د لاسرسۍ وړ لېنکونه

تازه خبر
سه شنبه ۷ سلواغه ۱۳۹۹ کابل ۰۵:۳۷

کرونا؛ اروپايي ټولنه د 'اسټرازینیکا' کمپنۍ واکسین ته پر اجازې غور کوي


د 'اسټرازینیکا' کمپنۍ

د بریتانیا د درمل جوړولو کمپنۍ اسټرازینیکا چې د اکسفورډ پوهنتون په همکارۍ یې د کرونا ضد واکسین جوړ کړی، د اروپایي ټولنې له چارواکو غوښتنه کړې چې ورته اجازه ورکړي چې واکسین یې د دې ټولنې په ۲۷ غړیو هېوادونو کې تطبیق شي.

د اروپایي ټولنې د درملو ادارېEMA'' نن د سې شنبې (د مرغومي ۲۳مه) په ورځ په یوه بیان کې وویل چې د دې کمپنۍ پر غوښتنه به ډېر ژر غور وکړي او ښایي د جنوري تر ۲۹مې پورې په مشروط ډول ورته اجازه ورکړي چې د دې ټولنې بازار ته یې وړاندې کړي.

که امسټردام مېشته دغه اداره د اسټرازینیکا واکسین ملاتړ وکړي او اروپایي ټولنه هم هغه رسماً تایید کړي، هغه به د کرونا ضد درېیم واکسین وي چې د اروپایي ټولنې په ۲۷ غړېو هېوادونو کې خلکو ته ورکول کېږي.

تر دې مخکې اروپایي ټولنې د فایزرـ بایوانټیک او موډېرنا واکسینونه چې د کرونا په وړاندې یې موثریت په سلو کې له نوي زیات ښودل شوی، تایید کړي دي.

د اروپایي ټولنې د درملو اداره او اروپايي ټولنه تر فشار لاندې ده چې د کرونا ویروس په وړاندې چې تراوسه یې په دې ټولنه کې د له ۶۲۰ زره زیاتو کسانو ژوند اخېستی، د نویو واکسینونو د تصویب چارې ګړندۍ کړي.

د اروپایي کمېسیون مشرې اورزلا فون دیرلاین د اروپایي ټولنې د درملو له ادارې د اسټرازینیکا غوښتنه یو ښه خبر وباله او ویې ویل کله چې دا اداره له علمي پلوه د هغې ملاتړ وکړي، نو به یې په رسمي توګه د عملي کېدو چارې په چټکۍ پیل کړي.

د اروپایي کمېسیون مشرې اورزولا فن در لاین د اسټرازینیکا غوښتنه یو ښه خبر وباله
د اروپایي کمېسیون مشرې اورزولا فن در لاین د اسټرازینیکا غوښتنه یو ښه خبر وباله

نوموړې په یوه بیان کې وویل چې د اروپایي ټولنې غړي هېوادونه اوس کولای شي چې د فایزر- بایوانټیک او موډیرنا ۳۰۰ میلیونه نور ډوزونه هم وپیري.

د اروپایي ټولنې له خوا اسټرازینیکا ته په مشروط ډول اجازه ورکول دا معنی لري چې د دې ټولنې غړي هېوادونه کولای شي تر یوه کاله پورې هغه وپیري او خلکو ته یې ورکړي، څو د موثریت او جانبي عوارضو په اړه یې ټول لازمې څېړنې بشپړې شي.

تر دې مخکې دغه واکسین ته د بریتانیا، هند او ارجنټاین په ګډون یو شمېر هېوادونو د تطبیق اجازه ورکړې ده.

په عین حال کې د روغتیا نړیوال سازمان خبرداری ورکوي چې د کرونا وبا پر وړاندې د واکسیناسیونونو پراخ کمپاینونه به ونه کړای شي چې روان ۲۰۲۱ کال په نړۍ کې د دغې وبا پر وړاندې یو عمومي معافیت رامنځته کړي.

دغه خبرداری د دغې نړیوالې ادارې مخکښ ساینس پوه سومیا سوامیناتان پرون دوشنبې (د مرغومي ۲۲مه) ورکړ او ویې ویل چې سره له دې چې واکسین د تر ټولو زیانمونکو افرادو خوندي کول پیل کړي، خو نه پوهېږو چې په ۲۰۲۱ میلادي کال کې به د کتلوي معافیت کومه اندازه ترلاسه کړای شو.

هغه زیاته کړه، که دغه هدف په ځینو هېوادونو یا ځایونو کې ترلاسه شي بیا به هم هغه په ټوله نړۍ کې د خلکو د معافیت په معنی نه وي.

XS
SM
MD
LG