د ایران د حکومت ضد معترضانو په روانه اونۍ کې د ټول هېواد په کچه د درې ورځني اعتصاب او د چهارشنبې په ورځ د پلازمېنې تهران د ازادۍ چوک پر لور د لاریون غوښتنه کړې.
د دې اعتصاب غوښتنه په هغو پوستونو کې شوې چې پر ټویټر خپاره شوي او رویټرز خبري اژانس یې راپور ورکړی.
د ۱۹۷۹ کال له اسلامي انقلاب وروسته دا د حکومت پر ضد تر ټولو پراخ اعتراضونه دي.
په تېرو څو اونیو کې د اعتراضونو لپاره ورته غوښتنې شوې وې چې په نتیجه کې یې ګڼ خلک مظاهرو ته راووتل او د ایران وضعیت کړکېچن شو.
د ۱۹۷۹ کال له اسلامي انقلاب وروسته دا د حکومت پر ضد تر ټولو پراخ اعتراضونه دي.
په دې اعتراضونو کې د فعالانو د خبري اژانس هرانا HRANA د راپور لهمخې د شنبې تر ورځې پورې د ۶۴ ماشومانو په ګډون ۴۷۰ معترضان او ۶۱ تنه امنیتي پرسونل وژل شوي او همدا راز ۱۸۲۱۰ معترضان نیول شوي دي.
په ایران کې دا اعتراضونه وروسته له هغه پیل شول چې د مهسا امیني په نوم یوه پېغله د پوره حجاب د نه مراعاتولو په پلمه د ایران د امربالمعروف پولیسو یا ګشت ارشاد د کسانو ل خوا ونیول شوه او د سپتمبر په ۱۶مه یې په توقیف کې سا ورکړه.
په همدې حال کې په هغو پوستونو کې چې پر ټولنیزو شبکو او د شاروغ په څېر په ځینو ورځپاڼو کې خپاره شوي راغلي دي چې، په تېرو څو اونیو کې په واټونو کې د ګشت ارشاد پولیس لږ لیدل کېږي ځکه چارواکي احتمالا هڅه کوي چې د نورو اعتراضونو د پارولو مخه ونیسي.
د شنبې په ورځ د ایران لوی څارنوال وویل چې د ګشت ارشاد پولیسو تشکیل منحل شوی دی.
د ایران د کارګرانو خبري اژانس د جعفر منتظري له قوله خبر ورکړ چې نوموړی وايي، دا پولیس هغې ادارې منحل کړل چې رامنځته کړي یې وو.
خو د کورنیو چارو وزارت چې دا پولیس یې په تشکیل کې شامل دي تر اوسه په دې اړه د منتظري خبره نه ده تایید کړې.
همداراز د ایران دولتي رسنیو ویلي دي چې، لوی څارنوال د دې ځواک د ادارې مسوول نهدی.
ایراني چارواکو په وار وار دا خبره کړې چې تهران به د تېرو یوولسو اونیو له اعتراضونو سره سره د حجاب په برخه کې د اسلامي دولت اصول بدل نهکړي.
