د لاسرسۍ وړ لېنکونه

تازه خبر
چهارشنبه ۱۸ چنګاښ ۱۳۹۹ کابل ۰۳:۵۵

میلیټري ټایمز: د زړو جګړو ختمول د امریکا کار نه دی


ځینې نړیوالې ورځپاڼې

یو- این نیوز

د ملګروملتونو خپرنیز ارګان یو- این نیوز په خپله وروستۍ ګڼه کې د جرمونو د نړیوالې محکمې له خوا په افغانستان کې د بشري جرایمو په برخه کې د دې محکمې د څېړنو په اړه د متحدایالاتو د وروستیو اقداماتو پر وړاندې د خپلې اړوندې محکمې د اجرااتو دفاع کړې ده.

د جرمونو نړیوالې محکمې د روان کال په مارچ میاشت کې په افغانستان کې د ۲۰۰۳- ۲۰۱۴ کلونو ترمنځ د امریکا د پوځ او نورو ټولو اړخونو له خوا د شويو بشري جنایتونه د څېړنې په اړه خپله پرېکړه اعلان کړه.

د امریکا حکومت د پنجشنبې په ورځ د نړیوالې محکمې پر یو شمېر غړو یولړ بندیزونه اعلان کړل.

د شنبې په ورځ د امریکا د بهرنیوچارو چارو وزیر مایک پومپیو، دفاع وزیر مارک ایسپر، د ملي امنیت سلاکار رابرټ اوبراین او لوی څارنوال ویلیم بار د محکمې د هغو چارواکو پرضد چې په څېړنو کې ښکېل دي نورې څرګندونې هم وکړې.

د هغو اقداماتو له مخې چې ولسمشر ډونالډ ټرمپ هم تایید کړي، د نړیوالې محکمې پر دې چارواکو او هغوی پر کورنیو د سفر او اقتصادي بندیزونه لګول کېږي.

د دې تحقیقاتو مشري د نړیوالې محکمې لوی څارنواله فاتو بن سودا کوي.

یو- این نیوز د نړیوالې محکمې د خپلواکۍ او بې پرې توب په اړه د امریکا د لوی څارنوال ښاغلي بار د څرګندونو هغه برخه نقل کړې چې وايي نړیواله محکمه د نړۍ د غیرمسئولو مخکښانو له خوا تر یوې جوړې شوې وسیلې لږ اوچته ده.

خپرونه د دې انتقاد په ځواب کې د نړیوالې محکمې د قاضي او- ګان کوان نظر رااخیستی دی چې وايي، نړیواله محکمه د روم د اساسنامې پربنسټ جوړه شوې او کله چې د بېرحمیو او جرایمو په اړه څېړنو ته اړتیا پېښېږي نو دا محکمه د کورنیو قضايي سیسټمونو ترڅنګ وروستۍ متممه قضايي مرجع ده.

امریکا د جرمونو د نړیوالې محکمې غړیتوب نه لري خو افغانستان د ملګروملتونو د دې اړوندې محکمې غړیتوب په ۲۰۰۳ کال کې ترلاسه کړ.

  • میلیټري ټایمز

د امریکا د پوځ خپرنیز ارګان میلیټري ټایمز په خپله وروستۍ ګڼه کې د ولسمشر ډونالډ ټرمپ هغو څرګندونو ته کتنه کړې چې د پوځي محصلینو د فراغت په غونډه کې یې وکړې او په هغو کې یې افغانستان هم یاد کړ.

ټرمپ د شنبې په ورځ د نیویارک په ویسټ پوینټ کې د پوځي اکاډمۍ د محصلینو د فراغت غونډې ته په وینا کې په دوهمه نړیواله جګړه کې د فاشیزم پرضد له مبارزې نیولې، په شپېتمه لسیزه کې په امریکا کې د نژادي توپیر پرضد د مبارزو تورپوستو محصلانو تر خوندي کولو پورې، د دې اکاډمۍ د کارنامو یادونه وکړه خو هغه په خپلو څرګندونو کې د نورو مسایلو د یادونې ترڅنګ له افغانستانه د امریکایي ځواکونو د ایستلو د پرېکړې د توجیه هڅه هم وکړه.

میلیټري ټایمز د ښاغلي ټرمپ د څرګندونو هغه برخه رااخیستې ده چې وايي، په لیرې پرتو وطنونو کې، هلته چې حتی خلکو یې نوم لا نه دی اورېدلی، د زړو جګړو ختمول د متحدایالاتو کار نه دی.

د امریکا او طالبانو ترمنځ د سولې د موافقې له مخې ټول امریکايي ځواکونه به د ۲۰۲۱ کال په مې میاشت کې په دې شرط له افغانستانه وځي چې طالبان به له تروریستي ډلو سره اړیکې پرې کوي، د افغانستان له قلمرو څخه به پر نورو هېوادونو حملو ته اجازه نه ورکوي او له افغان حکومت سره به د بین الافغاني خبرو په پایله کې په قدرت کې شریکېږي.

د ټرمپ ځینې مخالفین له افغانستانه د امریکا د پوځي ځواکونو د ایستلو له پرېکړې سره مخالفت کوي او وايي چې دا به د طالبانو پر وړاندې د امریکا د ماتې د منلو په معنا وي.

میلیټري ټایمز په دې اړه د ټرمپ د وینا هغه برخه نقل کړې چې وايي، له دې وروسته که جګړه کوو نو یوازې او یوازې موږ به یې ګټونکي یو.

XS
SM
MD
LG