د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۷:۰۳

د تاوتریخوالي زیاتوالی؛ عبدالله او بلېنکن: د سولې خبرې دې چټکې شي


انتوني بلېنکن پرون پنجشنبه (د زمري ۱۴مه) له عبدالله عبدالله سره خبرې کړي.
انتوني بلېنکن پرون پنجشنبه (د زمري ۱۴مه) له عبدالله عبدالله سره خبرې کړي.

د امریکا د بهرنیو چارو وزیر د پنجشنبې (د زمري ۱۴مه) په ورځ د افغانستان د ملي مصالحې شورا له رییس سره د سولې د مذاکراتو او په هېواد کې د تاوتریخوالي زیاتېدو په اړه خبرې کړي دي.

د امریکا د بهرنیو چارو وزارت په یوه اعلامیه کې وايي چې انتوني بلېنکن او عبدالله عبدالله په افغانستان کې د طالبانو د حملو د دوام، د بې ګناه افغانانو د وژل کېدو او ملکیانو د بې ځایه کېدو په اړه خپګان څرګند کړ.

د اعلامیې له مخې، ښاغلي بلېنکن او ښاغلي عبدالله د افغانستان د سولې د مذاکراتو د چټکولو او یوې سیاسي حل لارې ته د رسېدو په اړه چې په کې د ښځو او اقلیتونو په ګډون د ټولو افغانانو حقونه خوندي وي، خبرې وکړې.

  • د ملګرو ملتونو فوق العاده غونډه

په همدې حال کې ټاکل شوې ده، په افغانستان کې د تاوتریخوالي د زیاتېدو په اړه د ملګرو ملتونو د امنیت شورا په فوق العاده غونډه کې د جمعې په ورځ بحث وشي.

  • افغان حکومت له دې غونډې څه تمه لري؟

د بهرنیو چارو وزارت ویاند ګران هېواد یې په اړه وايي: "د افغانستان اسلامي جمهوري دولت تمه لري چې په چټکۍ سره د تاوتریخوالي بندېدو او طالبانو د حملو درېدو په اړه بیړنۍ پرېکړه وشي. د بشري حقونو د ناورین د مخنیوي په خاطر چې د طالبانو د حملو په نتیجه کې روان دی، مخه ونیول شي. موږ تمه لرو چې د ملګرو ملتونو امنیت شورا پرېکړه وکړي چې د افغانستان د سولې مذاکرات چټک شي او په نږدې راتلونکي کې د سولې توافق ته ورسېږو."

د بهرنیو چارو وزارت ویاند ګران هېواد
د بهرنیو چارو وزارت ویاند ګران هېواد

د ملګرو ملتونو امنیت شورا فوق العاده غونډه د افغانستان پر غوښتنه جوړیږي.

د افغانستان د بهرنیو چارو وزیر محمد حنیف اتمر د روانې اوونۍ د سې شنبې په ورځ له خپل هندي سیال اېس جې شنکر سره د ټیلیفوني خبرو پر مهال د دې غونډې غوښتنه وکړه.

د افغانستان د بهرنیو چارو وزارت په وینا، اوس مهال د ملګرو ملتونو امنیت شورا دوروي مشرتابه هند پر غاړه لري.

  • اروپايي ټولنه

په همدې حال کې اروپايي ټولنې په افغانستان کې د طالبانو زیات شوی تاوتریخوالی غندلی دی.

د اروپايي ټولنې د بهرني سیاست رییس جوزېپ بورېل او د بحران اداره کولو په چارو کې د اروپايي ټولنې کمېشنر یانیز لینارچیچ پرون پنجشنبه (د زمري ۱۴مه) په یوه ګډه اعلامیه کې وویل چې د طالبانو نظامي عملیات د اختلافاتو د حل لپاره د دوحې په بهیر کې د دې ډلې له ژمنو سره په مستقیم تضاد کې دي.

د اروپايي ټولنې د بهرني سیاست رییس جوزېپ بورېل
د اروپايي ټولنې د بهرني سیاست رییس جوزېپ بورېل

په اعلامیه کې ویل شوي چې د بشري حقونو له نړیوال قوانینو سرغړونه په ځانګړي توګه د طالبانو تر کنټرول لاندې سیمو کې لکه پرته له محاکمې د ملکیانو قتل، په عام محضرکې ښځې په دُرو وهل او د تاسیساتو له منځه وړل د دې هېواد د تباهۍ لامل ګرځي.

د اعلامیې پر اساس، له دغو اقداماتو ځينې يې جنګي جنایت ګڼل کېدای شي او طالب جګړه ماران یا قوماندانان یې چې د دغو پيښو مسوول دي، باید ځواب ووايي.

وروسته له هغه چې امریکايي او د نورو ناټو غړيو هېوادونو ځواکونه د مې میاشتې په لومړۍ نېټه له افغانستانه وتل پیل شول، طالبانو په دې هېواد کې خپلې حملې زیاتې کړې.

د کندهار سپین بولدک ولسوالۍ، د هلمند ولایت لښکرګاه ښار او د هرات ښار په ګډون د دې ولایت په یو شمېر سیمو کې سختې جګړې وشوې او د راپورونو له مخې دا جګړه په ځانګړي توګه په لښکرګاه کې جګړه اوس هم روانه ده.

د افغانستان د بشري حقونو خپلواک کمېسیون د موندنو پر اساس طالبانو په دې وروستیو کې د سپین بولدک له نیولو سره د ملکیانو په وژلو او خلکو شتمنیو په لوټ او تالان لاس پورې کړ.

که څه هم طالبانو د ملکیانو د وژلو ادعاوې رد کړي دي، خو د بشري حقونو خپلواک کمېسیون په وینا تراوسه د ۴۰ قربانیانو هویت پېژندل شوی دی.

  • 16x9 Image

    ملالۍ بشیر

    ملالۍ بشير په پراګ کې د ازادې اروپا/ ازادي راډیو په مرکزي دفتر کې د افغان څانګې خبریاله او ادیتوره ده.

XS
SM
MD
LG