د پاکستاني طالبانو د تحریک ګڼو سرچینو ویلي، دوی د پاکستان له حکومته غوښتنه کړې چې د مذاکرو د یوه شرط په توګه د دوی ځینې بندیان خوشې کړي.
د مذاکرو هدف دا ښوول شوی چې د بشپړ اوربند لپاره زمینه برابره او له حکومت سره له اوږدې مودې راهیسې د پاکستاني طالبانو دښمني ختمه شي.
د پاکستاني طالبانو د تحریک درېیو قوماندانانو د دې ډلې د بندیانو خوشې کېدل د باور جوړونې لپاره یو مهم اقدام بللی دی.
په کونړ کې د پاکستاني طالبانو د تحریک یوه قوماندان چې نوم یې نه دی یاد شوی، رویټرز خبري اژانس ته ویلي، دوی له افغان طالبانو جلا دي.
راپورونه وايي، د افغان طالبانو په منځګړیتوب د خبرو پیل شوي دوه پړاوونه ناکامه شوي دي.
هغو سرچینو چې له دې موضوع خبر دي، رویټرز اژانس ته ویلي، د حقاني شبکې مشر سراج الدین حقاني چې دا مهال د طالبانو د کورنیو چارو سرپرست وزیر دی، د پاکستاني طالبانو او د پاکستان د حکومت ترمنځ په خبرو کې همکاري کوي.
د پاکستان صدراعظم عمران خان تېره میاشت د ترکیې ټي. ار. ټي (TRT) ټلوېزیون ته په مرکه کې ویلي وو حکومت یې د پاکستاني طالبانو له تحریک سره د روغې جوړې د پروسې د برخې په توګه په خبرو بوخت دی.
مذاکره کوونکي وايي، دواړو لوریو منلي، تر هغو چې د دوی ترمنځ کومه موافقه لاسلیک او علني شوې نه وي، د روغې جوړې د ملاتړ یا مخالفت یا هم د یو بل پرضد به کومه اعلامیه نه خپروي.
د پاکستاني طالبانو د تحریک ویاند، محمد خراساني په یوه پیغام کې وویل چې دغې ډلې له بامفهومه خبرو هېڅکله مخ نه دی اړولی، خو تراوسه په عمل کې هېڅ تحول نه دی راغلی.
د پاکستان د کورنیو چارو وزارت، د بهرنیو چارو وزارت او د پوځ مطبوعاتي څانګې د دې موضوع په اړه د رویټرز خبري اژانس پوښتنو ته ځواب نه دی ویلی.
د پاکستاني طالبانو تحریک یا تحریک طالبان پاکستان له ځینو افراطي او ملېشه ډلو جوړ دی چې له ۲۰۰۷میلادي کال راهیسې د پاکستان د حکومت پرخلاف جنګېږي.
دغه ډله د امریکا د متحدو ایالاتونو د بهرنیو چارو وزارت د بهرنیو تروریستي سازمانونو په فهرست کې شامله ده.
د پاکستاني طالبانو تحریک له ۴۰۰۰ نیولې تر ۵۰۰۰ پورې جنګیالي لري چې اکثره یې پر ډیورنډ کرښه افغانستان ته نږدې فعال دي.
وروسته له هغې چې طالبانو د اګسټ میاشتې پر ۱۵مه نېټه کابل هم ونیوه، د افغانستان او پاکستان ترمنځ پر ډیورنډ کرښه ځینې تحرکات شوي دي.