د لاسرسۍ وړ لېنکونه

تازه خبر
سه شنبه ۲۱ غویی ۱۴۰۰ کابل ۰۷:۰۸

دفاع وزارت: د بهرني ځواکونو وتل عملاً پیل شوي، د سیمو د تسلیمۍ په حال کې یو


آرشیف، یو شمېر امریکايي سرتیري

د افغانستان دفاع وزارت وايي چې بهرنیو ځواکونو د امریکا د ولسمشر جوبایډن د اعلان پربنسټ د مې میاشتې په لومړۍ ورځ له افغانستانه د وتلو کار پيل کړ.

د دغه وزارت سرپرست یاسین ضیا د شنبې (د غويي ۱۱مه) په ورځ د ملي امنیت له سلاکار حمدالله محب سره په ګډه خبري ناسته کې وویل چې ممکن بهرنیان سبا په هلمند کې د شورابک اډه افغان امنیتي او دفاعي ځواکونو ته وسپاري.

ښاغلي ضیا په دې اړه وویل: "د بهرني ځواکونو د وتلو کار عملاً پیل شوی، ممکن د اوونۍ تر پایه سیمې راته تسلیم کړي، البته ناټو او امریکايي ځواکونه، موږ د ساحاتو د تسلیمۍ په حال کې یو، یو په بل پسې ساحات تخلیه کوي، اصلي اډې یعنې بګرام کې راټول شوي او له هغه وروسته خپلو هېوادونو ته ستنېږي."

د افغانستان دفاع وزارت سرپرست یاسین ضیا
د افغانستان دفاع وزارت سرپرست یاسین ضیا

دا په داسې حال کې ده چې د افغانستان د ملي امنیت سلاکار حمدالله محب په یاده ناسته کې د دې پوښتنې په ځواب کې چې طالبانو له تېر یوه کال راهیسې د بهرنیو ځواکونو د ځینو اډو ساتنه کوله وویل، د دې موضوع په اړه اطلاع نه لري.

خو زیاته یې کړه، که دا خبره رښتیا وي، نو طالبان قدرت غوښتونکي دي، ممکن دغه کار یې کړی وي.

له دې وړاندې رویټرز اژانس د دې امریکايي چارواکو له قوله راپور ورکړی و، د امریکا او طالبانو ترمنځ د یوې پټې هوکړې پر بنسټ، دغې ډلې په تېر یوه کال کې د امریکايي ځواکونو له اډې ستانه کړي.

د افغانستان د ملي امنیت سلاکار حمدالله محب
د افغانستان د ملي امنیت سلاکار حمدالله محب

تر اوسه طالبانو په دې اړه څه نه دي ویلي.

خو په قطر کې د طالبانو د سیاسي دفتر ویاند محمد نعیم ازادي راډیو ته په لیکلي پيغام کې ویلي، د دوحې د هوکړې پر بنسټ باید بهرني ځواکونه د مې تر لومړۍ نېټې له افغانستانه وتلي وای، خو دا چې دا بهیر وروسته شو له شوې هوکړې ښکاره سرغړونه ده.

ښاغلي نعلیم لیکلي، دغه سرغړونه په اوصولو کې به پر امریکا د طالبانو هر اقدام ته لاره خلاصه کړي، خو د نوموړي په خبره دوی دې برخه کې د رهبرۍ لارښونې ته منتظر دي، هغه لارښونې ته چې د هېواد ملي ګټې په کې نغښتې وي.

په ورته وخت کې د افغانستان د سولې او جګړې انسټیټیوټ د مطالعاتو رئیس تمیم عاصي وايي، ښکاري داسې چې د بهرنیو ځواکونو د وتلو له بهیر سره په افغانستان کې ښایي جګړې تېزې شي.

د افغانستان د سولې او جګړې انسټیټیوټ د مطالعاتو رئیس تمیم عاصي
د افغانستان د سولې او جګړې انسټیټیوټ د مطالعاتو رئیس تمیم عاصي

ښاغلي عاصي زیاته کړه: "موږ داسې لاسوندونه وینو چې طالبان او افغان دولت د جګړې فصل لپاره زور ازمویلو ته چمتوالی نیسي چې له بده مرغه د وینو توېدو لامل به شي، سوله به شاته ولوېږي او جګړه به د سیاست او ستراتیژي د عنوان په اصل دواړو لورو ته باقي پاتې شي."

په ورته وخت کې له افغانستانه د بهرنیو ځواکونو د وتلو د بهیر له پیل سره القاعده شبکې ګواښ کړی چې د امریکایانو پر وړاندې به جګړې ته دوام ورکړي.

له بلې خوا، تېره ورځ امریکا، روسې، چین او پاکستان (ترویکا) ناسته چې قطر کې د طالبانو د سیاسي دفتر استازي هم په کې ګډون کړی وو، جوړه شوه.

له ناستې وروسته د دغو څلورو هېوادونو ځانګړیو استازو په یوه خوله له افغان حکومت او طالبانو د سولې غوښتنه وکړه.

په ګډه اعلامیه کې راغلي، پر طالبانو د ملګرو ملتونو سازمان له لوري په وضع شوېو بندیزونو باندې به غور کوي.

په اعلامیه کې همدا شان د ترکیې د ناستې بهیر په چټکتیا ټینګار شوی او د سولې مذاکراتو له دواړو اړخونو غوښتل شوي، سیاسي جوړ جاړي او پراخ او تل پاتې اوربند لورته دې ګامونه واخلي.

XS
SM
MD
LG