د امریکا د کورني امنیت وزارت د کورنیو حکومت ضد افراطیانو له لوري بالقوه ګواښ ته په اشارې په ټول هېواد کې د ترورېزم په وړاندې خبرداری ورکړ.
دغه وزارت د کانګرس پر ودانۍ د پخواني ولسمشر ډونالد ټرمپ د پلویانو برید ته په اشارې ویلي چې د امریکا په هره برخه کې د افراطیانو له لوري پر دولتي چارواکو د برید خطر شته.
دغه وزارت پرون (چهارشنبه) ویلي چې د کومې ځانګړې دسیسې په اړه معلومات نهلري، خو په دې اندېښمن دی چې هغه کسان به ممکن تاوتریخوالي ته مخه کړي چې د ولسمشرۍ د واک پر انتقال خوابدي دي.
د متحده ایالاتو د کورني امنیت وزارت په یوه خبرپاڼه کې ویلي "حاضر دمه د امریکا په متحده ایالاتو کې په لوړه کچه د ګواښ چاپېریال رامنځته شوی چې ښايي په راتلونکو اوونیو کې هم دوام وکړي."
دا خبرداری د ولسمشرۍ د انتخاباتو د پایلو د بدلولو په خاطر د پخواني ولسمشر ډونالد ټرمپ د غصه پلویانو له لوري د کانګرس پر ودانۍ له یرغله وروسته په ترینګلي وخت کې ورکول کېږي.
داسې اندېښنې هم شته چې افراطیان ښايي پر منتخبو چارواکو او حکومتي مأمورینو حملې وکړي.
په استازو جرګه کې د ډیموکرات ګوند د مسي سي پي استازي او د دې جرګې د کورني امنیت د کمېټې رئيس بیني تامپسن وویل، د کانګرس پر ودانۍ کورني ترورېستي برید دا خبرداری لا څرګند کړ چې دا ډول خطر به په کلونو زموږ مخته وي.
د استازو جرګې، پخوانی ولسمشر دونالډ ټرمپ تورن کړی چې خپل پلویان یې پر کانګریس بلوسې ته هڅولي وو.
