د لاسرسۍ وړ لېنکونه

تازه خبر
سه شنبه ۸ کب ۱۴۰۲ کابل ۰۸:۰۲

افغانستان

طالبان: پاکستان نه ستنو شویو کډوالو ته ۲ لکه نومرې ځمکې وېشلو ته چمتو شوې دي

له پاکستانه ستنې شوې یو شمېر افغان کورنۍ په خېمو کې ژوند تېروي
له پاکستانه ستنې شوې یو شمېر افغان کورنۍ په خېمو کې ژوند تېروي

د طالبانو حکومت یو چارواکی ادعا کوي چې دوی له پاکستانه د راستنېدونکو کډوالو د استوګنې لپاره د ځمکو دوه لکه نومرې چمتو کړې دي.

د کرنې سرپرست وزیر عطاالله عمري په یوه ویډیو کې چې د طالبانو تر ادارې لاندې باختر اژانس خپره کړې، وايي چې د راستنېدونکو افغان کډوالو لپاره دا ځمکې د هېواد په ټولو ولایتونو کې د ښارګوټو په چوکاټ کې چمتو شوې دي او هغو کسانو ته ورکول کېږي چې خپلې ځمکې نه لري.

د ښاغلي عمري په وینا، د هغو کورنیو لپاره چې تر ۱۰ پورې غړي لري ۱۰ بسوې او د هغو لپاره چې له ۱۰ غړو زیات لري، ۱۵ بسوې نومرې ځانګړې شوې دي چې حکومت یې راستنېدونکو ته په نیمه بیه یا پنځوس سلنه تخفیف ورکوي او په لومړي کال به هېڅ پیسې هم نه ترې اخیستل کېږي.

دا څرګندونې په داسې حال کې کېږي چې په تېرو دوو میاشتو کې له څلورنیم لکو ډېر افغانان، څه په جبري ډول او څه په خپله خوښه له پاکستانه افغانستان ته ستانه شوي دي.

دا کډوال شکایت کوي چې د حکومت او مرستندویو ټولنو له خوا له دوی سره شوې مرستې کافي نه دي.

د ورځې تازه خبرونه دلته ولولئ

د امریکا د بهرنیو چارو وزیر د افغان ښځو د اقتصادي مقاومت په نوم یوه ایتلاف ته نن وینا کوي

د امریکا د بهرنیو چارو وزیر انتوني بلېکین
د امریکا د بهرنیو چارو وزیر انتوني بلېکین

ټاکل شوې چې د امریکا د بهرنیو چارو وزیر انتوني بلېکین د افغان ښځو د اقتصادي مقاومت په نوم د یوه ایتلاف AWERغونډې ته نن وینا وکړي.

د امریکا د بهرنیو چارو وزارت د ویندوی له دفتره بېګا ناوخته په یوه خپره شوې اعلامیه کې ویل شوي چې دا غونډه نن د افغانستان په وخت د ماښام په اوو بجو په بهرنیو چارو وزارت کې د بوستون پوهنتون او ددې وازرت په ګډ کوربه توب جوړیږي.

د اعلامیې له مخې، د دغه ایتلاف دې غونډې ته د خصوصي سکتور، مدني ټولنې، پوهنتونونو او حکومتونو استازي بلل شوي او دوی به د دغه ایتلاف د نویو نوښتونو او دا چې هغه له نورو لوبغاړو او شریکانو سره په څه ډول پرمخ وړل کېدای او ګډ هدفونه ترلاسه کیدای شي، خبرې وکړي.

د بهرنیو چارو وزارت په وینا، د بهرنیو چارو وزارت او د بوستون پوهنتون ترمنځ دغه خصوصي ایتلاف چې په ۲۰۲۲ کال کې د ښاغلي بلېنکین له خوا رامینځته شوی، هدف یې زده کړې، کار او خصوصي سوداګرۍ ته د افغان ښځو او نجونود لاسرسي ملاتړ او په دې برخه کې د نوښتونو او همکاریو زیاتوالی ښودل شوی.

په افغاني ټولنه کې د افغان ښځو او نجونو د فعال ګډون په هدف دا غونډه داسې مهال جوړیږي چې په افغانستان کې د طالبانو د واکمنۍ په څه باندې دوه نیم کلنه موده کې نجونې له شپږم ټولګي پورته زده کړومنع شوي او ښځې هم په نادولتي موسسو او یو شمېر دولتي ادارو کې له کار کولو راګرځول شوې دي.

نن په افغانستان کې د ګوزڼ ناروغۍ پر ضد د واکسین د ۴ ورځني کمپاین دویمه ورځ ده

تصویر له ارشیفه
تصویر له ارشیفه

په پام کې ده په افغانستان کې د ماشومانو د ګوزڼ د ناروغۍ یا پولیو پرضد د واکسین د څلور ورځني کمپاین په ترڅ کې چې پرون په ۲۱ ولایتونو کې پیل شو، له پنځو کلونو کم عمره شاوخوا اوه ملیونه او شپږ لکه ماشومانو ته د واکسین څاڅکي ورکړل شي.

د طالبانو د حکومت د عامې روغتیا وزارت له کورنیو او دیني عالمانو غوښتي دي چې د دې کمپاین په تطبیق کې مرسته وکړي.

تېرکال په افغانستان کې د پولیو شپږ پېښې ثبت شوې چې ټولې په ننګرهار ولایت کې وې، خو سږکال تراوسه د کومې نوې پېښې خبر نه دی ورکړل شوی.

افغانستان او پاکستان د نړۍ یوازیني دوه هېوادونه دي چې د ماشومانو د ګوزڼ ناروغي تراوسه پکې ده او له منځه نه ده وړل شوې.

د طالبانو د حکومت یو اقتصادي پلاوی له چابهار بندر څخه لیدنه کوي

د ایران د چابهار بندر یوه څنډه
د ایران د چابهار بندر یوه څنډه

د ایراني رسنیو د راپورونو له مخې، د طالبانو د حکومت یو اقتصادي پلاوی له چاه بهار بندر څخه لیدنه کوي.

ایرنا خبري آژانس خبر ورکړی چې د طالبانو د حکومت دا تخنیکي او اقتصادي پلاوی د چاه بهار په آزاده تجارتي او صنعتي سیمه کې د افغان سوداګرو لپاره د سوداګرۍ او پانګونو د فرصتونو د ارزونې لپاره هلته تللی دی.

ایرنا د چاه بهار د یوه چارواکي اکبر باور له قوله خبر ورکړی چې د افغان پلاوي د سفر پرمهال به په دې بندر کې د استوګنې د کورونو او د اقتصاد او هوټلدارۍ په برخو کې څو پروژې پرانیستل شي.

افغانستان چې سمندر ته خپله لاره نه لري او د پاکستان له لارې د سوداګرۍ او ترانزیت په برخو کې تل له ستونزه سره مخامخ وي، هڅه کوي چې د چاه بهار بندر له لارې له نورې نړۍ سره سوداګري پراخه کړي.

متقي د ترکمنستان د بهرنیو چارو وزیر سره د افغانستان- ترکمنستان د ترانزیت او انتقالاتو په اړه خبرې کړي

د طالبانو د حکومت او ترکمنستان د بهرنیو چارو د وزیرانو ناسته
د طالبانو د حکومت او ترکمنستان د بهرنیو چارو د وزیرانو ناسته

د طالبانو د حکومت د بهرنیو چارو وزیر له خپل ترکمنستاني سیال سره په کتنه کې د افغانستان او ترکمنستان ترمنځ د ترانزیت او انتقالاتو په اړه خبرې کړي.

د طالبانو د حکومت د بهرنیوچارو وزارت مرستیال ویاند حافظ ضیااحمد پر خپله ایکس پاڼه د دې لیدنې خبر ورکړی او لیکلي یې دي چې امیرخان متقي په عشق آباد کې د ترکمنستان د بهرنیوچارو له وزیر او مرستیال صدراعظم رشید مرادوف سره په کتنه کې د دوه اړخیزو سیاسي او اقتصادي مسایلو او همداراز د انتقالاتو او ترانزیت پر اړوندو مسایلو خبرې وکړې.

ښاغلی متقي د ترکمنستان د بهرنیوچارو د وزیر په بلنه د یوه پلاوي په مشرۍ چې د طالبانو د حکومت د کانونو او پټرولیم وزارت او د افغانستان د رېلګاډي او برېښنا د ادارو چارواکي پکې شامل دي، ترکمنستان ته تللی دی.

د ملګرو ملتونو یوې مسوولې د افغان ښځو پر وړاندې د طالبانو تبعیضي کړنې وغندلې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د ملګرو ملتونو یوه جګپوړې مسووله وايي، دوی په افغانستان کې د نجونو او ښځو پر وړاندې د طالبانو تبعیضي کړنې غندي.

په ملګرو ملتونو کې د ګیانا سفیرې کارولین رودریګوزبرکیټ چې د امنیت شورا دوره یي مشره ده، د ښځو، سولې او امنیت لپاره د ګډو ژمنو د ډلې په استازیتوب اعلامیه ولوستله او د طالبانو تر حاکمیت لاندې په افغانستان کې یې د بشري حقونو په رعایت ټینګار وکړ.

دغه څرګندونې د افغانستان په اړه د ملګرو ملتونو د امنیت شورا د نننۍ غونډې تر پیل مخکې شوې دي.

په خبرپاڼه کې راغلي چې د دې ډلې غړي د طالبانو له حکومته غواړي چې ژر تر ژره د ښځو پر وړاندې خپلې تګلارې لغوه کړي چې په کې له شپږم ټولګي څخه پورته د نجونو پر زده کړو بندیز، د ښځو پر کار بندیز، د هغوی پر تګ راتګ بندیز او د بیان پر ازادۍ بندیزونه شامل دي.

د افغانستان لپاره د ملګرو ملتونو د ځانګړي استازي د ټاکلو په اړه د يوې پوښتنې په ځواب کې مېرمن رودريګوز برکيټ وويل چې تر اوسه دې څوکۍ ته څوک نه دي نومول شوي.

د افغانستان لپاره د ملګرو ملتونو د ځانګړي استازي ټاکنه د امنیت شورا د نننۍ غونډې له مهمو موضوعاتو څخه ده چې طالبانو یې له وړاندې خپل مخالفت ښودلی دی.

د افغانستان په اړه د 'ریچارډ بینېټ' راپور د بشري حقونو شورا ته وړاندې کېږي

د افغانستان لپاره د ملګرو ملتونو ځانګړی راپور ورکوونکی ریچارډ بینېټ
د افغانستان لپاره د ملګرو ملتونو ځانګړی راپور ورکوونکی ریچارډ بینېټ

د افغانستان لپاره د ملګرو ملتونو ځانګړی راپور ورکوونکی ریچارډ بینېټ وایي چې په افغانستان کې د بشري حقونو د وضعیت په اړه د ده نوی راپور به د راتلونکې پنجشنبې په ورځ د فبرورۍ په ۲۹مه د ملګرو ملتونو د بشري حقونو د شورا ۵۵مې غونډې ته وړاندې شي.

بینېټ دا خبره نن دوشنبې په خپله ټولنیزه شبکه ایکس‌پاڼه یا پخواني ټویټر کې کړې، خو د محتوا په اړه یې نور جزییات نه دي ورکړي.

خو هغه ویلي چې په دې غونډه کې به چې د افغانستان په وخت د ماښام په شپږ نیمې بجې پیلېږي، دا راپوروړاندې شي او د دولتونو او مدني ټولنې ترمنځ به نظریات تبادله شي.

دا به په روانه اوونۍ کې دوهم ځل وي چې د ملګرو ملتونو دوه مهم ارګانونه د افغانستان پر وضعیت خبرې کوي.

ټاکل شوې د ملګرو ملتونو امنیت شورا نن دوشنبې د تړلو دروازو تر شا په یوه غونډه کې د افغانستان پر وضعیت بحث وکړي.

ټاکل شوې د ملګرو ملتونو عمومي منشي انټونیو ګوټېرېش په دې غونډه کې په ټوله کې د افغانستان د وضعیت، د نوموړي په مشرۍ په دوحه کې د تېرې اوونۍ د غونډې او همدارنګه د افغانستان لپاره د ملګرو ملتونو د یوه ځانګړې استازې د ټاکنې پر مسئلو خپل راپور وړاندې وکړي.

دا غونډې داسې مهال جوړېږي چې پر افغانستان واکمن طالبان له بشري حقونو په تېره د نجونو او ښځو د زده کړې او کار په برخو کې پرجدي سرغړونو تورن شوي دي.

ملګري ملتونه: د افغانستان په اړه د امنیت شورا نننۍ غونډه مهمه ده

د ملګرو ملتونو لوګو
د ملګرو ملتونو لوګو

ملګري ملتونه د افغانستان په اړه د دې سازمان د امنیت شورا نننۍ جوړیدونکې غونډه مهمه بولي.

د ملګرو ملتونو د سرمنشي مرستیال ویاند فرحان حق تېر ماښام ازادي راډيو ته په یوه استولي پیغام کې وویل چې د امنیت شورا لپاره د ځانګړي استازي د ټاکلو په ګډون په افغانستان کې د ملګرو ملتونو د کار ملاتړ خورا مهم دی.

تمه ده چې د تړلو دروازو ترشا دې غونډې ته به د ملګرو ملتونو عمومي منشي انتونیو ګوتریش د افغانستان لپاره د ځانګړي استازي د ټاکلو او په دوحه کې د تېرې اوونۍ د غونډې په اړه خپل راپور او وړاندیزونه وړاندې کړي.

د ملګرو ملتونو امنیت شورا په تېره ډسمبرمیاشت کې د یوه پرېکړه لیک په صادرولو سره د افغانستان په اړه د ملګرو ملتونو د ځانګړي همغږي کوونکي د ترسره شوې اروزنې د سپارښتنو چې یوه هم پکې د افغانستان لپاره د ملګرو ملتونو د ځانګړې استازي ټاکل کیدل دي، ملاتړ وکړ.

خو طالبانو له دې کارسره مخالفت څرګند کړی او ویلي چې د یوناما په موجودیت کې د ځانګړي استازي ګومارنې ته اړتیا نشته.

په عین حال کې د بشري حقونو د څارسازمان د ښځو د حقونو د برخې مرستیالې هیدربار د تړلو دروازو تر شا د افغانستان په اړه د ملګرو ملتونو د امنیت شورا پر غونډې نیوکه کړې او ویلي چې افغانان، په تېره ښځې او نجونې چې د طالبانو تر بریدونو لاندې راغلي؛ حق لري چې پوه شي په دې غونډه کې څه بحثونه او پرېکړې کیږي.

نجونې او ښځې د طالبانو په اوسنۍ واکمنۍ کې چې څه باندې دوه نیم کاله پرې تېریږي، د نورو محدودیتونو ترڅنګ له منځنیو او لوړو زده کړو او هم په نادولتي موسسو کې له کارکولو منع شوې دي.

د طالبانو روغتیا وزارت: د ګوزڼ ضد پیل شوي کمپاین کې به ۷،۶ میلیونه ماشومان واکسین شي

تصویر له ارشیفه
تصویر له ارشیفه

د طالبانو د حکومت د عامې روغتیا وزارت وایي، د ماشومانو د پولیو ضد واکسین کمپاین په ترڅ کې به چې نن د افغانستان په ۲۱ ولایتونو کې پیل شو، ترپنځو کلونو کم عمره ۷،۶ ملیونه ماشومان واکسین شي.

دغه کمپاین به په کابل، کندوز، تخار، بغلان، نورستان، کونړ، لغمان، پروان، کاپیسا، ننګرهار، پکتیا، پکتیکا، خوست، غزني، زابل، ارزګان، کندهار، هلمند، نیمروز، فراه او هرات ولایتونو کې تطبیق شي.

د دې وزارت ویاند شرافت زمان د طالبانو ترکنټرول لاندې باخترخبري آژانس ته وویل چې د پولیو د واکسین دغه دوم فرعي کمپاین به څلور ورځې دوام وکړي.

نوموړی له میندواو پلرونو او دیني عالمانو غواړي چې د دغه کمپاین په ښه تطبیق کې ورسره همکاري وکړي.

په روان میلادي کال کې تراوسه په افغانستان کې د پولیو کومه مثبته پېښه نه ده ثبت شوې، خو تېر کال په دې هېواد کې ۶ مثبتې پېښې ثبت شوې چې ټولې په ننګرهار ولایت کې وې.

افغانستان او پاکستان په نړۍ کې هغه دوه هېوادونه چې تراوسه پکې پولیو نه ده ختمه شوې.

پولیو، یا ګوزڼ یوه وایروسي ناروغي ده چې هېڅ درملنه نه لري او یوازې په واکسین سره یې مخه نیول کېدای شي.

د سالنګ لويه لاره د سختو واورو له امله وتړل شوه

سالنګ لاره - آرشیف
سالنګ لاره - آرشیف

د طالبانو د ټولګټو وزارت یو چارواکی وایي چې د درنو واورو او توفان له کبله د سالنګ لویه لار له تېرې شپې د ټولو وسایطو پرمخ وتړل شوه.

د دغه وزارت ویاند محمد اشرف حق شناس نن په خپله ایکس شبکه یا پخواني ټویټر کې لیکلي چې په سالنګ کې سخته واوره اوري او په بېلابېلو ساحو کې د واورو اندازه تر یو متر زیاته ده.

حق شناس ویلي چې د ټولګټو وزارت له خلکو غواړي، څو تر بلې خبرتیا پورې د سالنګ پر لویه لار تګ راتګ ونه کړي.

د سالنګ لویه لار پلازمېنه کابل له ۹ شمالي او شمال ختیځ ولایتونو سره نښلوي.

دا په روان ژمي کې څووم وار دی، چې د سالنګ لویه لار د ټرافیکو پرمخ تړل کېږي.

د طالبانو تر کنټرول لاندې د هواپېژندنې ادارې د شنبې په ورځ ویلي وو چې یکشنبه او نن دوشنبه به د افغانستان په ۲۴ ولایتونو کې درنه واوره او باران اوري او په ځینو ولایتونو کې به سېلابونه وبهېږي.

هرات: طالبانو د پښتون زرغون د اوسپنې په یوه کان کې د ۱۴۰ میلیونه ډالره پانګونې خبر ورکړ

د افغانستان په نقشه کې هرات ولایت
د افغانستان په نقشه کې هرات ولایت

طالب چارواکو د هرات ولایت په پښتون زرغون ولسوالۍ کې د اوسپنې په یوه کان کې د ۱۴۰ میلیونه ډالرو پانګونې اعلان کړی دی.

د طالبانو تر کنټرول لاندې باختر آژانس د هرات ولايت د طالبانو د کانونو او پټروليم د رييس فضل احمد منيب خاموش په حواله ليکلي دي چې د دغه کان د عوايدو شل سلنه د طالبانو بوديجې ته ځي.

خاموش زیاته کړه چې په هرات ولایت کې ۳۶ کانونه سروې شوي او د ۲۶ کانونو استخراج دوام لري.

په هرات کې د طالبانو د کانونو او پټروليم رييس ونه ويل چې د پښتون زرغون ولسوالۍ د اوسپنې په کان کې کوم هېواد يا کوم شرکت پانګونه کړې ده.

په ورته وخت کې د دغې پانګونې په اړه د هرات ولایت اوسېدونکو خبر ورکړی چې طالبان په دغه ولایت کې بنسټیزو پروژو ته هېڅ پام نه کوي.

دا مهال له ترکمنستان څخه پاکستان او هند ته د ګازو د لېږد لویه پروژه چې له هرات ولایت څخه هم تېرېږي، ځنډېدلې ده.

نور راوښيه

XS
SM
MD
LG