اروپايي اتحادیې په یوه ګډه اعلامیه کې د افغان ښځو او نجونو په اړه ژوره اندېښنه ښکاره کړه.
اروپايي اتحادیې دا اعلامیه له افغانستانه د امریکايي پوځیانو له وتلو او د طالبانو له واک ته رسېدو وروسته له ۱۹ نورو هېوادونو سره په ګډه خپره کړې ده.
البانیا، ارجنټاین، برازیل، کاناډا، چیلي، کولمبیا، کوسټاریکا، ایکوادور، السلوادور، هندو راس، ګواتیمالا، شمالي مقدونیا، نیوزیلنډ، ناروې، پاراګوې، سنیګال، سویس، بریتانیا او د امریکا متحدو ایالاتونو د افغان ښځو او نجونو او د هغوی د زده کړو، کار او ازاد تګ راتګ د حق په اړه اندېښنه ښوولې او ویلي یې دي، پرهغو کسانو غږ کوي چې پر افغانستان ولکه لري چې په دغه هېواد کې د ۱۴ میلیونو مېشتو ښځو ساتنه وکړي.
د ملي ټلوېزیون یوې ویاندې شبنم دوران په ټولنیزو رسنیو کې په خپره کړې ویډیو کې ویلي چې ورته ویل شوي چې نظام بدل شو او نور ښځې ټلوېزیون ته ورتلای نه شي.
اغلې دوران زیاته کړه: "زه شبنم دوران یم، له تېرو ۶ کلونو راهیسې دلته په افغانستان کې د خبریالې یا د خبرڅانګې د ویاندې په توګه دنده ترسره کوم. وروستنۍ دنده مې په ار ټي اې کې وه هلته مې هم د ویاندې په توګه کار کاوه. کله چې نظام بدل شو، ما وغوښتل چې دندې ته لاړه شم او خپل شهامت مې له لاسه ورنه کړ، خو له بده مرغه چې ما ته اجازه را نه کړل شوه. سربېره پر دې چې ما کارت هم درلود، نارینه کار کوونکو چې کارت یې درلود بریالي شول چې دفتر ته ننوځي، خو ما ته یې ګواښ وکړ چې خپلې دندې ته دوام نه شئ ورکولی ځکه چې نظام بدل شوی. نړیوال او مرستندوی که زما غږ اوري زموږ سره دې مرسته وکړي چې زموږ ژوند له ګواښ سره مخامخ دی."
په نویمه لسیزه کې طالبانو د خپلې واکمنۍ په موده کې افغان ښځې له لومړنیو بشري حقونو لکه تعلیم څخه بې برخې کړې وې، خو روانه اوونۍ د طالبانو ویاند ذبیح الله مجاهد په کابل کې په خپله لومړنۍ خبري غونډه کې ژمنه وکړه چې دوی به د ښځو حقونو ته درناوی وکړي، اجازه به ورکړل شي چې د شریعت په چوکاټ کې تعلیم وکړي او کار وکړي.
اروپايي اتحادیه وايي چې راپورونه یې ترلاسه کړي چې طالبانو هغو ښځو ته چې په بانکونو کې یې کار کاوه، ویلي چې نور کار ته ورنه شي.
