په افغانستان کې د پولیو یا ګوزڼ ضد واکسین کمپاین پیل شو.
د خوست ولایت د صبرۍ ولسوالۍ اوسېدونکی ولایت خان وایي ، ۱۴ میاشتنۍ خورزه یې عالیه چې د مور او پلار یوازینی اولاد دی تازه ګوزڼ وهلې ده.
ولایت خان ازادي راډیو ته وویل، د کوچنۍ عالیه یوپښه فلج ده او له دې امله ټوله کورنۍ ورته اندېښمنه ده.
هغه زياتوي: "ډېر ورته خفه یو، ډاکترانو یوازې پېښه ثبت کړه خو بل اقدام یې نه دی کړی، دا راته وایي چې درمل به درکړو خو ګټه نه کوي."
ولایت خان وایي، چې په ګڼو ډاکترانو او روغتونونو يې خپله خورزه ګرځولې خو مسوولینو ورته ویلي چې ګوزڼ درملنه نه لري.
د همدې ناروغۍ د مخنیوي لپاره نن دوشنبه په ټول افغانستان کې د ګوزڼ ضد واکسین د تطبیق کمپاین پیل شو.
د افغانستان د عامې روغتیا وزارت د کلتوي معافیت مشر غلام دستګیر نظري ازادي راډیو ته وویل، چې د دې کمپاین په لړ کې به ٩ اعشاریه ۵ میلیونه هغو ماشومانو ته د پولیو ضد واکسین تطبیق شي چې عمرونه یې له پنځو کلونو ټیټ دي.
هغه وویل: "زموږ کمپاین نن په ټول افغانستان او 34ولایتونو کې پیلېږي، دا مو ژمنی کمپاین دی او هدف موږ هم ۹ اعشاریه ۵ ميليونه ماشومان دي چې باید د پولیو ضد واکسین ورته تطبیق شي."
ښاغلی نظري وايي، له ۲ اعشاریه ۵ مېیلونه زیات ماشومان به د هېواد په بېلابېلو ولسوالیو کې هلته چې د طالبانو تر ولکې لاندې دي او کور په کور د ګوزڼ ضد واکسین د تطبیق اجازه نه کېږي، له واکسین پاتې شي.
د ده په خبره، د ختیځ او جنوبي ولاینونو یو شمېر ولسوالیو کې دا شمېر ماشومان له یاد واکسین نه بې برخې کېږي.
دا کمپاین پنځه ورځنی دی.
خو په قطر کې د طالبانو سیاسي دفتر ویاند محمد نعیم پر ټویټر لیکلي، چې د دغه دفتر مشر ملا برادر د روغتیا نړیړال سازمان د اسیا برخې له چارواکو سره خبرې کړي او د دوی د اصولو له مخې يې د پولیو واکسين د کمپاین د تطبیق ډاډ ورکړی.
وړاندې د دغې ډلي پوځي ویاند ذبیح الله مجاهد ازادي راډیو ته ویلي و، چې یوازې په څلورو جنوبي ولایتونو هلمند، کندهار، زابل او ارزګان کې د دغه واکسین د تطبیق اصول دا دي چې واکسینونه ماشومانو ته په جوماتونو کې وشي.
د ښاغلي مجاهد په خبره، تر دې وړاندې د دوی تر ولکې لاندې سیمو کې د دغه کمپاین په مهال د معلوماتو د راټولو لپاره استخباراتي استفاده کېده چې دوی دا اصول وضع کړل.
دا په داسې حال کې ده، چې په د افغانستان د عامې روغتیا وزارت چارواکي په تېر ٢٠٢٠ کال کې په ټول افغانستان کې د ۵۶ مثبتو پېښو د ثبتېدو خبره کوي خو د مشخصو ولایتو نومونه نه اخلي.
د افغانستان د عامې روغتیا وزارت مسوولین له کورنیو د دغه کمپاین د ښه تطبیق په برخه کې د همکارۍ غوښتنه کوي.
د کابل ښار اوسېدونکی عبدالله احمدزی او د ننګرهار اوسېدونکی بادام احمدزی چې خپله هم پلرونه دي، د پولیو ضد واکسین د تطبیق په برخه کې د کورنیو همکاري اړینه بولي.
عبدالله احمدزي وویل: "که چېرې پولیو ضد واکسین تطبیق نه شي نو موږ نشو کړای چې د خپلو ماشومانو لپاره غوره راتلونکی ولرو."
بادام احمدزي وويل: "موږ هر کله خپلو ماشومانو ته دا واکسین ورکوو، خو لا هم د عامه پوهاوي نشتون له امله نورې کورنۍ خپلو ماشومانو ته د پولیو ضد واکسین نه ورکوي، خو باید ماشومانوته دا واکسین وشي تر څو له ګوزڼ په امان وي."
افغانستان له پاکستان وروسته دویم هېواد دی چې په ټوله نړۍ کې لا هم دغه ویروس په کې شته.
د پوليو يا ماشومانو د کوزڼ ضد واکسین کمپاین هر کال د افغانستان په ټولو ولایتونو کې تطبیقېږي.
