د هالنډ یوې محکمې د سوریې یو وګړی د سوریې د یو دولتي سرتېري په اعدام او نورو جنګي جرایمو کې د ګډون په جرم په شل کاله بند محکوم کړ.

د رویټرز خبري اژانس د راپور له مخې د محکمې د قاضیانو په حکم کې راغلي، مجرم احمد الخدر چې د ابو خدر په نامه هم پېژندل کېده د جبهه النصره په نوم د افراطي ډلې غړی و. دا ډله د سوریې د کورنۍ جګړې په لومړیو کې په دې هېواد کې د القاعده شبکې د یوې څانګې په نوم پېژندل کېده.

محکمې په خپل حکم کې ویلي دي چې د سوریې د یو ټپي شوي دولتي سرتېري د اعدام د صحنې په ویډیو کې د احمدالخدر اواز پېژندل کېږي. دا اسیر شوی ټپي سرتېری په ۲۰۱۲ میلادي کال کې اعدام شو.

د الخدر محاکمه د هالنډ د قضا له قوانینو سره سم ترسره شوه.

د هالنډ قوانین د هېواد محکمو ته صلاحیت ورکوي چې په جنګي او د بشريت پرضد په جرمونو تورن د نورو هېوادونو وګړي په هالنډ کې د استوګنې په صورت کې محاکمه کړي.

امریکا کې میشت یو افغان د وسلې د ناقانونه لرلو له امله په ۲۲ میاشتو حبس محکوم شوی دی.

د اریزونا ایالت سارنوالۍ په خپل ویبسایټ لیکلي چې ۳۰ کلن سید حیدرنجیب چې امریکا کې یې ددایمي هستوګنې غوښتنلیک رد شوی دی د ۲۰۱۸ کال د مارچ میاشتې له اتمې نیټې راهیسې امریکا کې په غیرقانوني توګه اوسیده.

دامریکا فدرالي پولیسو(FBI) په یوه ټولنیزه رسنۍ کې د نوموړي عکسونه او ویډیوګانې لیدلي چې په کې وسله له ځان سره ګرځوي.

کله چې په ۲۰۲۳ کال دهغه کور او موټر پلټل شوي نو په موټر کې یې یومیل AR-15 ډوله ټوپک او ۱۷۵ مرمی میندل شوي دي.

د پاکستان د الیکترونیکي رسنیو د تنظیم ادارې د جیو نیوز د خپرونو جواز د ۱۵ ورځو لپاره ځنډولی دی.

د یاد بنسټ د اعلامیې له مخې، دا پرېکړه د محرم میاشتې د یوې ځانګړې خپرونې له خپرېدو وروسته شوې ده. دغه اداره وايي چې ، په دې خپرونه کې داسې مذهبي تمثیلي صحنې او محتوا خپره شوې وه چې «د لیدونکو دیني احساسات زیانمنولای شي.»

د دغې پرېکړې په غبرګون کې، جیو نیوز په خپله اعلامیه کې د اېډېټ په بهیر کې تېروتنه منلې، له خپلو لیدونکو یې بښنه غوښتې او ټینګار یې کړی چې خپاره شوي انځورونه د دې شبکې د تحریري پالیسۍ او یا هم د مسلمانانو د دیني عقایدو او حساسیتونو د درناوي له تګلارې سره سمون نه لري.

د پاکستان د مطبوعاتو ادارې او جیو نیوز دواړو د خپرو شویو صحنو د جزئیاتو په اړه څه نه دي ویلي.

د ایران د بهرنیو چارو وزارت وايي چې له متحده ایالاتو سره نهايي هوکړې د رسیدو لپاره د خبرو دوام به هغه وخت ممکن وي چې واشنګټن د وروستي تفاهم‌ لیک مواد عملي کړي.

د ایران د بهرنیو چارو وزارت ویاند، اسماعیل بقایي، د سې‌شنبې په ورځ (د سرطان ۹مه) په یوه خبري غونډه کې وویل چې په راتلونکو څو ورځو کې به روان بهیر وارزول شي او د همدې ارزونې پر بنسټ به پرېکړه وشي چې د نهايي تړون لپاره خبرې په کومه بڼه او څه وخت پیل شي.

بقایي همدارنګه د ایران او امریکا ترمنځ د لاسلیک شوي تفاهم‌لیک د لومړۍ مادې په اړه وویل چې د تهران لپاره «اصلي معیار» دا دی چې واشنګټن اسرائیل دې ته اړ کړي چې پر لبنان خپل بریدونه ودروي.

هغه چې د ایران د مرکچي پلاوي ویاند هم دی، د یوې بلې پوښتنې په ځواب کې ټینګار وکړ چې پر لبنان د اسرائیل بریدونه باید ودرول شي.

اسرائیل او دتهران له ملاتړه برخمن حزب‌الله دامریکا او ایران ترمینځ د تفاهم لیک له امضاء وروسته اوربند اعلان کړی دی خو د اسرائیل ځواکونه د لبنان په جنوب کې دي او کله ناکله ددوی ترمینځ نښتې هم کیږي.

امریکا د لبنان حزب الله یو ترهګر سازمان ګڼي خو اروپايي اتحادیه ددغې ډلې یواځې پوځې څانګه ترهکره ګڼي. حزب الله د لبنان په پارلمان کې غړي لري.

د منځني خیتځ لپاره د امریکا د ولسمشر ځانکړی استازی سټیف ویتکاف د قطر پلازمینې دوحې ته روان شوی دی.

ایران بیا اعلان کړی چې امریکايي چارواکو سره د خبرو اترو هیڅ برنامه نه لري.

د امریکا ولسمشر ډونالډ ټرمپ پرون دوشنبې پر خپلې ټولنیزې پاڼې تروت سوشېل لیکي و، "امریکا د سه شنبې په ورځ له ایراني چارواکو سره په دوحه کې ګوري".

د ایران د بهرنیو چارو مرستیال وزیر کاظم غریب ابادي هغه راپورونه رد کړل چې ګواکې ایراني او امریکايي چارواکي روانه اوونۍ سره ګوري.

ټاکل شوې وه چې د جون په ۲۸مه امریکايي او ایراني چارواکي د سویس د مذاکراتو په دوام په دوحه کې خبرې اترې وکړي، خو پر ایران د امریکا وروستیو بریدونو دغه خبرې وځنډولې.

نن د جون ۳۰مه د ټولنیزو رسنیو نړیواله ورځ ده.

دغه ورځ له کورنیو، ملګرو او په نړیواله کچه د اړیکو، سوداګرۍ او د ټولنو په نښلولو کې د ډیجیټلي پلاټفورمونو رول ته ځانګړې شوې ده.

هره ورځ نژدې پنځه میلیادره خلک په نړۍ کې ټولنیزې رسنۍ کاروي.

فیسبوک، ټیک ټاک، انسټاګرام، وټساپ، یوټیوب، ټویټر او لینکډن د ټولنیزو رسنیو مشهور پلټفارمونه دي.

د ټولنیزو رسنیو ورځ د لومړي ځل لپاره په ۲۰۱۰کال کې د یوې امریکايي ویب پاڼې له لورې رامنځته شوه.

په داسې حال کې چې وینزویلا کې د ژغورنې ډلو د څلورمې ورځې لپاره د تېرې اوونۍ د زورورو زلزلو په زیانمنو شویو سیمو کې خپلو عملیاتو ته دوام ورکړ، د امریکا د ځمکپوهنې ادارې (USGS) وویل چې د پلازمینې کاراکاس په شمال کې د ریښتر په کچه ۴.۶ درجې یوه بله زلزله وشوه.

د رویټرز خبري اژانس د راپور له مخې، د وینزویلا د ملي شورا مشر، خورخه رودریګز، په ټولنیزو رسنیو کې ویلي چې تر اوسه د دې نوې زلزلې له امله د کوم زیان راپور نه دی ترلاسه شوی.

د تېرې چهارشنبې د دوه زلزلو د مړو شمیر ۱۵۰۰ کسانو ته رسیدلی او سلګونه ودانۍ نړېدلې دي.

نړیوالې ټولنې د وینزویلا لپاره پراخې مرستې پیل کړي دي.

د وینزویلا د چارواکو په وینا، تر اوسه ۲۴ هېوادونو څه دپاسه ۵۰۰ ټنه مرستندوی مواد ، ۲۷۰۰ د ژغورنې او ملاتړ ځواکونه، او شاوخوا ۸۶ د لټون او ژغورنې سپي دغه هېواد ته استولي دي.

کورنیو او نړیوالو ژغورونکو ډلو د شپې له خوا هم خپلو هڅو ته دوام ورکړترڅو مړي او ټپیان له خاورو را وباسي.

د لبنان پوځ د دوشنبې په ورځ اعلان وکړ چې د دغه هېواد د پوځ قوماندان او سیمه کې د امریکا لوړپوړي پوځي چارواکي د هغه درې اړخیز تړون د عملي کېدو په اړه خبرې کړي دي چې تېره اوونۍ د امریکا، لبنان او اسرائیل ترمنځ لاسلیک شو.

د لبنان د پوځ اعلامیه وايي، د پوځ قوماندان رودولف هیکل د امریکا د مرکزي قوماندانۍ (سینټکام) د قوماندان امیرالبحر براد کوپر سره د لبنان او سیمې د وروستیو حالاتو په اړه خبرې وکړې.

دا په داسې حال کې ده چې د لبنان دولتي رسنیو د یکشنبې په ورځ راپور ورکړ چې اسرائیل د تړون له لاسلیک دوه ورځې وروسته پر لبنان خپل بریدونه بیا پیل کړي دي.

د اسرائیلو پوځ هم ویلي چې د حزب‌الله غړي یې خپلې امنیتي سیمې ته نږدې په نښه کړي دي؛ هغه سیمه چې د لبنان خاوره کې دننه شاوخوا ۱۰ کیلومتره غځېدلې ده.

د جمعې په ورځ، لبنان او اسرائیل د امریکا په ملاتړ یو درې اړخیز تړون لاسلیک کړ چې موخه یې د جګړو پای ته رسول دي.

لبنان ژمنه کړې چې د غیر دولتي وسله‌والو ډلو د بې‌وسلې کولو او د هغوی د اړوندو جوړښتونو د له منځه وړلو له لارې به پر خپلې ټولې خاورې خپل حاکمیت بېرته ټینګ کړي، هغه اقدام چې د اسرائیلي ځواکونو د تدریجي وتلو لپاره به زمینه برابره کړي.

اسرائیل او امریکا حزب‌الله یوه ترهګره ډله بولي، خو اروپایي ټولنې یوازې د دې ډلې پوځي څانګه په تور لېست کې شامله کړې. د حزب‌الله استازي د لبنان په پارلمان کې هم حضور لري.

د امریکا ولسمشر ډونالډ ټرمپ وایي له ایران سره غونډه به چې دې هیواد یې غوښتنه کړې وه، سبا سې شنبې د قطرپه پلازمینه دوحه کې جوړه شي. هغه دا خبر نن دوشنبې پرخپلې ټولنیزې شبکې تروټ سوشال ورکړ خو نور جزیات یې ورنکړل.

خو د ایران د بهرنیو چارو مرستیال وزیر کاظم غریب آبادي د رسنیو هغه راپورونه ردکړل چې ګواکې تهران او واشنګټن به روانه اوونۍ تخنیکي خبرې اترې ترسره کړي. د غریب آبادي په خبره که څه هم د مقابل لوري د ژمنو د پلي کېدو د تعقیب په ګډون له قطر سره د معمول له مخې سلا مشورې روانې دي خو په دوحه کې د کاري ډلو د تخنیکي خبرو د ترسره کیدو په اړه راپورونه د تایید وړندي.

د روسیې ولسمشرولادمیرپوتین ومنله چې روسیه د انرژۍ له کمښت سره مخ ده. پوتین د یکشنبې په ورځ د جون په ۲۸ د واکمن ګوند، متحدې روسیې، د لوړپوړو چارواکو یوې غونډې ته وویل: "تاسو ښه خبر یاست چې چلوونکي او کاروباریان تراوسه له ستونزو سره مخامخ دي." هغه زیاته کړه: "له بده مرغه، لا هم د تیلو په سټیشنونو کې کتارونه شته."

هغه زیاته کړه: "موږ باید د ترهګریزو بریدونو اغېز پر خپلو ملکي هدفونو او زیربناوو تر ټولو ټیټې کچې ته راولو،" چې په ښکاره اشاره یې د اوکراین د ډرون وروستیو بریدونو ته وه چې د روسیې په دننه کې یې د انرژۍ پرمهمو تاسیساتو ترسره کړي دي.

اوکراین په دغو بریدونو کې د تیلو ټرمینلونه، د تیلو تصفیې خونې او پایپ لاینونه په نښه کړي دي. لږ تر لږه ۱۷ سیمو کې د پټرولو او ډیزلو د پلور لپاره اجباري محدودیتونه لګول شوې او لسګونه نورو سیمو کې د سون توکو د کمښت یا محدودیتونو راپورونه ورکړل شوي دي.

امریکا او ایران هوکړه کړې چې پر یوبل بریدونه دروي، خبرې له سره پیلوي او اجازه ورکوي چې د هرمز تنګي له لارې د کشتیو تګ راتګ په خوندي ډول دوام وکړي. دا خبره یوه امریکايي چارواکي د ازادې اروپا - ازادي راډیو ته کړې او د اکسیوس راپور له مخې ټاکل شوې چې خبرې به د قطر په پلازمېنه دوحه کې ترسره شي.

امریکايي چارواکي د جون په ۲۸مه ناوخته وویل: "د تفاهم ‌لیک د ټولو برخو په اړه تخنیکي خبرې به دوام ومومي. دواړه لوري به د اوس لپاره خپل پوځي اقدامات ودروي، او بېړۍ به وکولای شي د هرمز له تنګي څخه په ازاد او خوندي ډول تګ راتګ وکړي."

د اکسیوس د راپور له مخې، چې هغه هم د یوه امریکايي چارواکي له قوله خپور شوی، ټاکل شوې چې دواړه لوري د جون په ۳۰مه د قطر په پلازمېنه دوحه کې سره وګوري.

د ې چارواکي ویلي: "موږ پرېکړه وکړه چې ټول پوځي یا جګړه‌ ییز عملیات ودروو."

دا څرګندونې وروسته له هغې وشوې چې ایران، د امریکا له ‌خوا پر دغه هېواد د بریدونو او د خپلې ادعا له مخې د وروستي هوکړه‌ لیک څخه د سرغړونو په غبرګون کې د جون په ۲۸مه له امریکايي مذاکره کوونکو سره له مخکې ټاکل شوې لیدنې ته له حاضرېدو ډډه وکړه.

د ایران د ستر مشر د دفتر چارواکي مهدي فاضلي وویل. " یو له لاملونو دادی چې موږ دې ته ځیریو چې ایا کنګل شویو پیسو ته لاسرسی لرو که نه. که لاسرسی نه وي، نو دا شرط نه دی پوره شوی." سمدستي نورجزییات ندي خپاره شوي.