نن په چک جمهوریت کې ملي ماتم دی.
دا ماتم د پنجشنبې د ورځې د پیښې په خاطر دی چې یوه وسله وال څوارلس تنه د دریو بهرنیو په ګډون په پلازمېنې پراګ کې ووژل.
تر دې پیښې وروسته پولیسو د پراګ ښار په عامه ځایونو کې امنیتي تدابیر زیات کړي دي.
چک پولیس لاهم د پراګ په زړه کې د چارلس پوهنتون د هنرونو په پوهنځي کې د پنجشنبې د پېښې څېړنه کوي چې ولې یوه محصل څوارلس تنه ووژل او پنځه ویشت تنه نور یې ټپیان کړل.
چارلس پوهنتون شپږ سوه پنځه اویا کاله مخکې تاسیس شوی دی او د هنرونو پوهنځی یې یو له پخوانیو پوهنځیو څخه دی.
تر اوسه له څېړنو څرګنده شوې ده چې برید کوونکی په چارلس پوهنتون کې د فلسفې د څانګې محصل و چې د برید په سهار یې خپل پلار د پراګ په لویدیځ کې د هوستون په ښارګوټي کې وژلی و او پر دې سړي دا شک هم شوی دی چې تر دې پېښې اونۍ مخکې یې یو سړی له خپلې دوې میاشتنۍ لور سره د پراګ په لمنو کې وژلي وو.
په پراګ کې د پولیسو یو مشر پیتر ماتیسک وایي چې برید کوونکي په بالکوني کې هغه مهال خپل ځان وویشت چې کله پولیس ودانۍ ته نژدې شول.
په لومړنیو راپورونو کې برید کوونکی څلرویشت کلن محصل داوید کوزاک یاد شوی دی.
چارواکي وایي چې دیارلس تنه د هنرونو په پوهنځي کې د ډزو پرمهال ووژل شول، یوه تن وروسته په روغتون کې ساه ورکړه.
په وژل شویو کې درې تنه بهرنیان دي، دوه د متحد عربي اماراتو او یو د هالنډ دی.
چارواکي اندېښنه څرګندوي چې ښایي د تلفاتو شمېر لوړ شي.
په ټپیانو کې د دولسو کسانو روغتیايي وضعیت نازک ښودل شوی .
روغتیایي مسوولان وایي چې د یوه تن وضعیت خطرناک دی.
د چک د کورنیو چارو وزیر ویت راکوسان پرون وویل چې د ټولو وژل شویو هویت څرګند شوی دی، خو چارواکو تر دې دمه د دې کسانو نومونه له رسنیو سره نه دې شریک کړي، البته د موزیک انسټیټیوټ دا تایید کړې ده چې مشره یې لینکا هلاف کوفا هم په وژل شوې کې ده.
پولیس وایي چې دا برید کوونکی سم مسلح و، له ده سره د برید پرمهال څو ټوپکه او یو څه درنه وسله هم وه.
په چک جمهوریت کې تر دې مخکې تر ټولو خونړۍ پېښه اته کاله مخکې د چک په جنوب ختیځ ښار (اوهرسکي برود) کې شوې وه چې یوه تن اته کسان ووژل او بیا یې ځان وواژه.
