په واشنګټن کې د یوې استخباراتي ارزونې له مخې، د روسیې ولسمشر په اوکراین کې د یوې اوږدې جګړې لپاره چمتو کېږي.
د دې علت دا ښوول شوی دی چې ولادیمیر پوتین د اوکراین له ختیځه ورها خوا پراخ پلانونه لري.
بل لور ته مسکو ویلي دي، چې سبا به د ملګرو ملتو له لوري د اوکراین په اړه جوړې شوې غونډې ته خپل استازی ونه لېږي.
د امریکا د متحد ایالتونو د ملي استخباراتو د ادارې مشره اوریل هاینس وایي، په دې باور ده چې د روسیې ولسمشر ولادیمیر پوتین په اوکراین کې اوږدمهاله جګړې ته چمتوالی نیسي.
مېرمن هاینس پرون د امریکا د مشرانو جرګې د پوځي خدماتو کمیټې ته وویل، د واشنګټن د ارزونو له مخې ولسمشر پوتین غواړي چې له دنباس پرته ور هاخوا نورو هدفونو ته ځان ورسوي.
نوموړې زیاته کړه، چې د دې له اټکل سره سم ښایي پوتین به داسې انګېري چې د شخړو پر وړاندې تر خپلو دښمنانو ډېر ځواکمن دی او زغم یې لري.
د مېرمن هاینس په وینا، داسې اټکل هم کېږي چې د پوتین د پرېکړو وړاندوینه ونه شي او دی په روسیه کې یو نظامي حکومت اعلان کړي.
روسیې د فبروري په څلورویشتمه پر اوکراین بریدونه پيل کړل چې د لویدیځ له سخت غبرګون سره مخامخ شول او پر روسیې یې پراخ بندیزونه ولګول.
له بل پلوه روسیې پرون وویل، چې د اوکراین په اړه به د ملګرو ملتو د بشري حقونو په ځانګړې غونډه کې برخه وانخلي.
د ملګرو ملتو د بشري حقونو شورا پرون اعلان وکړ، چې د کییف په غوښتنه به په اوکراین کې د بشري حقونو د وضعیت د ارزونې په خاطر غونډه وکړي.
خو د روسیې د بهرنیو چارو د وزارت ویاندې ماریا زاخرووا وایي، چې د روسیې استازی به دې غونډې ته ورنه شي.
دې دا غونډه یوه نوې سیاسي لوبه وبلله او ویې ویل چې په داسې غونډو کې د روسیې خبرې نه اورېدل کېږي.
ملګرو ملتو ویلي دي، چې پر اوکراین د روسیې د برید له پیله تر اوسه تر پنځه میلیونه ډېر اوکراینیان مجبوره شوې دي چې له خپل هېواده کډوال شي او په نورو هېوادونو کې پناه واخلي.