په کابل کې د پاکستان د سفارت شارژدافېر اسد عباس ویلي، د کابل او اسلام اباد د اړیکو په اړه باید د یوې وینا پر اساس قضاوت و نهشي.
د ده اشاره د ملګروملتو په عمومي اسمبلۍ کې د شهباز شریف وینا ته وه چې ویلي یې و تروریستي ډلې له افغانستانه د پاکستان او سیمې امنیت ګواښي.
د راپورونو له مخې، عباس ویلي چې د اندېښنې څرګندول باید دښمني ونه انګېرل شي.
شریف د ملګروملتو د عمومي اسمبلۍ ۷۷يمې غونډې ته ویلي و چې القاعده، داعش، پاکستاني طالبان، د ختیځ ترکستان اسلامي غورځنګ او د ازبکستان اسلامي غورځنګ په افغانستان کې راغونډ شوي دي.
نوموړي ويلي وو: "پاکستان لا هم د یوه داسې سولهییز افغانستان غوښتونکی دی چې ټولو وګړو ته یې، د هغو جنسیت، قوم او مذهب ته له پامه پرته احترام وشي. پاکستان د افغان ښځو او نجونو حقونو ته د درناوي د تشویق لپاره کار کوي."
پاکستان په تېرو کلونو کې د افغانستان په چارو کې په لاسوهنې او د افغانستان د پخواني جمهوري نظام پر ضد د طالبانو په ملاتړ تورن و.
پاکستان او سیمې ته له افغانستانه د تروریستي ګواښ په اړه د شهباز شریف له خبرو وروسته د طالبانو د بهرنیو چارو وزارت وویل، د پاکستان په شمول د څو هېوادونو اندېښنه بې ځایه ده.
دغه وزارت په یوه اعلامیه کې همدا راز ویلي چې، د افغانستان له خاورې به د هیڅ هېواد پر ضد کار وانهخیستل شي.
په اعلامیه کې همدا راز ویل شوي چې، نړیوال دې د اندېښنو او تورونو پر ځای د دوی له حکومت سره تعامل وکړي.
له بلېخوا د طالبانو د حکومت د بهرنیو چارو سیاسي مرستیال عباس ستانکزي په کابل کې وویل چې پاکستاني چارواکي د لوېدیځوالو د خوشالولو لپاره د کلام بې عفتي کوي.
ده دا هم وویل چې طالبان شواهد لري چې بې پېلوټه الوتکې له کوم ځایه الوزي او افغانستان ته ورځي.
