د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۵:۲۳

د بلاروس پر سیاسي او اقتصادي څېرو بندیزونه پراخ شول


ارشیف، الکساندر لوکاشینکار او یو شمېر نور بلاروسي چارواکي
ارشیف، الکساندر لوکاشینکار او یو شمېر نور بلاروسي چارواکي

اروپایي ټولنې، امریکا او د لوېدیځ کلیدي متحدانو د بلاروس پر سیاسي او اقتصادي څېرو بندیزونه پراخ کړل.

اروپایي ټولنه وایي، وزیرانو یې پر بلاروس د نویو بندیزونو طرحه پرون (د ډسمبر ۲مه) په یوه غونډه کې تأیید کړه.

دا له کله نه چې د ۲۰۲۰ کال په اګسټ کې الکساندر لوکاشینکا ځان د بلاروس د ولسمشریزو ټاکنو ګټونکی اعلان کړی، پر بلاروس د اروپایي ټولنې پنځم پړاو بندیزونه دي.

د بلاروس واکمن الکساندر لوکاشینکا
د بلاروس واکمن الکساندر لوکاشینکا

دغه بلاروسي چارواکي په ډیموکراسۍ ضد چلند، د بشري حقونو په سرغړونه او له کډوالو په ناوړه استفادې تورن دي.

د بلاروس رژیم تورن دی چې هغه هېواد کې یې له ټاکنو وروسته ډیموکراسۍ پلوه مظاهره‌چیان ځپلي او زرګونه تنه‌یې توقیف کړي دي.

د بلاروس د رژیم له‌خوا د سیاسي مخالفانو د شکنجې راپورونه هم ورکړل شوي او "مؤثقو" راپورونو ښودلې چې یو شمېر کسان مړه شوي هم دي.

د مظاهره‌چیانو پر ځپلو سربېره اروپایي ټولنه د بلاروس او پولنډ ترمنځ پوله کې د کډوالۍ د رامنځته شوي ناورین لامل هم د بلاروس رژیم بولي.

دغې پوله کې زرګونه کډوال راټول شوي او هڅه کوي چې پولنډ ته ننوځي.

د بلاروس یوه سرحدي سیمه کې یو شمېر پناه غوښتونکي
د بلاروس یوه سرحدي سیمه کې یو شمېر پناه غوښتونکي

په دغو زرګونه کډوالو کې د منځني ختیځ، افریقا او افغانستان اتباع شامل دي چې په ناوړه بشري وضعیت‌یې پرله‌پسې اندېښنې وښودل شوې.

د اروپایي ټولنې په نویو اعلان شویو بندیزونو کې د بلاروس ۱۷ شخصیتونه او ۱۱ هغه ادارې په نښه شوي چې د کډوالۍ د ناورین مسؤلې بلل کېږي.

بلاروس بیا دې بندیزونو ته غبرګون ښودلی او ویلي يې دي، تند ځواب به ورکړي.

د بلاروس او اروپایي ټولنې ترمنځ د ناندریو له پيله تر اوسه دغې ټولنې پر ۱۸۳ بلاروسي چارواکو او ۲۶ ادارو بندیزونه لګولي دي.

بریتانیا، متحده ایالاتو او کاناډا هم له خپله اړخه د بلاروس پر شرکتونو د سزا اقدامات وضع کړي دي.

اروپایي ټولنې، امریکا، بریتانیا او کاناډا په یوه ګډه اعلامیه کې ویلي: "په بلاروس کې پر بشري حقونو او بنسټیزو ازادیو د حملو دوام له نړیوالو اصولو سرغړونه ده او د ځپنې د اقداماتو د تکرار ښکارندويي کوي."

د اروپايي ټولنې بیرغ
د اروپايي ټولنې بیرغ

د امریکا د خزانې وزارت ویلي، د خپلو بندیزونو په پنځم پړاو کې یې د بلاروس پر ۲۰ چارواکو، ۱۲ شرکتونو او درېیو الوتکو بندیزونه لګولي دي.

دوی هم د خپلو بندیزونو لاملونه د بلاروسي چارواکو له‌خوا د کډوالو قاچاق او قرباني کول یاد کړي دي.

کله چې تېر کال د اروپایي ټولنې او بلاروس ترمنځ اړیکې ناندریزې شوې او دې ټولنې پر بلاروس بندیزونه ولګول، د بلاروس واکمن الکساندر لوکاشینکا ګواښ وکړ چې د دغې ټولنې د پولو امنیت به له‌منځه یوسي.

د اروپایي ټولنې په پخوانیو بندیزونو کې لوکاشینکا او د هغه دوه زامن هم په نښه شوي، خو د بلاروس د رژیم سیاسي مخالفې سویتلانا تیخانوفسکایا د اروپایي ټولنې لګول شوي څلور پړاوه بندیزونه کمزوري بللي دي.

د بلاروس واکمن الکساندر لوکاشینکا له دې وړاندې پر اروپایي ټولنې نیوکه کړې.

هغه ویلي، که دوی کډال د پولنډ پولې ته هم راوستلي وي، اروپایي ټولنه‌یې په منعه کولو سره، د پناه غوښتنې نړیوال اصول تر پښو لاندې کوي.

XS
SM
MD
LG