د اوکراین ولسمشر ولودمیر زلنسکي د جرمني د حکومت د هغو مهمو دفاعي پرېکړو مننه وکړه، چې د روان میلادي کال په پیل کې یې اعلان کړې دي.
زلنسکي پرون په ویډیويي تماس کې د جرمني د ولسمشر فرانک والټر شټاین مایر قدرداني وکړ، چې اوکراین ته یې مالي او بشري مرستې برابرې کړې دي.
د اوکراین ولسمشر په ټلګرام کې لیکلي، چې له خپل جرمني سیال سره یې د جګړې د لومړۍ کرښې پر وضعیت هم بحث وکړ.
"تقریباً یو کال کېږي چې اوکراین نړۍ حیرانه کړې ده.
بلخوا د اروپا د کمېسیون مشرې اورزلا وان دیرلین پرون د سویس په داوس ښار کې یوې غونډې ته وویل، چې اوکراین نړۍ په حرکت راوستلې او اروپا ته یې الهام بخښلی دی.
د هغې په خبره د اوکراین وګړو ته ډاډ ورکوي، چې اروپا به یې تل تر څنګ ولاړه وي.
اورزلا وان دیرلین زیاته کړه: "تقریباً یو کال کېږي چې اوکراین نړۍ حیرانه کړې ده. د فبرورۍ د ۲۴مې پر هغه برخلیک ټاکونکي سهار ډېرو اټکل وکړ، چې کییف به په څو ورځو کې سقوط وکړي. خو د اوکراین د وګړو فزیکي زړورتیا او روحیه یې په پام کې نه وه نیولې."
بلخوا د اوکراین د ولسمشر مېرمنې اولنا زلنسکا هم پرون د سویس په داوس ښار کې یوې نړیوالې اقتصادي غونډې ته وویل، چې پر اوکراین د روسیې یرغل د دې لپاره نه و، چې یوازې د اوکراین په قلمرو پورې محدود پاتې شي.
د هغې په خبره که دا جګړه له ماتې سره مخامخه نهشي، نو ممکن لا پراخه شي او لا ژور بحرانونه رامنځته کړي.
پر اوکراین د روسیې غیرموجه یرغل د فبروري میاشتې پر ۲۴مه پیل شو، چې لا هم دوام لري او په وروستیو کې د اوکراین پر اساسي بنسټونو د روسیې حملې سختې شوې دي.
