د نړۍ د کاتولیکانو مشر پاپ فرانسس وایي، په استانبول کې له یوې کلیسا څخه د جومات جوړولو په اړه د انقرې پرېکړې خواشینی کړی دی.
پاپ فرانسس دغه څرګندوني پرون په واتیکان کې د دعا ویلو په اونیزو مراسمو کې وکړې او دا د انقرې د همدې پرېکړې په اړه د نړیوالو غبرګونونو تر ټولو عاطفي احساسات بلل شوي دي.
د ترکیې یوې محکمې تېره اوونۍ پرېکړه کړې چې دا موزیم په جومات بدل شي.
د ترکیې ولسمشر رجب طیب اردوغان وویل ، د جولای پر ۲۴ به په دې جومات کې لومړنی لمونځ ادا شي.
پاپ فرانسس پرون په واتیکان کې وویل ، د استانبول په اړه فکر کوي او ډېر غمجن دی.
هغه زیاته کړه: "رودونه مې فکر لېرې وړي، استانبول ته، زه د سینت صوفیا په اړه فکر کوم، ځوریږم او درد لرم."
د نړۍ د کلیساوو شورا د ترکیې له ولسمشر څخه غوښتي چې له دې پرېکړې منصرف شي.
په استانبول کې میشت یوه مسیحي مشر بارت هولومیو هم د ولسمشر اردوغان د دې پرېکړې په اړه ژوره خواشیني ښودلې ده.
د آیا صوفیا کلیسا چې ۱۵۰۰ کاله لرغونې ده په ۱۴۵۳ کال کې د عثماني واکمنۍ پر مهال هم په جومات بدله شوې وه.
د ترکیې ولسمشر ویلي دا ودانۍ به د مسلمانانو او عیسویانو پر مخ پرانستې وي، خو هغه دا هم وویل چې ترکیې په دې پرېکړې سره خپل ملي حاکمیت تمثیل کړ.
یونسکو یا د ملګرو ملتونو د کلتوري میراثونو د خوندیتوب ادارې ویلي چې د کلتوري میراثونو کمېټه په دې اړه یوه ارزونه ترسره کوي.
د ویلو ده چې آیا صوفیا په استانبول کې یو مشهور عبادتځای پاته شوی چې هم د مسلمانانو او هم د عیسویانو لپاره ډېر اهمیت لري او په ترکیې کې له ډېرو نامتو توریستي سیمو څخه بلل کېږي.
