د ټیکټاک کمپنۍ وایي، د اروپایي ټولنې د اندېښنو لیرې کولو لپارهیې ځیني اقدامات کړي دي.
ټیکټاک یو اپلېکېشن دی چې ځوانان ورځخه د لنډو وېډیوګانو په جوړولو کې ډېر کار اخلي.
د ټیکټاک کمپنۍ غواړي اروپایي څېړونکو او پالېسۍ جوړوونکو ته اجازه ورکړي چې د خپلو وېډیوګانو پر جوړولو او محتوا یې څارنه وکړي.
ټیکټاک نن سې شنبه دغه اعلان وکړ او ویېویل چې دغه اقدام د دې لپاره کوي چې د دې شبکې د ځوانو کاروونکو د خصوصي حریم او امنیت په اړه د اروپایي چارواکو اندېښنو ته ځواب ووایي.
د روېټرز د راپور له مخې ټیکټاک به د شفافیت او حساب ورکونې یو مرکز پرانیزي.
ټیکټاک یوه چینایي کمپنۍ ده چې په اروپا کې له ۱۰۰ ملیون زیات کاروونکي لري.
د کرونا وبا له خپرېدو سره له ټیکټاک څخه په تېره بیا ځوانان ډېره استفاده کوي.
د دې کمپنۍ یوه جګپوړي چارواکي کورماک کیناک روېټرز ته ویلي چې د خلکو او ټولنې د اعتماد د جلبولو لپاره خپل مسؤلیت درک کوي او په دې برخه کې یې هڅې زیاتې کړې دي.
تېره اوونۍ په لندن کې پر دې کمپنۍ سخت انتقاد وشو چې د ماشومانو د خصوصي حریم په ساتلو کې پاتې راغلی دی.
په متحده ایالاتو کې بیا پر ټیکټاک تور پورې شوی چې د خپلو کاروونکو په اړه معلومات د چین له دولت سره شریکوي، هغه تور چې دې کمپنۍ رد کړی دی.
تېر کال د امریکا کانګرس د رایو په اکثریت هغه لایحه تصویب کړه چې پر اساسیې دولتي کارکوونکي نهشي کولای چې له ټیکټاک اپلېکېشن څخه کار واخلي.
