د ایران په سیستان بلوچستان ایالت کې د وسلهوالو په برید کې ۱۱ پولیس وژل شوي او یو شمېر نور ټپیان دي.
د ایران دولتي تلوېزیون نن راپور ورکړ چې نیمه شپه په جنوب ختیځ سیستان بلوچستان ولایت کې د پولیسو پر یوه سټیشن د وسلهوالو په برید کې یوولس پولیس وژل شوي او اته تنه نور ټپیان دي.
د سیستان بلوچستان مرستیال والي علي رضا مرحمتي وویل، په دې حمله کې چې د پاکستان سرحد ته نژدې په راسک سیمه کې د شپې په شاوخوا دوه بجو وشوه، د پولیسو جګپوړي چارواکي او سرتېري وژل شوي او ټپیان دي.
مرحمتي زیاته کړه چې د دې پېښې پرمهال یوشمېر بریدکوونکي هم مړه او ټپیان شوي دي.
د هالوَش په نوم د بشري حقونو مدافع ډلې چې د بلوڅانو د ټولنو اړوند مطالب خپروي هغه آنلاین ویډیو خپره کړې چې له برید وروسته د ډزو غږونه په کې اورېدل کېږي.
ویډیو ښيي چې وروسته د ورځې په اوږدو کې د سیمې په فضا کې هیلیکوپټرې ګرځي.
د جیش العدل په نوم سختدریځې ډلې پر خپل ټلګرام پاڼه په یوه بیان کې د دې حملې پړه منلې ده.
دې ډلې مخکې له دې هم له سپاه پاسداران انقلاب او سرحدي ځواکونو سره څوځلې نښتې کړې دي.
جیش العدل په ۲۰۱۹ کال کې هم د هغه انتحاري برید پړه منلې وه چې په یوه بس کې یې د سپاه پاسداران ۲۷ سرتېري ووژل.
د اسوشېټېډپرېس خبري آژانس د راپور له مخې دا ډله خپلې چريکي حملې په ګاونډي پاکستان کې له خپلو پټنځایونو څخه تنظیموي.
د ایران د کورنیو چارو مرستیال وزیر مجید میراحمدي د ایران دولتي تلوېزیون ته وویل، امنیتي ځواکونو دوه بریدګر وژلي او یوتن یې ژوندی نیولی دی.
هغه زیاته کړه چې په سیمه کې په وسله والو پسې د پلټنې عملیات پیل شوي دي.
په وروستیو میاشتو کې وسله والو او د بېلتونپالو وړو ډلو د حکومت پرضد د وسله وال پاڅون په ترڅ کې د پولیسو پر مرکزونو حملې کړې دي.
سیستان- بلوچستان د ایران د ډېرو وروسته پاتې ولایتونو څخه دی.
دا سیمه د پولیسو په توقیف کې د پېغلې مهساامیني له وژل کېدو وروسته د حکومت پر ضد د پراخو اعتراضونو د ځپلو ډګر و.
په دې ولایت کې چې ډېری وګړي یې سني مسلمانان دي د حکومت پرضد اعتراضونه له څو میاشتو راهیسې روان دي چې وروستی مورد یې د جمعې په ورځ و.
د سیستان- بلوچستان بلوڅان له اوږدو کلونو راهیسې شکایت کوي چې د دې هېواد شیعه واکمن له دوی سره د مور میرې چلند کوي.
