د لاسرسۍ وړ لېنکونه

تازه خبر
جمعه ۲۷ وری ۱۴۰۰ کابل ۰۹:۵۰

د ایغوریانو ځپل؛ اروپايي ټولنې پر ۴ چینایي چارواکو او یوه بنسټ بندیزونه ولګول


ارشیف، د چین په اورمچي کې ایغوریان

اروپایي ټولنې پر څلورو چینایي چارواکو د دې لپاره بندیزونه ولګول چې په باور یې دغو کسانو په ایغور ایالت کې د مېشتو مسلمانانو حقونه تر پښو لاندې کړي دي.

له دې وړاندې د بشري حقونو بېلابېلو بنسټونو داسې مستند راپورونه خپاره کړي چې د چین له خوا د ایغور مسلمانانو شکنجه، اجباري کارونه، شدید کنټرول او ځپل په کې ښکاري.

د ملګروملتونو د موندنو له مخې، د چین په شېن جېن ایالت کې نژدې یو میلیون ایغور او نور لږکي مسلمانان نیول شوي او په کمپونو کې ساتل کېږي.

دې کمپونو کې ایغوریان ساتل کیږي
دې کمپونو کې ایغوریان ساتل کیږي

د اروپایي ټولنې رسمي جریدې پرون دوشنبه (د وري ۲مه) پر دغو چینایي چارواکو د بندیزونو خبر خپور کړ.

دغو چارواکو کې چې د سفر بندیزونه پرې لګیدلي او پانګې یې کنګل شوي د ایغور ایالت د امنیتي بیرو عمومي مدیر چن منګ ګوو، د استازو جرګې مرستیال ژوهي لون او د شین جین ایالت دوه نور چارواکي وانګ منګشان او وانګ جون ژانګ شامل دي.

د اروپایي ټولنې په رسمي جریده کې لیکل شوي چین د ایغور مسلمانانو د خپل سره توقیف، هغوی سره د سپک چلند او دغه راز د مسلمانانو د عقایدو او مذهبي ازادیو د محدودولو په خاطر ملامت دی.

اروپایي ټولنې ویلي، د شېن جېن د امنیت عمومي بیرو یا اداره هم د بندیزونو تر هدف لاندې ده، ځکه د دوی په وینا دا بیرو د مسلمانانو د کمپونو په مدیریت او د نورور سیاستونو په پلي کولو تورنه ده.

یو ایغوري سره د چین د پولیسو تاوتریخوالی
یو ایغوري سره د چین د پولیسو تاوتریخوالی

پېکېنګ هم په غچ اخېستونکي اقدام کې سملاسي د اروپایي ټولنې پر لسو چارواکو او څلورو بنسټونو بندیزونه ولګول.

چین دغه کسان په شېن جېن ایالت کې د چین حاکمیت او ګټو ته په زیان اړولو تورن کړي دي.

د چین د بهرنیو چارو وزارت په یوه خبرپاڼه کې له اروپایي ټولنې غوښتي چې "خپله تېروتنه اصلاح کړي" او د چین په کورنیو چارو کې لاسوهنه ونه کړي.

چین له ایغور مسلمانانو سره د هر ډول ناوړه چلند تورونه رد کړي او ویلي یې دي، په کمپونو کې هغوی ته له سخت دریځۍ او افراطیت سره د مبارزې روزونه ورکول کېږي.

XS
SM
MD
LG