د لاسرسۍ وړ لېنکونه

تازه خبر
شنبه ۲۸ وری ۱۴۰۰ کابل ۰۶:۲۰

افغان حکومت ته د خلیلزاد له لوري 'سپارل شوې طرحه' کې کوم موارد شامل دي؟


ارشیف، د جمهور رئیس غني او زلمي خلیلزاد لیدنه

د افغانستان سولې د خبرو د چټکتیا لپاره تازه او نوې هڅې، په داسې حال کې چې د افغان سولې لپاره د امریکا ځانګړی استازی زلمی خلیلزاد په کابل کې له افغان سیاستوالو سره په خبرو بوخت دی.

د امریکا د بهرنیو چارو وزارت یو لوړپوری چارواکی وايي چې زلمي خلیلزاد کابل ته په خپل سفر کې افغان حکومت ته داسې طرحه سپارلې، که ومنل شي، له مخې به‌یې د ملګرو ملتونو په منځګړیتوب د با نفوذه هېوادونو، حکومتي چارواکو او له حکومته بهر سیاسي مشرانو په ګډون په لوړه کچه يو ناسته جوړه شي.

د هغه په وينا دا ناسته به د افغانستان سولې پروسې او راتلونکي په اړه بحث وکړي او نقشه وکاږي.

دا لوړپوړی چارواکی چې د موضوع د حساسيت له کبله نه‌غواړي نوم‌يې واخيستل شي وايي د دوحې روانې خبرې امريکا ته مهمې دي، خو امریکا غواړي چې افغان لوری ډېر ژر اوربند او سیاسي حل‌لارې ته ورسېږي.

په قطر کې د بین‌الافغاني خبرو پرانیست غونډه
په قطر کې د بین‌الافغاني خبرو پرانیست غونډه

دغه چارواکی ټینګار کوي چې د افغانستان په سوله کې باید د ملګرو ملتونو رول پیاوړی شي او د همکارۍ لپاره دغه سازمان باید د افغان سولې لپاره یو استازی وګماري.

د امریکا د بهرنیو چارو وزارت دا لوړپوړی چارواکی وايي، د دې طرحې پر بنسټ ملګري ملتونو بايد د افغانستان د سولې بهیر لپاره يوه سيمه‌یيزه او نړيواله اجماع رامنځته کړي.

د دې چارواکي د خبرو پر بنسټ، زلمی خليلزاد به سبا پنجشنبه قطر ته ولاړ شي او دا طرحه به له طالبانو سره هم شريکه کړي.

افغان حکومت تر اوسه د امریکا د بهرنیو چارو وزارت د دغه چارواکي او د خلیلزاد له لوري ورته د سپارل شوې طرحې په اړه د ازادي راډیو پوښتنو ته ځواب نه‌دی ویلی.

په ورته وخت کې د افغانستان په ملي مصالحې عالي شورا کې یوه باخبره سرچینه هم وايي چې زلمي خلیلزاد له افغان چارواکو او سیاستوالو سره د حکومت د جوړښت نوې طرحه مطرح کړې ده.

دغه سرچينه چې نه‌یې غوښتل د موضوع د حساسیت له امله نوم او غږ یې خپور شي، وايي چې دا نوې طرحه د مشارکتي حکومت طرحه نه‌ده، بلکې د سولې د خبرو د چټکیا او سولې ته د رسېدو لپاره وړاندې شوې ده.

د افغانستان د سولې لپاره د امریکا ځانګړی استازی زلمی خلیلزاد لا هم په کابل کې دی او له جمهور رئیس غني سربېره‌یې عبدالله عبدالله او افغان مطرحو سیاستوالو سره خبرې کړي.

د عبدالله عبدالله او زلمي خلیلزاد لیدنه
د عبدالله عبدالله او زلمي خلیلزاد لیدنه

له دې وړاندې داسې راپورونه خپاره شول چې زلمي خلیلزاد له افغان چارواکو او سیاستوالو سره د ملي مشارکتي حکومت طرحه شریکه کړې ده.

د افغان سولې لپاره د امریکا ځانکړی استازی وړمه ورځ کابل ته راغلی، په کابل کې يې له افغان چاراکو سربېره له ځینو مطرحو سیاستوالو سره هم ناستې پیل کړې.

تېره ورځ زلمي خلیلزاد د جمعیت ګوند له مشر صلاح‌الدین رباني، پخواني جهادي رهبر عبدرب رسول سیاف، د جنبش ګوند له مشر عبدالرشید دوستم، د وحدت ګوند له مشر کریم خلیلي او همدا شان د خلکو د وحدت ګوند له مشر محمد محقق سره هم کتلي.

وړمه ورځ بيا ښاغلي خليلزاد له جمهور رئیس محمد اشرف غني او د نوموړي له دوو مرستیالانو سربېره د ملي مصالحې عالي شورا رئیس او پخواني ولسمشر حامد کرزي سره کتلي.

د ولسمشر لومړي مرستیال امرالله صالح نن په خپل فېس‌بوک پاڼه لیکلي، د ښاغلي خلیلزاد په مشرۍ دوه غونډې مو چې له امریکايي پلاوي سره درلودې، د سولې بهیر د دوه اړخیزو اړیکو په پیاوړتیا او دا چې څه ډول د ټولو افغانانو رښتینې اراده د سولې په بهیر کې تمثیل شي، خبرې وکړې.

د ښاغلي صالح په خبره، د افغانستان اسلامي جمهوري نظام اساسي قانون دی چې مستقیم د خلکو په رایو جوړ شوی، هېڅوک د اساسي قانون د لغوه او باطل کولو صلاحیت نه‌لري.

XS
SM
MD
LG