د لاسرسۍ وړ لېنکونه

تازه خبر
چهارشنبه ۲۹ غویی ۱۴۰۰ کابل ۰۴:۲۳

خبریاله انیسه شهید د بیان د ازادۍ د څېرې په نوم ونومول شوه


خبریاله انیسه شهید

د افغانستان د بیان ازادۍ کور د شنبې (د وري ۲۸مه) په ورځ انېسه شهید د ۱۴۰۰ کال د افغانستان د بیان د ازادي د څېرې په نوم نوموله.

اغلې شهید ته دغه جایزه د هغو خبریالانو د کورنیو له خوا ورکړل شوه چې دې وروستیو کې په هدفي وژنو کې وژل شوي دي.

د ازادي راډیو د وژل شوي خبریال الیاس داعي ورور هم اغلې شهید ته په جایزه ورکوونکو کې شامل و.

دغې جایزې ته ۱۷۰۰ خبریالان نومول شوي وو چې په انلاین ډول ورته د دوی د خوښوونکو له خوا رایې ورکول کېدې چې د څو پړاونو تر بشپړېدو وروسته د طلوع نیوز خبریالې اغلې انیسه شهید په کې دا جایزه خپله کړه.

هلمند کې وژل شوی خبریال الیاس داعي
هلمند کې وژل شوی خبریال الیاس داعي

خو لسو غورو خبریالانو ته د ازادي راډیو وژل شوي خبریال الیاس داعي هم چې دې جایزې ته کاندید و، لاره پیدا کړې وه.

په دغه جایزه کې ۵۰۰۰ دالره هم شامل وو.

دا انتخابي بهیر د اوو ارزونکو له خوا چې د بیان د ازادۍ د کور له خوا انتخاب شوي وو څارل کېده.

د څارونکو په خبره دغې جایزې لپاره مسلکي توب، اغېزمن کار، مېړانه او له خبریالۍ سره وفاداري معیارونه ټاکل شوې وو.

د بیان د ازادۍ کور د یو شمېر خبریالانو او د مسوولینو د رسنیو له خوا جوړ شوی دی.

د دغه کور یو غړي او د شمشاد نیوز مسؤل، عابد احساس د یادې جایزې په اړه ازادي راډیو ته وویل: "د دغه کور له خوا د بیان د ازادۍ د څېرې د انتخاب پروګرام ترسره شو چې انیسه شهید د کال د بیان د ازادۍ د غوره څېرې په توګه انتخاب شوه. دغه کور به د خبریالانو کور وي، د هغو خبریالانو چې عملاً په رسنیو کې کار کوي."

دغه بنسټ په همدغه ورځ د یوې خبرپاڼې په خپرولو سره د سولې خبرو په پای ته رسېدو سره د بیان ازادۍ او خبریالانو د ژوند په خوندیتوب ټینګار وکړ.

د افغانستان د بیان ازادۍ د کور په خبرپاڼه کې راغلي چې رسنۍ باید د سولې خبرو اترو جزئیاتو ته لاس رسی ولري او ترڅنګ یې د رسنیو او مدني ټولنو استازي باید د سولې په مذاکراتو کې حضور ولري.

په خبرپاڼه کې راغلي چې اطلاعاتو ته د لاسرسي قانون، د ډله ییزو رسنیو قانون او د بیان ازادۍ تضمین لپاره باید یو حقوقي چوکاټ رامنځ ته شي.

په ورته وخت کې د افغانستان د اطلاعاتو فرهنګ وزار سرپرست طاهر زهیر وویل چې بیان ازادي او رسنۍ د افغانو لپاره یو د پام وړ لاسته راوړنه شمېرل کېږي.

د افغانستان د اطلاعاتو فرهنګ وزار سرپرست طاهر زهیر
د افغانستان د اطلاعاتو فرهنګ وزار سرپرست طاهر زهیر

ښاغلي زهیر زیاته کړه: "دا یوه منل شوې لاسته راوړنه ده چې ټول ورباندې اجماع لري، په دې کې د بیان ازادي، د میډیا وده او د چاپي رسنیو پراختیا او نور شامل دي، دا د ملت - دولت او په افغانستان کې د هرچا لاسته راوړنه ده."

له ازادو رسنیو نه د ملاتړ ادارې 'نی' اجرائیوي رئیس مجیب خلوتګر بیا اندېښنه لري چې د بهرنیو ځواکونو له وتلو وروسته به د جګړې دوام د رسنیو فعالیت له ستونزو سره مخ کړي: "که موږ د جګړې د دوام شاهدان ووسو د بیان ازادي، د خبریالانو او رسنیو ازادي له ستونزو سره مخ کېږي، هیله ده چې له ټولو ارزښتونو و د بیان د ازادۍ له ارزښت ملاتړ وشي."

د 'نی' اجرائیوي رئیس مجیب خلوتګر
د 'نی' اجرائیوي رئیس مجیب خلوتګر

دا اندېښنې په داسې حال کې مطرح کېږي چې په څو وروستیو میاشتو کې پر خبریالانو، د رسنیو پر کارکوونکو او مدني فعالانو بریدونه زیات شوي دي.

افغان حکومت طالبان د دغه بریدونو مسؤل ګڼي، خو طالبانو تل دا ادعاوې رد کړي او ویلي یې دي چې دې بریدونو کې لاس نه لري.

XS
SM
MD
LG