاتړ تر څنګ ویلي چې د داسې کړکېچونو د سوله ییز حل غوښتونکی دی.

ډاکتر عبدالله ویلي، د ده په باور د ایران په وړاندې د اسراییل هر ډول اقدام به سیمه اغېزمنوي او د افغانستان پر وضعیت به هم مستقیم تاثیر ولري.

مخکې د طالبانو د بهرنیو چارو وزارت هم پر اسراییلو د ایران د توغندیزو او ډرون بریدونو ملاتړ کړی و او هغه یې مشروع بللي وو.

امریکا او ګڼو نورو لویدیځو هېوادونو بیا پر اسراییلو د ایران بریدونه په کلکه غندلي دي. د اسراییلو د جنګي کابینې وزیر بني ګانتز ویلي ایران به په مناسب وخت او شرایطو کې د دغو بریدونو تاوان پرې کوي.

ایران د شنبې په شپه د اسراییلو پر لور شاوخوا دوه سوه توغندي او ډرون الوتکې وویشتلې چې د اسراییلي چارواکو په خبره ۹۹ فیصده یې له اسراییلو دباندې فضا کې شنډ او نسکور شول.

نور راوښيه

XS
SM
MD
LG