روسي ځواکونو نن سې شنبه سهار هم د اوکراین پر څو ښارونو خپلو بمباریو ته دوام ورکړ چې دې مسئلې په اوکراین کې د بشري بحران د لا پراخېدو وېره زیاته کړې ده.
د پلازمېنې کیف په څو برخو کې نن سپېده چاود مهال د څو لویو چاودنو غږ واورېدل شو.
د اسوشیټډ پرس اژانس په حواله، د روسیې څو هوايي حملو د کیف استوګنیزې سیمې بمبار کړې چې د پراخې اورلګېدنې او په یوه ۱۵ منزله ودانۍ کې د ژغورنې د هڅو سبب شوې.
د اژانس په حواله دا پېښه لږ تر لږه د یوه تن د وژل کېدو او په ودانۍ کې د نورو کسانو د راګیر پاتې کېدو سبب شوه.
مخکې د اوکراین ولسمشر ولادیمیر زلنسکي خبرداری ورکړی و، که روسي ځواکونه د پلازمېنې کیف د نیولو هڅه وکړي، له مرګونو عواقبو سره به مخامخ شي.
وروسته له هغې چې د ۱۶۰ ملکیانو د موټرو کاروان پر ټاکل شوي بشري دهلېز له محاصره شوي بندري ښار ماریوپول څخه ووت، په دې ښار کې د هیلې یو څرک تر سترګو شو. له دې ښاره د ملکیانو د وتلو خبر د ماریوپول ښاري شورا تأیید کړی دی.
په تېرو څه باندې ۱۰ ورځو کې د ماریوپول مرګونې محاصره د کورونو او نورو ودانیو د ویجاړېدو سبب شوه چې ورسره خلک له خوړو، اوبو، د کورونو تودولو له امکاناتو او درملو بېبرخې شول.
د روسیې او اوکراین ترمنځ تازه مذاکرې چې د دوشنبې په ورځ د وېډیو له لارې ترسره شوې، د دواړو هېوادونو ترمنځ په لوړه کچه د خبرو څلورم پړاو و.
دغه مذاکرې هم تر څو ساعتونو دوام کولو وروسته له کوم جدي پرمختګ پرته پای ته ورسېدې.
د اوکراین د ولسمشر ولادیمیر زلنسکي یوه همکار میخایلو پودولیاک (Mykhailo Podolyak) ویلي، په دغو خبرو کې یوه تخنیکي وقفه راغلې چې نن سې شنبه به بیا دوام کوي.
دواړو لورو په تېرو ورځو کې د اوکراین او روسیې د جګړې د حل لارې په باب یو څه هیله ښوولې ده.
پودولیاک په ټویټر کې لیکلي، دواړه لوري به په خپلو مذاکرو کې پر سوله، اوربند، له اوکراینه د روسي ځواکونو د سمدستي وتلو او امنیتي ضمانتونو په اړه بحث وکړي.
روسیې پر اوکراین خپل یرغل د فبرورۍ میاشتې پر ۲۴مه پیل کړ چې تر اوسه دوام لري.
