د لاسرسۍ وړ لېنکونه

تازه خبر
سه شنبه ۲ زمری ۱۴۰۳ کابل ۱۱:۰۶

ښځې

کابل کې د ځینو مېرمنو د خپل بد اقتصادي وضعیت په اړه مظاهره وکړه

ارشیف، یو شمېر مېرمنې
ارشیف، یو شمېر مېرمنې

نن یو شمېر ښځو په کابل ښار کې اعتراض وکړ، دغو ښځو د کار، ډوډۍ او زده کړو شعارونه ورکول.

د اماج خبري اژانس په حواله چې دا ښځې د طالبانو د امر بل معروف او نهی عنی المنکر وزارت مخې ته راټولې وې او د خپل بد اقتصادي وضعیت او کار ته د هغوی د نه پرېښودو په خاطر یې اعتراض وکړ.

اماج ویلي چې طالبانو د دغه اعتراض مخه ونیوله او یو شمېر خبریالان یې هم ووهل.

طالبانو تردې دمه په دې اړه تبصره نه ده کړې.

د اګسټ په پنځلسمه کله چې طالبان پر کابل واکمن شوي، ډېر شمېر ښځو ته د کار او زده کړې اجازه نه ده ورکول شوې، خو نجونې په یو محدود شمېر ولایتونو کې ښوونځیو ته ځي.

د طالبانو حکومت ویلي چې د اسلامي شریعت په چوکاټ کې د ښځو حقونو ته درناوی لري.

د ورځې تازه خبرونه دلته ولولئ

يوناما: د ښځو پر حقونو هيڅکله معامله نه‌شي کېدلی

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

ملګري ملتونه وايي، د ښځو حقونه د بشر اساسي حقونه دي او هيڅکله پرې معامله نه‌شي کېدای.

په افغانستان کې د ملګرو ملتونو د مرستندویه پلاوي دفتر یوناما د دوشنبې په ورځ په ایکسپاڼه کې په یوه پیغام کې لیکلي، ښځې او نجونې په هر ځای کې چې وي د عزت او درناوي وړ دي.

د جون په ۳۰مه په قطر کې د ملګرو ملتونو په کوربه‌توب د دوحې په غونډه کې د افغان ښځو د استازیو نه بلل کېدو پر ملګرو ملتونو د فعالانو نیوکې پارولي دي.

د طالبانو حکومت د کورنیو او بهرنیو فشارونو سره سره د نجونو او ښځو پر زده‌کړو او کار بندیز لګولی دی.

له افغانستان سره د نړیوال پیوستون د نښې په توګه لسګونه زرګونه لاسلیکونه راټول شوي

ارشیف: په کابل کې د معترضو مېرمنو د لاریون یو انځور
ارشیف: په کابل کې د معترضو مېرمنو د لاریون یو انځور

د بخښنې نړیوال سازمان، له افغانستان سره د نړیوال پیوستون د نښې په توګه تر درې لکه ۵۴زره ۸۴۷زیات لاسلیکونه راټول کړي دي.

لاسلیکوونکو په ګډه د طالبانو له چارواکو غوښتنه کړې چې په افغانستان کې بشري حقونه رعایت کړي.

د بخښنې نړیوال سازمان د جنوبي اسیا څانګې پرون په خپله ایکس­شبکه کې لیکلي چې: "په افغانستان کې بشري وضعیت په خرابېدو دی، نو موږ باید په افغانستان کې د حساب ورکولو او عدالت لپاره خپلې ګډې غوښتنې ته دوام ورکړو.:

طالبانو په افغانستان کې د بشري حقونو د ناوړه وضعیت په باب مخکېني راپورونه رد کړي وو او په افغانستان کې یې دا وضعیت سم ښودلی دی.

ملګري ملتونه د جولای ۱۲مه د ملالې يوسفزۍ په نوم نمانځي

 د نوبل د سولې د جایزې د ګټونکې ملاله یوسفزۍ
د نوبل د سولې د جایزې د ګټونکې ملاله یوسفزۍ

ملګري ملتونه هر کال د جولای دولسمه د نوبل د سولې د جایزې د ګټونکې ملالې یوسفزۍ په نوم نمانځي.

د دې ورځې د نمانځلو هدف د ماشومانو د حقونو، په ځانګړې توګه د نجونو لپاره مبارزه او خلکو ته د پوهاوي ورکړه ده.

پر ملالې یوسفزۍ د ۲۰۱۲م کال د اکټوبر په نهمه په سوات کې یوه طالب ډزې وکړې او سخته یې ټپي کړه.

نن ورځ چې د دې لپاره ملګرو ملتونو ځانګړې کړې ده، دا د دې د زوکړې ورځ ده چې په دې ورځ په کال۱۹۹۷م کې په سوات کې زیږېدلې وه.

بلېنکن: پر طالبانو فشار ته دوام ورکوو څو د ښځو او نجونو په کار او تعلیم بندیزونه لیرې کړي

د امریکا د بهرنیو چارو وزیر انټوني بلېنکن
د امریکا د بهرنیو چارو وزیر انټوني بلېنکن

د امریکا د بهرنیو چارو وزیر وايي، پر طالبانو به فشار ته دوام ورکړي چې د ښځو او نجونو پر کار او زده‌کړو بندیزونه لیرې کړي.

انټوني بلېنکن د جولای په نهمه یوې خبري غونډې ته وویل چې په افغانستان کې ښځې او نجونې چوپه خوله نه دي او د خپلو حقونو لپاره مبارزه کوي.

هغه وویل: "موږ هره ورځ له حکومتونو، نادولتي موسسو، خصوصي سکټور او اکاډمیک اشخاصو سره کار کوو تر څو د افغان ښځو او نجونو د هڅو ملاتړ وکړو او په افغانستان کې ښځې او نجونې زده‌کړې ته دوام ورکړي، خپل مهارتونه لوړ کړي او وکولای شي له لرې لارې خپل کار وکړي."

د امریکا متحدو ایالتونو په افغانستان کې له ښځو سره په داسې حال کې خپل ملاتړ اعلان کړی چې له شپږم ټولګي څخه پورته ښوونځي له ۱۰۰۰ ورځو راهیسې د نجونو پر مخ تړل شوي دي.

له څه باندې یو نیم کال راهیسې طالبانو پوهنتونونو او غیردولتي موسسو ته د ښځو او نجونو د ورتګ مخه نیولې ده.

یوسفي: د پاریس په المپیک کې به د افغان مېرمنو د تښتول شویو هیلو استازیتوب وکړم

په اسټرالیا کې دېره افغانه ورزشکاره کیمیا یوسفي
په اسټرالیا کې دېره افغانه ورزشکاره کیمیا یوسفي

په اسټرالیا کې دېره افغانه ورزشکاره کیمیا یوسفي وايي، دا به د پاریس په المپیک کې د افغان مېرمنو د تښتول شویو هیلو استازیتوب وکړي.

د اسټرالیا د المپیک کمیټې تایید کړې ده چې ۲۸ کلنې کیمیا به د ځغاستې په برخه کې د افغانستان استازیتوب وکړي.

آغلې یوسفي د اسټرالیا د المپیک کمېټې له‌خوا په خپاره شوي بیان کې ویلي، ویاړي چې یوځل بیا د المپیک په لوبو کې د افغان نجونو استازولي کوي.

نوموړې دوه ځلې مخکې هم په المپیک لوبو کې د افغانستان استازولي کړې ده.

د المپیک نړیوالې کمیټې تېره میلادي میاشت وویل چې جنسیتي انډول ته په پام سره یې شپږ افغانان د پاریس په المپیک کې د ګډون لپاره غوره کړي، خو دې کمېټې د طالبانو استازو ته بلنه نه ده ورکړې.

د طالبانو د المپیک کمېټې ویاند اتل مشواڼي پرون وویل د پاریس په المپیک کې یوازې درې نارینه لوبغاړي د افغانستان استازیتوب کوي.

هغه زیاته کړ چې کله په افغانستان کې د نجونو پر سپورت بندیز وي نو په بهر کې د افغانستان په استازیتوب د نجونو ګډون د حیرانتیا خبره ده.

د طالبانو حکومت پر نجونو او ښځو د نورو ګڼو بندیزونو ترڅنګ د ښځو پر سپورټ هم بندیز لګولی دی.

پر افغان ښځو او نجونو د لګولو شویو محدودیتونو د لیرې کېدو غوښتنه وشوه

ارشیف: په کابل کې د معترضو مېرمنو د یوې اعتراضیه غونډې څنډه
ارشیف: په کابل کې د معترضو مېرمنو د یوې اعتراضیه غونډې څنډه

د ښځو پر وړاندې د تبعیض له منځه وړلو لپاره د ملګرو ملتونو کمېټې له طالبانو غوښتنه کړې چې په افغانستان کې پر ښځو او نجونو لګول شوي محدودیتونه لیرې کړي او د هغو نړیوالو کنوانسیونونو مطابق عمل وکړي چې افغانستان یې غړی دی.

دغې کمېټې دغه څرګندونې د دوحې د درېیمې غونډې په مناسبت پرون په یوه اعلامیه کې کړې دي.

د ښځو پر وړاندې د تبعیض له منځه وړلو لپاره د ملګرو ملتونو کمېټې ویلي، دا چې د افغان ښځو د حقونو موضوع د نړۍ په سطحه له تر ټولو جدي بحرانونو ګڼل کېږي، دغه ښځې باید د دوحې د درېیمې غونډې په څېر جلسو کې فعال او معناداره حضور ولري.

د ملګرو ملتونو په کوربه‌توب د دوحې درېیمه غونډه د ښځو له حضور پرته سبا او بل سبا جوړېږي چې د طالبانو د چارواکي تر څنګ د څه باندې ۲۵ هېوادونو استازي په کې جرګه کېږي.

بینېټ د دوحې غونډه کې د افغان ښځو او مدني ټولنې د غړیو په ګډون ټینګار کړی

د افغانستان د بشري حقونو په برخه کې د ملګرو ملتونو ځانګړی راپور ورکوونکی ریچارډ بینېټ
د افغانستان د بشري حقونو په برخه کې د ملګرو ملتونو ځانګړی راپور ورکوونکی ریچارډ بینېټ

د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بینېټ د دوحې په درېیمه غونډه کې د افغان ښځو او مدني ټولنې د غړیو په ګډون ټینګار کړی دی.

بینېټ په نیویارک ټایمز کې په خپره کړې مقاله کې چې نن خپره شوه، لیکلي چې د افغان ښځو، نجونو او مدني ټولنې د غړیو اغېزمن ګډون د دوحې په غونډه کې په‌کار دی.

د دوحې درېیمه غونډه د ملګرو ملتونو په کوربه‌توب د یکشنبې په ورځ پيلېږي چې د شاوخوا ۳۰ هېوادونو او نړیوالو موسسو استازي په‌کې برخه اخلي.

طالبان هم په دې غونډه کې ګډون کوي.

په افغانستان کې د ملګرو ملتونو د مرستندویه پلاوي یا یوناما مشرې روزا اوتنبایووا ویلي چې د افغان ښځو او مدني ټولنو استازې به د دوحې تر دوه ورځنۍ غونډې وروسته د سې شنبې په ورځ د قطر په پلازمېنه کې په یوې بلې غونډه کې ګډون وکړي.

د دوحې په راتلونکې غونډه کې د افغان ښځو استازې برخه نه اخلي

د پلازمېنې دوحې یوه څنډه
د پلازمېنې دوحې یوه څنډه

د دوحې په راتلونکې غونډه کې د افغان ښځو استازې برخه نه اخلي.

د ملګرو ملتونو د امنیت شورا تر پرونۍ غونډې وروسته د یوناما مشرې روزا اوتنبایووا په نیویارک کې خبریالانو ته وویل، ملګرو ملتونو ته څوک شرایط نه شي ایښودلی چې څرنګه غونډه به جوړوي.

اغلې اوتنبایووا زیاته کړه چې د دوحې د راتلونکې غونډې مشري د ملګرو ملتونو سیاسي مشره روزماري دیکارلو کوي او د افغانستان لپاره د۲۲ هېوادونو په ځانګړیو استازیو کې چې کومې ښځې دي، هغوی به هم ګډون په کې وکړي.

په دوحه کې د افغانستان لپاره د ملګرو ملتونو دوه ورځنۍ غونډه د جون په ۳۰مه پيلېږي.

په دې غونډه کې د افغان مېرمنو د استازیو پر نه ګډون د بشري حقونو یو شمېر ډلو سخت اعتراض کړی دی.

د بشري حقونو د څار ډلې اجراییوي مشرې تیرینا حسن وویل، د طالبانو له لوري پر ښځو او نجونو د فشارونو له کبله ملګري ملتونه غواړي داسې غونډه جوړه کړي چې په اجنډا کې یې د ښځو د حقونو مسئله شامله نه وي او د غونډې په خونه کې افغانې ښځې نه وي چې دا ټکان ورکوونکې پرېکړه ده.

د بخښنې د نړیوال سازمان عمومي مشر اګنیس کالمارد بیا وویل، که چېرته د دوحې په غونډه کې د ښځو د بشري حقونو مدافعان او د افغان مدنې ټولنې استازي برخه وانه‌خلي، د غونډې اعتبار به له منځه ولاړ شي.

طالبانو د ریچارډ بینېټ وروستي راپور ته توند غبرګون وښود

د طالبانو د حکومت ویاند ذبیح‌الله مجاهد
د طالبانو د حکومت ویاند ذبیح‌الله مجاهد

د طالبانو حکومت د افغانستان لپاره د ملګرو ملتونو د ځانګړي راپورتر وروستي راپور ته توند غبرګون ښودلی دی.

د طالبانو د حکومت ویاند ذبیح‌الله مجاهد نن چهارشنبه پر خپله ایکس شبکه یا پخواني ټویټر لیکلي، د ملګرو ملتونو یو شمېر غړي، په ځانګړې توګه ځانګړی راپورتر یې هڅه کوي چې د ده په وینا د دوحې له غونډې مخکې د خلکو ذهنیتونه بلې خواته واړوي.

مجاهد زیاته کړې چې دغه استازي د ده په ټکو د ناسمو تصویرونو په وړاندې کولو سره لوی پرمختګونه تر شعاع لاندې راولي.

هغه ټینګار کړی چې له طالبانو سره باید مثبت او کارنده تعامل وشي.

د ملګرو ملتونو ځانګړي راپورتر ریچارډ بینېټ په خپل راپور کې چې پرون سه شنبه یې د بشري حقونو شورا ته وړاندې کړ، طالبان د جنسیتي ځپنې د سیستم پر عامولو تورن کړل.

هغه د طالبانو تر واک لاندې د ښځو او نجونو وضعیت ټکان ورکوونکی بللی دی.

دا راپورونه داسې مهال خپریږي چې ټاکل شوې د همدې میاشتې په پای کې د دوحې غونډه جوړه شي او د ملګرو ملتونو ځانګړي راپورتر ویلي، بحثونه به یې تر ډېره د ښځو پر حقونو ور ټول وي.

امیري د ملګرو ملتونو د ځانګړي راپورتر د وروستي راپور هرکلی کړی

د افغانستان د ښځو، نجونو او بشري حقونو لپاره د امریکا ځانګړې استازې رینا امیري
د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري د ملګرو ملتونو د ځانګړي راپورتر ریچارډ بینېټ د وروستي راپور هرکلی کړی دی.

مېرمن امیري پر خپله ایکسپاڼه یا پخواني ټویټر د بینېټ دغه راپور چې پرون سه شنبه د ملګرو ملتونو د بشري حقونو شورا ۵۶مې غونډې ته وړاندې شو، پیاوړی یاد کړی دی.

په دغه راپور کې له طالبانو غوښتل شوي چې ټول هغه فرمانونه لغوه کړي چې له مخې یې د نجونو او ښځو اساسي حقونه محدود شوي دي.

دغه راپور داسې مهال د بشري حقونو شورا ته وړاندې شوی چې ټاکل شوې د همدې میاشتې په پای کې ملګري ملتونه، د طالبانو استازي او یوشمېر نور اړخونه په دوحه کې سره جرګه شي.

د ملګرو ملتونو ځانګړي راپورتر ویلي، د دوحې د غونډې بحثونه به تر ډېره د ښځو پر حقونو ورټول وي.

طالبانو د دوحې دغه غونډه د افغانستان په ګټه بللې او ویلې یې دي، یو پلاوی یې ګډون په کې کوي.

نور راوښيه

XS
SM
MD
LG