د لاسرسۍ وړ لېنکونه

تازه خبر
چهارشنبه ۸ سلواغه ۱۳۹۹ کابل ۰۳:۳۳

نړۍ

د امریکا استازو جرګې د دفاعي پالیسۍ د رد پرېکړه باطله کړه

د امریکا کانګرس

د امریکا د استازو جرګې د ولسمشر ډونالډ ټرمپ له خوا د دفاعي پالیسۍ د رد یا ویټو پرېکړه باطله کړه.

دې لایحې ته د استازو جرګې ۳۲۲ غړو موافقې او ۸۷ نورو مخالفې رایې ورکړې چې د دې ویټو د باطلولو لپاره د اړتیا وړ له دریو دوه برخو څخه هم زیاتې وې. د جرګې ۱۰۹ جمهوریپال غړي هم د ډیموکراتانو ترڅنګ ودرېدل.

که دا پرېکړه د امریکا په سنا کې له دریو په دوه برخې رایو تایید شي نو دا به لومړی ځل وي چې د ټرمپ د ولسمشرۍ د دورې د ویټو پریکړه باطلېږي.

ټاکل شوې چې سنا د یوې اونۍ په ترڅ کې دې لایحې ته رایې ورکړي.

د دفاعي پالیسۍ په لایحه کې د پوځي پروګرامونو او رغنیزو پروژو او د پوځیانو په معاشونو کې د درې فیصده زیاتوالي لپاره ۷۴۰ میلیارډ ډالر غوښتل شوي دي.

ټرمپ د دې لایحې د رد لپاره څو موارد یاد کړي دي.

په یوه مورد کې ښاغلي ټرمپ ویلي دي، چې دې لایحې، د افغانستان په څېر هېوادونو څخه، د امریکايي سرتېرو د اېستلو په برخه کې د ده صلاحیت محدود کړی دی.

یو بل مورد د یو شمېر پوځي اډو د نومونو د بدلون وړاندیز دی.

په لایحه کې د هغو پوځي اډو د نومونو د بدلون وړاندیز شوی دی، چې په جنوبي ایالتونو کې د نولسمې پېړۍ په کورنۍ جګړه کې د مرییتوب د پلوي بېلتونپالو مشرانو په نوم نومول شوي.

د ورځې تازه خبرونه دلته ولولئ

جاپان ته د سفر لپاره د المپیک نړیوالې کمېټې نوې غوښتنه کړې

آرشیف

د المپیک نړیوالې کمېټې ټولو لوبغاړو څخه غوښتي چې جاپان ته تر سفر وړاندې د کرونا واکسین ترلاسه وکړي.

د المپیک نړیوالې کمېټې د ویب پاڼې د معلوماتو پر بنسټ، د جاپاني وګړو د خوندیتوب لپاره ورزشکارانو او چارواکو ته لارښوونه شوې چې د سفر دمخه د کرونا واکسین ترلاسه کړي.

د المپیک ملي کمېټې ټینګار کړی، چې د کرونا ویروس د مخنیوي لپاره واکسین یوازینۍ لار ده چې د پکینګ 2021 او د 2022 کلونو لوبو لپاره په پام کې نیول شوي.

د المپیک نړیوالې کمېټې دا پرېکړه وروسته له هغه وکړه چې د روغتیا نړیوال سازمان چارواکو کوویډ 19 واکسینو ته لومړۍ د المپیک سیالیو د ګډونکوو د لاسرسي له خبرې سره مخالفت وکړ.

په نړۍ کې د کرونا ویروس د مثبتو پېښو شمېر له سلو میلیونو واوښت

په روسیه کې په کرونا ویروس د اخته کسانو درملنه کېږي. ارشيف

په نړۍ کې د کرونا ویروس د مثبتو پېښو شمېر له سلو میلیونو اوښتی دی.

د امریکا د جانز هاپکنز پوهنتون د شمېرو له مخې څه باندې سل میلیونه او دوه لکه او اویا زره انسانان په کرونا ويروس اخته شوي، چې له ډلې یې څه باندې دوه میلیون او یو لک پنځوس زره کسان مړه شوي دي.

امریکا د ډېرو مثبتو پېښو او زیاتو مړینو په لحاظ په سر کې ده.

هلته د ټولو مثبتو پېښو شمېر له پنځه ویشت نیم میلیونو اوښتی چې له ډلې یې څه باندې څلور لکه او پنځه ویشت زره کسان مړه شوي.

د نړۍ په بېلابېلو هېوادونو کې د کرونا ضد واکسین لګول هم پيل شوي دي.

د ملګرو ملتونو سازمان د نړۍ ګوټ ګوټ ته د کرونا د واکسین د رسولو په برخه کې د همغږۍ او یووالي غوښتنه کړې ده.

د امریکا ولسمشر جوبایډن له خپل روسي سیال ولادیمیر پوتین سره غږېدلی

د عکس ښي لور ته د روسیې ولسمشر ولادیمیر پوتین او چپ لور ته د امریکا ولسمشر جوبایډن

د امریکا متحده ایالتونو نوي ولسمشر جوبایډن له خپل روسي سیال ولادمیرپوتین سره په څو مهمو مسئلو ټيلیفوني غږېدلی.

د راپورونو له مخې پرون ښاغلي بایډن د ولسمشر په توګه له پوتین سره په خپله لومړنۍ ټیلیفوني مکالمه کې د کرونا وبا د خپرېدو، د الکسي ناوالني د نیول کېدو، د ایران د اټومي تړون او په افغانستان کې د امریکايي ځواکونو د وژلو لپاره د انعام ټاکلو په احتمالي راپورونو خبرې کړي.

د امریکا د ولسمشر ویاندې جن ساکي (جنیفر رنې) څو ورځې دمخه واضح کړې وه چې د دوی اداره به په افغانستان کې د روسیې له خوا د امریکايي ځواکونو د وژلو پر سر د انعام ټاکلو د موضوع د څېړنې لپاره یوه ډله وګماري.

سپينې ماڼۍ په یوه بیان کې د بایډن او پوتین د پرونۍ ټیلیفوني مکالمې په اړه ویلي، ولسمشر بایډن واضح کړه چې متحده ایالتونه له خپل ځانه په دفاع سربېره به د امریکا او د دغه هېواد د متحدینو ملي ګټو ته د روسیې د زیان رسوونکو اقداماتو په وړاندې پرېکنده غبرګون وښيي.

د روسیې ولسمشرۍ ماڼۍ کرملین هم په یوه جلا اعلامیه کې ویلي، چې پوتین او بایډن له پرانیستي اسمان هوکړې د امریکا په یو اړخیز وتلو او له ایران سره د اټومي تړون د ساتلو په ستونزو خبرې کړي دي.

د ايران د ولسمشر د مرستيال ورور په دوو کلونو بند محکوم شو

مهدي جهانګيري

ايران، د ولسمشر حسن روحاني د لومړي مرستیال اسحاق جهانګیري ورور د مالي درغلۍ په تور په دوو کلونو بند محکوم کړ.

د قضاییه قوې ویاند غلام حسین اسماعیلي پرون وویل، چې پر مهدي جهانګیري په لګېدلو تورونو کې د اته لکه او ۴۷زره او ۲۰۰ ډالرو معادل د اسعارو د قاچاق تور هم شامل دی.

مهدي جهانګیري ته امر شوی چې دا پیسې بېرته حکومت ته تسلیم کړي او د دغو پیسو څلور برابره نورې به د جریمې په توګه سپاري.

د قضاییه قوې ویاند وايي، دا حکم نهايي دی او محکوم شوی کس د استنیاف غوښتنه نه شي کولی.

جهانګیري د تهران د سوداګرۍ خونې د مدیره هیئت غړی و، چې د ګردشګرۍ په نوم د خصوصي بانک له مشرانو ګڼل کېده.

دی د ۲۰۱۷م کال په اکتوبر میاشت کې نیول شوی و، خو د ۲۰۱۸م کال په مارچ میاشت کې په ضمانت خوشې شوی و.

په جرمني کې محکمې د تاجکستان یو پناه غوښتونکی په ۷ کاله بند محکوم کړ

د جرمنيد يوې محکمې مخه

په جرمني کې یوې محکمې د تاجکستان یو پناه غوښتونکی د اسلامي دولت ډلې یا داعش د غړیتوب، په جرمني او په البانیا کې د حملو د طراحۍ په تور په ۷ کاله بند محکوم کړ.

څارنوالانو رفشان بي، چې د جرمني د محرمیت د قوانینو له مخې یې تخلص پټ ساتل شوی، د تاجکستان د وګړو د هغې ډلې رهبر یاد کړی، چې په جرمني کې یې د یوې تروریستي کړۍ د ایجاد هڅه کوله.

د محکمې تر پروني حکم مخکې دغه ۳۱ وګړي د نسبي اعتراف تر څنګ محکمې ته عذر وکړ، چې پر ټولو کړو هڅو پښېمانه دى.

جرمني د ټولو نړیوالو الوتنو پرمخ د هوايي قلمرو پر بندولو غور کوي

د فرانکفورت د هوايي ډګر يوه څنډه

جرمني پر دې غور کوي، چې د ټولو نړیوالو الوتنو پرمخ خپل هوايي قلمرو کاملاً بند کړي.

د جرمني د بهرنیو چارو وزیر هورست زیهوفر پرون سې شنبه وویل، دا اقدام د کرونا ویروس د خپرېدو د مخنیوي لپاره کېږي.

زیهوفر له بیلډ ورځپاڼې سره په خبرو کې وویل: "د کرونا ويروس د بڼې بدلېدو ګواښ موږ اړ ایستلي یو چې پر داسې یوه جدي اقدام غور وکړو."

جرمني په خپلو سرحدونو کې هم د سخت کنټرول پر وضع کولو غور کوي، په ځانګړي ډول د هغو هېوادونو پر پوله چې د کرونا ويروس مثبتې پېښې په کې زیاتې دي.

په جرمني کې په کرونا ويروس د اخته کسانو شمېر تر دوو ملیونو او یو لک او ۵۰ زرو اوښتی او په دې وایروس د مړو شمېر په کې تر ۵۳۰۰۰ زیات دی.

ایران کې د غېږنیونې یو اتل 'مهدي علي حسیني' په دار وځړول شو

د غېږنیونې ایران اتل ۳۰ کلن مهدي علي حسیني

له ایرانه راغلي راپورونه وایي چې د غېږنیونې یو اتل د قتل په تور اعدام شو.

د راپور له مخې ۳۰ کلن مهدي علي حسیني د ایران په جنوب لویدیځ کې د 'دزفول' په ښار کې د دوشنبې په ورځ په دار ځړول شوی دی.

حسیني چې د سیمې په کچه پیژندل شوی غېږ نیونکی و، پنځه کاله مخکې د یوه ځوان د وژلو په تور تورن شوی و.

ایران د نړۍ له هغو څو ګوتو په شمارو هېوادو څخه دی چې ډېر کسان په کې اعدامېږي.

د بښنې د نړیوال سازمان په وینا په ایران کې په دوه زره نولسم کال کې تر دوه سوه یو پنځوس ډېر کسان اعدام شول.

د تاجیکستان ولسمشر خپل هېواد له کرونا وبا پاک وباله

د تاجکستان ولسمشر امام علي رحمان

د تاجیکستان ولسمشر خپل هېواد له کرونا وبا پاک وباله او ویې ویل چې روانه میاشت د کرونا یوه مثبت پېښه هم نه ده ثبت شوې.

امام علي رحمان نن سې شنبه (د سلواغې ۷مه) پارلمان ته د وینا پرمهال دا ادعا وکړه، خو د تاجیکستان روغتیا وزارت د دې میاشتې په پیل کې ویلي و چې د کرونا یو شمېر نوې مثبت پېښې د نوي کال له پیله را وروسته ثبت شوي دي.

په تاجیکستان کې د کرونا رسمي مثبتې پېښې ۱۳ زره درې سوه اتو ته رسېږي او تلفات یې نوي تنه ښودل کېږي.

جوبایډن په روسیه کې د اعتراضونو پر ځپلو اندېښنه څرګنده کړې

د روسي ځواکونو له لوري د اعتراض کوونکو د ځپلو يوه صحنه

د امریکا ولسمشر جوبایډن په روسیه کې د اپوزیسیون د مشر الکسي ناوالني او د حکومت ضد اعتراضونو پر ځپلو اندېښنه څرګنده کړې.

په ټوله روسیه کې د ناوالني د نیول کېدو پرضد له پراخو اعتراضونو وروسته بایډن پرون- دوشنبې وویل، چې له دې کبله خورا اندېښمن دی خو هغه زیاته کړه چې امریکا او روسیه د اټومي وسلو د کنټرول په چاره کې همکارۍ ته اړتیا لري.

د راپورونو له مخې د دې اعتراضونو پرمهال د ناوالني له ۳۷۰۰ زیات پلویان نیول شوي دي.

اروپايي ټولنې هم د کرېملېن پرضد د اعتراضونو ځپل غندلي دي.

د دې ټولنې د بهرنیو اړیکو د شورا مشر ژوزیپ بورېل پرون په بروکسل کې خبریالانو ته وویل: "د ناوالني نیول او د هغه د پلویانو ځپل د اروپايي شورا لپاره د منلو وړ نه دي. اروپايي شورا د اونۍ په پای کې د خلکو ډله ییز نیول او د پولیسو بېرحمي وغندله. موږ پر روسيې غږ کوو چې ښاغلی ناوالني او نور نیول شوي کسان خوشې کړي."

په روسیه کې د حکومت ضد اعتراضونه وروسته له هغه پیل شول، چې د اپوزیسیون مشر الکسي ناوالني تېره اونۍ له جرمني تر راستنېدو وروسته په هوايي ډګر کې ونیول شو.

ناوالني په زهري مواد له مسمومېدو وروسته د علاج لپاره جرمني ته تللی و.

"جنېت یلین" د امریکا د خزانې د وزیرې په توګه تایید شوه

جنېت یلین

د امریکا سنا پرون د رایو په اکثریت جنېت یلین د خزانې د وزیرې په توګه تایید کړه.

د امریکا په تاریخ کې دا لومړی ځل دی چې یوه مېرمن پر دې دنده ګومارل کېږي.

مېرمن یلین د ۱۵ منفي رایو پر وړاندې په ۸۴ مثبتو رایو تایید شوه.

نوموړې ته به په امریکا کې چې د څو لسیزو له ترټولو سخت اقتصادي بحران سره مخامخ ده د اقتصادي ثبات د راوستو دنده ور له غاړې وي.

مېرمن یلین مخکې له دې د فدرال حکومت د زېرمو د مشرې او د سپینې ماڼۍ د اقتصادي سلاکارانو د شورا د مشرې په توګه دنده ترسره کړې ده.

د امریکا سنا ته د ډونالډ ټرمپ د استیضاح وړاندیز وشو

ډونالډ ټرمپ

د امریکا د استازو جرګې پرون د ډونالډټرمپ د استیضاح وړاندیز سنا ته وړاندې کړ او له دې سره یې په سنا کې د پخواني ولسمشر د دوهم ځل محاکمې لپاره اقدام وکړ.

په دې سند کې چې پرون د سنا په غونډه کې ولوستل شو، ټرمپ د پاڅون په پارولو تورن شوی دی.

له دې مخکې د استازو جرګې د استیضاح مسوولو چارواکو دا سند د کانګرس په هغو سالونونو کې وګرځاوه چې د جنوري په شپږمه د ټرمپ پلویانو یرغل پرې وکړ.

ټرمپ د همدې پېښې په تور چې په نتیجه کې یې د یوه پولیس افسر په ګډون پنځه کسان ووژل شول، په سنا کې استیضاح او محاکمه کېږي.

د مقرراتو له مخې د استیضاح بهیر باید سنا ته د دې سند له رسېدو سره سم پیل شي، خو د سنا مشرانو په دې مقرراتو کې پر بدلون موافقه وکړه او دا کار یې د فبروري په اتمه نېټه تر پیلېدونکې اونۍ پورې وځنډاوه.

د کریمې بلوچ مړی په بلوچستان کې خاورو ته وسپارل شو

د کریمه بلوچ انځور

د بلوڅانو یوه فعاله چې د دغه اقلیت لپاره یې مبارزه کوله، پرون په بلوچستان ایالت کې خاورو ته وسپارل شوه.

پرون د پلوچستان په تُمپ سیمه کې د کریمې بلوچ د مړي د ښخولو لپاره کلک امنیتي تدابیر په پام کې نیول شوي وو.

هغه چې په کاناډا کې اوسېدله د ډسمبر پر ۲۱ مه په تورنتو ښار کې لادرکه شوه یوه ورځ وروسته یې مړی وموندل شو.

د کریمې بلوچ ملاتړي ادعا کوي، چې هغه د پاکستان د استخباراتي ادارې له خوا وژل شوي، خو پاکستاني چارواکو دا تور نه دی تایید کړی.

کریمه بلوچ چې د کریمې محراب په نامه هم پېژندل کېدله، په پاکستان کې د ورکو بلوڅانو لپاره یو کمپاین چلاوه.

ایران د سګنال په نوم د پیغامونو استولو اپلکېشن او سایټ فلټر کړی

ارشیف

د پیوست په نوم د ایران یوې خپرونې راپور ورکړی چې ایران د سګنال په نوم د پیغامونو استولو اپلکېشن او سایټ فلټر کړی دی.

دغې میاشتنۍ خپرونې پرون راپور ورکړ، چې اوس خلک په ایران کې له فلټرماتوونکو سافټویرونو پرته د سګنال په نوم اپلکېشن او ویبسایټ نه شي کارولی.

پرون تر دې مخکې د انټرنټي شبکو یوې څارونکې ډلې ویلي وو، داسې ښکاري چې ایران د سګنال اپکېشن بندول پیل کړي دي.

د ایران چارواکو د سګنال اپ د بندولو د پرېکړې په اړه په عامه څرګندونې نه دي کړي.

وروسته له هغې چې د واټس اپ د محرمیت په پالیسۍ کې یو لړ بدلونونه راغلل او له مخې یې واټس اپ په حقوقي لحاظ اجازه لري د استفاده کوونکو معلومات له اړوند شرکت فېسبوک سره شریک کړي، ګڼو ایرانیانو د پیغامونو استولو د بل اپلکېشن سګنال کارولو ته مخه کړه.

د ګوګل کمپنۍ کارکوونکي په ټوله نړۍ د کارګرانو اتحادیه جوړوي

ګوګل

د ګوګل کمپنۍ کارکوونکي په ټوله نړۍ کې د کارګرانو اتحادیه جوړوي.

دا اقدام وروسته له هغې کېږي چې د ګوګل او د هغه بل اړوند شرکت الفابت ځینو څانګو څو اوونۍ مخکې د امریکا د متحدو ایالتونو او کاناډا د دفترونو لپاره د کارګرانو یو اتحادیه جوړه کړه.

د الفا ګلوبل په نوم دغه اتحادیه د UNIپه نوم له نړیوالې کارګري اتحادیې سره په هغږۍ ایجاد شوې، چې د نړۍ په سطحه د شا و خوا ۲۰ ملیونه کارګرانو استازیتوب کوي.

UNIوايي، د امریکا تر څنګ، د جرمني، سویس، سویس او بریتانیا کارګري اتحادیې هم په کې شاملې دي.

د دې اتحادیې سرمنشي مېرمن کریستي هوفمن وویل، په الفابت شرکت کې ستونزې چې د همدې شرکت زېږنده دي، په یوه هېواد پورې نه محدودېږي، بلکې په نړیواله سطحه یې باید په وړاندې اقدام وشي.

الفابت شرکت د دغو څرګندونو په اړه تبصره نه ده کړې.

نړیوالې کارګري اتحادیې پر ګوګل تور لګولی چې پر جنسي ځورونو او نورو ناوړه استفادو سترګې پټوي.

د بې پولې خبریالانو ټولنې د پاکستاني چارواکو وروستى بربنډ سانسور غندلی

آرشیف

د بې پولې خبریالانو ټولنې د پاکستاني چارواکو هغه بربنډ سانسور غندلی چې په نتیجه کې یې بي بي سي له یوه خصوصي پاکستاني ټلویزیوني چینل سره په اردو ژبه د خبرونو خپرېدل درولي دي.

بي بي سي ویلي، چې چارواکو د دوی په خپرونو کې مداخله کوله.

د بې پولې خبریالانو د آسیاپسفیک د څانګې مشر ډانیل بسټارډ نن په یوه خپاره کړي بیان کې وویل چې له AAJ ټلویزیون سره د بي بي سي د قرارداد د لغوه کولو پرېکړه دا مانا لري چې بي بي سي له دې ډډه کړې چې پر دغه چینل د پاکستاني چارواکو له خوا لګول شویو بندیزونو ته په ګونډو شي.

هغه د پاکستان پرحکومت غږ وکړ، چې د خبري رسنیو د ایډیټوریال په چارو کې له مداخلې لاس واخلي او زیاتوي دا ډول مداخله د ډیموکراتیکو اساسي اصولو خلاف او هغه په پاکستان کې د پوځي د یکتاتورۍ دورو د تجربې ښکارندويي کوي.

نور راوښيه

XS
SM
MD
LG