د کابل په بادام باغ کې د بزګز څلور ورځني جشن پیل!
دا جشن چې هر کال د حمل میاشتې په دوهمه نېټه پیلېده سږ کال په داسې حال کې څلور ورځې په ځنډ پیل شو چې په افغانستان طالبان واکمن دي.
د دې څلور ورځني جشن په پرانیسته کې چې د شنبې په ورځ وشوه او د طالبانو د حکومت د کرنې او مالدارۍ وزارت له لوري تنظیم شوی د طالبانو د حکومت لوړپوړو چارواکو، بهرنیو ډیپلوماتانو، د ګڼو وزارتونو چارواکو او بزګرو ګډون کړی و.
د طالبانو حکومت د ریاستالوزرا لومري مرستیال عبدالغني برادر په دې ناسته کې ټینګار وکړ چې که د کورنیو تولیداتو ملاتړ او د پلور او پېر لپارهیې په هېواد دننه او بهر د بازارموندنې په برخه کې فرصت برابر شي افغانستان به د ځان بسیاینې په لور بوځي.
ښاغلي برادر وویل: "یو ملک ته د فقر لاس نیول او د مرستې غوښتنه په دې افغانستان پرمختګ نهشي کولای، دا به یوې یا دوو میاشتو لپاره د خلکو اړتیا پوره کړي، خو د تل لپارهیې نهشي دفع کولای، موږ باید ټول سره لاس ورکړو شپه او ورځ په ځان یوه وکړو داسې یو نظام راولو چې د افغانستان خلک په ځان بسیا شي."
عبدالغني برادر بزګرو ته د ملاتړ ژمنه ورکړه ویېویل چې د طالبانو حکومت په نږدې ورځو کې د داسې یوې سترې پروژې د عملي کېدو په حال کې دی چې تر نیمایي افغانستان کرنیزې ځمکې به خړوبې او د کرنې لپاره ګڼ فرصتونه رامنځته کړي، خو د دې پروژې په اړهیې نور جزئیات ورنهکړل.
بلخوا په همدې ورځ د اوبو ملي کنفرانس په لړ کې د طالبانو د حکومت د اوبو او برښنا وزارت مرستیال مجیبالرحمن عمر وویل، دوی هڅه کوي چې سږ کال ټولو خلکو ته د څښاک د پاکو اوبو د رسولو زمینه برابره کړي او د لسګونو نویو بندونو د ډیزاین او جوړولو خبر یې هم ورکړ.
خو ښاغلي عمر له نړیوالو وغوښتل چې په دې برخه کې دې په افغانستان کې پانګونه وکړي.
دی وايي: "موږ دوی ته ډاډ ورکوو چې رادې شي او په دې برخه کې دې پانګونه وکړي او د افغانستان په دې سترو او ارزښت لرونکو سرچینو ساتلو کې دې موږ سره همکار وي او زموږ ملاتړ دې وکړي موږ به د دې لپاره چاپېریال خوندي وساتو."
د نوموړي په خبره، افغانستان هر کال د ۶۹ میلیارد متر مکعب اوبه لري، خو یوازې ۳۰ سلنې تهیې لاسرسی شته.
د بزګز په ملي جشن کې د څلورو ورځو لپاره د کورنیو تولیداتو نندارتون هم جوړ شوی چې عام خلک هم ورتلی شي او دا تولیدات وپېري او ویل شوي چې د ځینو کرنیزو تولیداتو لپاره د شرکتونو ترمنځ به تړونونه هم وشي.
د طالبانو حکومت په داسې حال کې د اوبو ملي کنفرانس او د بزګر ملي جشن پیل کړ چې دا مهال په دغه هېواد کې د اقتصادي کړکېچ له امله ډېری افغانان له بېوزلۍ سره مخ او د نړیوالو بشري مرستو ته اړ دي.
د بېوزلۍ لوړه کچه په ماشومانو کې د پراخې خوارځواکۍ لامل هم ګرځېدلې چې د روغتیا نړیوال سازمانیې په وار وار په اړه اندېښنه څرګنده کړې ده.
