د لاسرسۍ وړ لېنکونه

تازه خبر
یکشنبه ۶ لیندۍ ۱۴۰۱ کابل ۰۱:۳۳

د امریکا منځمهاله ټاکنو په نتیجه کې ډیموکرات ګوند پر سنا کنټرول وساته


د امریکا په نیواډا ایالت کې د سناتورې کټرین کورټیز مسټو بریا دا یقینې کړه چې ډیموکراتانو په سنا جرګه کې پنځوس څوکۍ چې دوی پر دې جرګې د کنټرول لپاره اړتیا ورته درلوده، خپلې کړې.

د امریکا د منځمهاله ټاکنو په نتیجه کې ډیموکرات ګوند پر سنا یا مشرانو جرګې خپل کنټرول وساته.

د امریکا په نیواډا ایالت کې د سناتورې کټرین کورټیز مسټو بریا دا یقینې کړه چې ډیموکراتانو په سنا جرګه کې پنځوس څوکۍ چې دوی پر دې جرګې د کنټرول لپاره اړتیا ورته درلوده، خپلې کړې.

د اسوشیټیډپریس خبري اژانس د راپور له مخې د مېرمن کټرین بریا په ټوله امریکا کې د منځمهاله ټاکنو له لارې د ډیموکراتانو پیاوړی واک په ډاګه کوي.

کټرین کورټیز مسټو
کټرین کورټیز مسټو

کټرین کورټیز د بریا په برخه کې تر ټولو زیان ګالې معلومېده، ځکه په نیواډا ایالت کې د پټرولو بیې ډېرې ختلې وې او جمهوري غوښتونکو د هغې د اسانه ماتېدو فکر کاوه.

د امریکا په سنا کې د اکثریت مشر چک شومر تېره شپه وویل: "د امریکا خلکو په ښه توګه د دیموکراسۍ ضد واکمنۍ رد کړه."

تر نیواډا وروسته جورجیا یوازنی ایالت دی چې د سنا جرګې د یوې څوکۍ برخه لیک په کې نا معلوم دی.

پر سنا جرګې د ډیموکراتانو واکمنۍ د کابینې د انتصاب او د قضایي غړو د ټاکنو په برخه کې د جوبایډن هڅو ته ښه لاره هواره کړه.

دغې بریا دا هم یقیني کړه چې ډیموکراتان به په سنا جرګه کې د کمیټو کنټرول وساتي او خپله به د بایډن د حکومت په اړه د څارنې واک ولري.

اوس که چېرته د استازو جرګې ډېرې څوکۍ جمهوري غوښتونکي ګټي او هغوی د بایډن د واکمنۍ ضد ځینې قوانین صادروي، سنا جرګه کې یې ډیموکراتان ردولی شي.

په همدې حال کې د امریکا ولسمشر جوبایډن چې د جنوب ختیځې اسیا په سفر بوخت دی، په کمبودیا کې ویلي: "د ټاکنو په اړه ښه احساس لري" او د څو راتلونکو کلونو په اړه فکر کوي.

د امریکا ولسمشر جوبایډن
د امریکا ولسمشر جوبایډن

بایډن ویلي، که په جورجیا ایالت کې دوی د سنا جرګې یوپنځوسمه څوکۍ هم خپله کړي، دوی به د سنا جرګې پر کمېټو خپله برلاسي پراخه کړي.

بایډن په ورته وخت کې هیله ښودلې چې دوی به په استازو جرګه کې هم ډېرې څوکۍ خپلې کړي، خو د دغې جرګې برخه لیک لا تراوسه هم روښانه نه دی.

د دیموکراتانو استازو په سنا جرګه کې له خپلې بریا وروسته د ډیموکراتیکو ارزښتونو د دفاع تټر وهلی او ویلي یې دي، دوی به د جنین د سقط د حق د دفاع په ګډون ګڼې نورې ژمنې عملي کړي.

د امریکا کانګرس له دوو خونو سنا او استازو جرګو جوړ دی چې د ټولو څوکیو یا غړو شمېر یې ۵۳۵ دی.

په دوی کې ۱۰۰ څوکۍ د استازو جرګې د غړو او پاته ۴۳۵ نورې د استازو جرګې د غړو لپاره دي.

XS
SM
MD
LG