د کابل په لوېدیځ کې وروستیو بمي چاودنو او بریدونو په نړیواله کچه اندېښنې راپارولې دي.
تازه د بشر حقونو څار نړیوال بنسټ وايي چې دوی په افغانستان په ځانګړي ډول په پلازمېنه کابل کې د زیاتېدونکي تاوتریخوالي په اړه ژوره اندېښنه لري او دا په داسې حال کې کېږي چې نړیواله ټولنه له افغانستانه په وتو ده.
د بشر حقونو د څار بنسټ د ښځو برخې مسؤلې هیدر بار د جمعې په ورځ «۱۴۰۰ کال د غبرګولي ۱۴» ازادي راډیو ته وویل: "موږ د زیاتېدونکي تاوتریخوالي په تړاو د هغو بدو خبرونو په اړه چې له افغانستانه، له کابله او له ټول هېواده راځي ژوره اندېښنه لرو. په حقیقت کې دغه حملې په ځانګړې توګه هزاره توکمه هدف ګرځوي، پر روزنیز بنسټونو زیاتېدونکې حملې دي لکه څو اوونۍ وړاندې چې په دشت برچي کې وشوه او دغهراز هغه حملې چې ښځې او نجونې هدف ګرځوي. زموږ تر ټولو لویه اندېښنه دا ده چې دا داسې مهال پېښېږي چې نړیواله ټولنه له افغانستانه په وتو ده، تاوتریخوالی په زیاتېدو دی او د نړیوالې ټولنې په شمول هېڅوک هم دې ته پام نهکوي او لېوالتیا نهلري. دا ډېر اندېښمنوونکی وضعیت دی."
تازه تېره ورځ د کابل د شپږمې حوزې اړوند د چهار قعله چهاردهي او د پل سوخته په سیمو کې د ملکیانو د سپرلیو په دوه ښاري ټونس موټرو چاودنې وشوې چې له املهیې څلور تنه ووژل شول او شپږ نور ټپیان شول.
له دې وړاندې هم په ورته دوه پېښو کې چې په کاستر موټرو وشوې ۱۰ ملکیان ووژل شول او ۱۲ نور ټپیان شول.
دا په داسې حال کې چې په وروستیو میاشتو کې د افغانستان په بېلابېلو سیمو کې د ناامنۍ پېښو زور اخیستی چې له املهیې د ملکي مرګژوبلې کچه لوړه شوې ده.
پنځه ورځې وړاندې د کابل په ګاونډ پروان کې د البیروني پوهنتون د استادانو او محصلینو په کاستر موټر په شوې ماین چاودنه کې د استادانو او محصلینو په ګډون څلور تنه ووژل شول او ۱۲ نور ټپیان شول.
دغهشان وخت نا وخت له هلمند او کندهاره هم د ملکیانو پر موټرو د چاودنو له امله د مرګژوبلې راپورونه ورکول کېږي.
په ورته وخت کې کابل ښاریان په ځانګړې توګه د کابل د لوېدیځ ځیني اوسېدونکي هم وروستیو بریدونو او چاودنو اندېښمن کړي دي.
د دوی له ډلې عبدالله میرزايي وايي: "موږ سخت اندېښمن یو، څوک چې دندنې لري، په دې وېره کې دي چې مرګونی برید ورباندې ونهشي، هېڅ سړی نهپوهېږي چې څه وکړي، له هر موټره ډارېږي چې اوس به چاودنه پهکې وشي، موږ اندېښمن یو."
په همدې حال کې د افغانستان د کورنیو چارو وزارت وايي چې په سیدالشهدا ښوونځي له خونړۍ موټر بم حملې وروسته ولسمشر د جمهوري ریاست دوهم معاونیت ته د یوې هر اړخېزې امنیتي طرحې د چمتو کولو لارښونه کړې.
د افغان ولسمشر دوهم مرستیال سرور دانش ویلي چې د کابل د لوېدیځ خلک د ترورېزم له ګواښ سره مخ دي او هره ورځ د جمهوریت د ساتنې لپاره قرباني ورکوي.
د ښاغلي دانش د دفتر د مطبوعاتو او اړیکو د دفتر رئیس محمد هدایت ازادي راډیو ته وویل چې له عامو خلکو، دیني عالمانو، د خلکو له استازو او نورو اړوندو بنسټونو سره له سلا مشورو وروستهیې امنیتي طرحه چمتو کړې او تېره اوونۍ یې جمهوري ریاست ته د څېړنې او تأیید لپاره استولې ده.
ښاغلی هدایت زیاتوي: "طرحه چمتو شوې تېره اوونۍ جمهوري ریاست ته وسپارل شوه، د دې طرحې عاجلې برخې د ولسمشر له هدایت سره سم د اجرا وړ دي، اصلي او ټولهییزه طرحه د جمهوري ریاست او امنیت شورا تر څېړنې لاندې ده، تمه ده چې پراختیا پیدا کړي او بشپړه د اجرا وړ وي."
په ورته وخت کې، په امنیتي او سیاسي چارو کې د افغان ولسمشر ارشد سلارکا محمد محقق بیا په خپله فېسبوک پاڼه لیکلي چې د خلکو د دښمنانو له لوري په دشت برچي کې هره ورځ د ملکیانو په موټرو جنایتکارانه پېښې ترسره کېږي.
ښاغلی محقق لیکي: "د ملي امنیت له لوري د کابل لوېدیځ لپاره د امنیتي طرحې رد کېدل، د خلکو په عمومي افکارو کې پوښتنې راولاړې کړي چې باید د خلکو د امنیت لپاره سم امنیتي تدابیر ونیول شي."
خو محمد هدایت که څه هم د امنیتي محرمیت له امله د طرحې په اړه زیات جزئیات نهورکوي، خو زیاتوي چې دغه طرحې دوه بنسټیزې برخې لري، یو د کابل په لوېدیځ کې د امنیتي او کشفي بنسټونو ظرفیت لوړول او دوهم دا چې په امنیت کې نېغ په نېغه خلکو ته ونډه ورکول دي.
