د افغانستان د کډوالو او راستنېدونکو چارو وزارت وايي، د روان لمریز کال له پیله د ناامنیو او جګړو له کبله په زرګونو کورنۍ بې ځایه شوي دي.
د دغه وزارت مطبوعاتي سلاکار او ویاند عبدالباسط انصاري ازادي راډیو ته وویل: "د ۱۴۰۰ لمریز کال له پیله په بېلابېلو ولایتونو لکه بغلان، لغمان، هلمند، کندهار او نورو ولایتونو کې د جګړې او ناامنیو له کبله شااو خوا ۶۰۰۰ کورنۍ بې ځایه شوي دي."
ښاغلی انصاري وايي، سږکال د جګړو له کبله له ۱۱۷۰۰ بې ځایه شوېو کورنیو سره د وزارت له خوا وړ مرستې شوي دي.
بل خوا په کابل کې د امریکا د متحدو ایالاتونو د سفارت شارژدافېر او سرپرست له طالبانو غوښتنه کړې چې اوربند ته غاړه کښېږدي.
راس وېلسن پرون سې شنبه (د غبرګولي ۴مه) په یوه ټویټ کې له طالبانو غوښتي چې د افغان ځواکونو او ملکي افغانانو پر وړاندې خپلې حملې بندې کړي.
ښاغلي وېلسن له طالبانو غوښتنه کړې چې د جګړې پرځای دې د سولې لپاره د مذاکرو مېز ته راشي.
راس وېلسن د کورنیو چارو وزارت د معین صدیق صدیقي، د یوه ټویټ له بیاخپرولو سره دا خبره کړې چې په لغمان کې تر سختې جګړې وروسته ځینې نجونې په عکسونو کې ښکاري چې د کانکور ازموینې ته ناستې دي.
په تېرو څو ورځو کې د لغمان ولایت تر څنګ د افغانستان له ګڼو ولایتونو د جګړو راپورونه ورکړل شوي دي.
د وسله والو جګړو تر څنګ په افغانستان کې په هدف وژنو کې د ځینو چارواکو، فعالانو، خبریالانو او سیاستوالو وژنې هم زیاتې شوي دي.
د بشري حقونو ۱۷ فعالان په افغانستان کې وژل شوي
د بشري حقونو د څار نړیوال سازمان د شمېرو پر اساس د ۲۰۲۰میلادي کال له سېپټمبر څخه د روان میلادي تر مې میاشتې پورې د بشري حقونو ۱۷ فعالان په افغانستان کې وژل شوي چې د ازادي راډیو د خبریال محمد الیاس داعي په ګډون په کې ۹ خبریالان هم شامل دي.
د افغانستان د بشري حقونو خپلواک کمېسیون د اطلاعرسونې مسوول محمد رضا جعفري پرون سې شنبه (د غبرګولي ۴مه) ازادي راډیو ته وویل: "هدفي وژنو د ملکیانو د قرباني کولو ترڅنګ په هېواد کې د وېرې او نهیلۍ فضا خپره کړې ده. له بده مرغه د دغسې حملو عاملان نه پېژندل شوي او نه مجازات شوي دي؛ په دې برخه کې د حکومت ځواب هم قناعتورکوونکی نه دی. د افغانستان د سولې او جګړې ټول ښکېل لوري د خبریالانو، مدني او د بشري حقونو د فعالانو او ملکیانو پر وړاندې مسوول دي."
په افغانستان کې د ناامنیو پېښې په داسې حال کې زیاتې شوي چې له افغانستانه د امریکايي او ناټو ځواکونو وتل د مې میاشتې له لومړۍ نېټې پیل شوي او د سېپټمبر تر ۱۱مې دوام کوي.
د ناټو سرمنشي ینس سټولټنبرګ پرون سې شنبه وویل، له افغانستانه د بهرنیو ځواکونو وتل په منظم ډول روان دي.
ده ویلي، ناټو تړون په عین حال کې له افغانستان سره خپل شراکت او د همکاریو دوام ته ژمن دی.
د امریکا د دفاع وزارت ویاند جان کربي د دوشنبې په ورځ ویلي وو، له افغانستانه د امریکايي ځواکونو وتل د افغانستان د یوازې پرېښودو په معنی نه دي.