د ایران د هلال احمر ټولنه وايي، هېواد ته به یې په راتلونکو درو میاشتو کې د کرونا ويروس ضد واکسین ورسېږي.
دا واکسین د امریکا فایزر او د جرمني بیو این ټیک شرکتونو جوړ کړی دی.
ایران، چې د منځني ختیځ په هېوادونو کې له کرونا تر ټولو بد زیانمن شوی، تر راتلونکو شلو ورځو پورې به د کرونا ویروس پر ضد واکسین ترلاسه کړي.
د ایران د هلال احمر رييس کریم همتي وايي، په امریکا کې به یو شمېر خیرغوښتونکي تر ۱۵۰ زره ډوزه واکسین ایران ته ورکړي.
همتي د دوشنبې په ورځ نیمه رسمي خبري اژانس تسنیم ته وویل، د روغتیا د وزارت له سپارښتنې سره سم به پرېکړه وکړي چې وارد شوي واکسین لومړی چا ته ورکړي.
تر دې وړاندې د روانې اوونۍ د شنبې په ورځ د ایران د هلال احمر رييس ویلي و، چې د ده تر مشرۍ لاندې اداره له چین څخه د کورونا پر ضد یو میلیون ډوزه واکسین رانیسي.
تېره اوونۍ د ایران مرکزي بانک وویل، چې له امریکايي چارواکو څخه د کرونا ویروس واکسین د رانیولو لپاره یې د روغتیا د نړیوالې ادارې تر مشرۍ لاندې د کوواکس د متحدانو تایید ترلاسه کړی دی.
ایراني چارواکو پخوا ویلي و، چې د امریکا د بندیزونو له کبله د واکسین د پېرلو لپاره کوواکس ته پیسې نه شي ورکولی.
له کوواکس څخه د واکسین د رانیولو لپاره د نړۍ ۱۹۰ هېوادونو نومونه ثبت کړي دي.
د امریکا ولسمشر ډونالډ ټرمپ په ۲۰۱۸ م کال د نړۍ له قدرتونو سره د ایران له اتومي موافقې ووت او پر دغه هیواد یې سخت بندیزونه ولګول.
د درملو په شمول بشري مرستې د امریکا په بندیزونو کې استثنا ګرځول شوي خو له ایراني بانکونو سره د بهرنیو بانکونو د معاملو محدودیت د پیسو انتقال له ستونزو سره مخامخ کړی دی.
ایران د منځني ختیځ په هیوادونو کې د کرونا وبا له کبله تریخ حالت تجربه کړی.
د رسمي شمېرنو پر اساس، تر یو میلیون او ۲ لکه ډېر ایرانیان په کووید نولس اخته شوي او د هغو له منځه نژدې ۵۵ زره مړه شوي دي.
خو روغتیايي چارواکي وايي، چې په دغه هېواد کې په کرونا ویروس د اخته شویو او ورڅخه د مړو شویو شمېر ښايي د هغه څه دوه برابره وي چې د دغه هېواد حکومت یې اعلانوي.
