د ملګرو ملتونو اړوند د ماشومانو د مرستې صندوق- یونېسف هیله څرګنده کړې چې طالبان به را روانه وري- حمل میاشت کې د نجونو د ښوونځیو پیل ته د اجازې ورکولو په برخه کې خپله ژمنه عملي کړي.
کاترین روسل د یونېسف د مشرې په توګه افغانستان ته د خپل لومړي سفر په ترڅ کې له اسوشیټېډ پرېس خبري اژانس سره په ځانګړې مرکه کې وویل، د طالبانو د حکومت مشرانو داسې نښې نښانې ښودلې چې غواړي په ټول هېواد کې د نجونو پر مخ د ښوونځیو دروازې پرانېزي.
طالبانو د زمري په ۲۴مه پر افغانستان له واکمنېدو وروسته تر شپږم د لوړو ټولګیو زده کوونکې نجونې پرې نه ښودې چې ښوونځيو ته ولاړې شي.
مېرمن روسل چې اوس-اوس په دې دنده ګومارل شوې وايي، هېڅوک باید د زده کړې له حق څخه محروم نه شي.
تېرو شپږو میاشتو کې پر طالبانو له دې کبله سخت انتقادونه وشول چې ښځې او نجونې یې د زده کړو او کار له حقه محرومې کړي دي.
په عین حال کې د طالبانو د حکومت د لوړو زده کړو وزارت له مهالوېش سره سم ټاکل شوې چې نن (د کب په اومه) د هېواد د ټولو سړو سیمو پوهنتونونه د نجونو او هلکانو پرمخ پرانیستل شي.
د سلواغې په ۱۳مه نېټه د تودو سیمو پوهنتونونه په داسې حال کې پرانیستل شول چې د هلکانو او نجونو ټولګي جلا شوي وو او نجونې د ځانګړي حجاب په اغوستو مکلفې وبلل شوې.
ویل کېږي چې له دې پرېکړو سره پوهنتونونو ته د تلونکو نجونو په شمېر کې کموالی راغی.
نړیوالې ټولنې له طالبانو سره د تعامل لپاره یو لړ شرایط وړاندې کړي دي چې د نجونو او ښځو د زده کړو او کار حق، بشري حقونو په تېره د ښځو حقونو ته درناوی او د یوه ټولشموله حکومت جوړول یې ترټولو مهم دي.
د طالبانو حکومت په وار-وار ویلي دي چې ټولو وګړو ته به د شریعت په اساس حقونه ورکړل شي.
د طالبانو د حکومت چارواکو همدا راز ویلي دي چې د دوی سرپرست حکومت د افغانستان د ټولو خلکو استازیتوب کوي.
