د لاسرسۍ وړ لېنکونه

تازه خبر
چهارشنبه ۲۵ وری ۱۴۰۰ کابل ۰۸:۴۴

نړیوال بانک: افغانستان کې به د بې‌وزلۍ تر کرښې لاندې وګړو شمېر زیات شي


نړیوال بانک

نړیوال بانک وايي، افغانستان کې به د ۲۰۲۰ میلادي کال تر پایه د بې‌وزلۍ تر کرښې لاندې د وګړو د شمېر فیصدي زیاته شي.

نړیوال بانک په خپل تازه شپږ میاشتني راپور کې خبرداری ورکړی چې د عوایدو د سطحې ټیټېدو، د خوراکي توکو او نورو اړتیاوو په بیو کې د لوړوالي له امله به بې‌وزلۍ تر کرښې لاندې د وګړو فیصدي لوړه شي.

دې بانک چې خپل شپږ میاشتنی اقتصادي راپور (د طوفان په وړاندې درېدل) تر عنوان لاندې د چهارشنبې په ورځ «۱۳۹۹ کال د چنګاښ ۲۵» خپور کړ، وویل چې د کرونا ویروس خپرېدل به د افغانستان اقتصادي پرمختګ ډېر راکم کړي.

په دې راپور کې راغلي چې په ۲۰۱۷ میلادي کال کې ۵۵ سلنه افغانانو د بې‌وزلۍ تر کرښې لاندې ژوند کاوه، خو په ۲۰۲۰ کال کې به د کرونا ویروس د خپرېدو له امله دا شمېر ۷۲ سلنې ته لوړ شي.

افغانستان کې د نړیوال بانک د دفتر مشر هنري کرالې وایي: "د کرونا ویروس له امله رامنځته شوی بحران به د افغانستان پر خلکو فوق‌العاده منفي اغېز ولري."

شمعروز مسجدي
شمعروز مسجدي

په ورته وخت کې د افغانستان د ماليې وزارت ویاند شمعروز مسجدي د نړیوال بانک راپور تأییدوي او وايي چې شاید د افغانستان عواید له ۲۰ تر ۳۰ فیصدو پورې کم شي.

ښاغلی مسجدي زیاتوي: "د کرونا ویروس اغېز دا شان و چې موږ نه‌شول کولای د ټاکل شویو عوایدو میزان راټول کړو، د اقتصادي وضعیت په اړه، پرته له شکه د نړۍ د نورو هېوادونو په څېر کرونا ویروس د دې هېواد اقتصاد هم ځپلی دی. د بې‌وزلۍ او وزګارتیا کچه به لوړه شي او د افغانستان اقتصاد به مثبت رشد ونه‌کړي."

د نړیوال بانک موندنې ښیي چې د روان کال شپږو لومړنیو میاشتو کې د اقتصادي فعالیتونو انډول د قرنطین له امله ډېر کم شوی او دې کار د صنایعو او خدمتونو په برخې منفي اغېز کړی دی.

د نړیوال بانک راپور کې چې په کلني ډول دوه ځلې خپرېږي، دا هم راغلي چې ۲۰۲۰ میلادي کال کې به د افغانستان اقتصادي پرمختګ له پنځه نیمو تر ۷،۴ فیصده راکم شي.

په ورته وخت کې د پوهنتون استاد او د اقتصادي چارو پوه، قیس محمدي وايي حکومت باید د مناسبو تګلارو په پام کې نیولو سره افغانستان کې د بې‌وزلۍ د زیاتېدو مخه ونیسي.

ارشیف، کابل کې یو سپین ږیری کارګر
ارشیف، کابل کې یو سپین ږیری کارګر

ښاغلی محمدي وايي: "زه په دې اند یم چې تر ۲۰۱۲ کاله به افغانستان کې د بې‌وزلۍ او بې‌کارۍ کچه ډېره لوړه وي او دا به د دې لامل شي چې د افغانستان د ملي عوایدو کچه هم راټیټه شي، لازمه ده چې د افغانستان حکومت یو تعداد اقدامات کړي وی، خو له بده مرغه کافي اندازه بودجه نه‌لرو او یو شمېر عواید اختلاس کې لاړل، نو ځکه کېدای شي دلته د نورو هېوادونو په پرتله د بې‌وزلۍ او بدبختۍ کچه نوره هم لوړه شي."

نړیوال بانک د خپل دغه تازه شپږ میاشتني راپور په یوې برخه کې د افغانستان اقتصادي وضعیت په اړه سپارښتنه کړې چې د دولت لګښتنونو کې باید لومړیتوبونه پام کې ونیول شي او نړیواله ټولنه له دې هېواد نه په وخت سره دوامداره مالي ملاتړ وکړي.

XS
SM
MD
LG