د طالبانو حکومت د حج اوقافو وزارت وايي، دغه بهیر د جون میاشتې په لسمه (نن) پیل شوی او هغه زارئینو ته به ویزې ورکول کیږي چې د فرضي حج لپاره یې ټول شرایط برابر کړي وي.
د طالبانو حکومت د حج او قافو وزارت وزارت وايي، هغه حاجیان چې د فرضي حج کولو لپاره په ټولو شرایطو برابر دي د ویزو د ورکړې بهیر یې نن په کابل کې د سعودي عربستان د سفارت لخوا پیل شو.
دغه وزارت د یوې اعلامیې په خپرولو سره ویلي دوي هڅه کوي چې د افغان حاجیانو لپاره ډېرې اسانتیاوې رامنځته کړي.
موږ هڅه وکړه چې ددغې پروسې د پیل په اړه نور جزییات هم ترلاسه کړو خو ددې وزارت ویاند زموږ اړیکه ځواب نهکړه.
دا پروسه وروسته له دوه کاله ځنډ د یو شمېر توپیرونو سره پیلیږي.
سږ کال له افغانستان نه یوازې ۱۳۵۸۲ کسان د فرضي حج لپاره عربستان سعودي تللی شي.
دغه شان سعودي ته د حج لپاره هر تلونکی افغان باید ۴۲۰۰ ډالر ورکړي، په داسې حال کې چې مخکې دغه رقم ۲۴۰۰ ډالره وو.
د دې ترڅنګ له ۶۵ کاله زیات عمر لرونکو کسانو ته سږ کال په حج مراسمو کې د ګډون اجازه هم نه ورکول کېږي.
دغه شرایطو ته یو شمېر هغه افغانان چې د حج مراسمو کې یې د ګډون تمه یې درلوده، له خپله ګډونه په شاه شوي دي.
د هرات ولایت اوسېدونکي زین الله چې سږ کال یې د حج د ادا کولو نیت کړی وو خو د زیاتو پېسو له امله پېښمانه شوی.
نوموړی وايي: "ما سږ کال نیت کړی و چې دمکې مکرمې ښکلی زیارت به وکړم خو په تیر کلونو کې چې د حج مراسمو لپاره شاخوا زر ډالره اخیستل کېدل هغه مصرف اوس له ۴ زره ډالرو هم پورته شوی، اخیر ولې؟ اقتصادي وضیعت خراب دی، موږ له اسلامي امارت غواړو چې په دې برخه کې یوه همکاري وکړي."
د فراه ولایت اوسېدونکي محبوب چې درې کاله یې د فرضي حج لپاره انتظار ویستی وايي، د سږني کال شرایطو ته په کتو سره دفرضي حج د ادا کولو توان نهلري.
نوموړی وايي:
"سږ کال نهشم کولای د حج ادا کولو لپاره لاړ شم، ددې لپاره چې مصرف ډېر دی او زه توان نهلرم
، که د تګ پر مهال څلور لکه ورکړم، له حج نه چې بېرته راګرځم هم پېسې ډېرې لګېږي او روان اقتصادي وضعت ته په کتو خلک نشي کولای."
د طالبانو حکومت د ارشاد، حج او اوقافو وزارت څو ورځې وړاندې اعلان وکړ، چې سږ کال به د حج مراسمو د ادا کولو لپاره په افغان حاجیانو نېږدې څلور لکه افغانۍ لګښت راشي.
ددغه وزارت ویاند وړاندې له دې ازادي راډيو ته ویلي و چې له هر حاجي د ډېرو پېسو اخیستلو یوازینی دلیل د سعودي عربستان لخوا د ټيکسونو لوړول، د الوتګو ټیکټونه او حاجیانو ته لازمو امکاناتو برابرول دي.
دا په داسې حال کې ده، چې د کرونا ویروس له خپرېدو مخکې به له افغانستان نه هر کال دېرش زره حاجیان د فرضي حج د مراسمو دادا کولو لپاره سعودي عربستان ته تلل.
