د افغانستان سولې لپاره د امریکا ځانګړی استازی زلمی خلیلزاد د بینالافغاني خبرو د پیلېدو د هڅو په ترڅ کې په دوحه کې له طالبانو او په اسلاماباد او نوې ډېلي کې له پاکستاني او هندي چارواکو سره خبرې کوي.
د امریکا د بهرنیو چارو وزارت لهخوا پرون په خپره شوې اعلامیه کې ویل شوي چې ښاغلی خلیلزاد به په دوحه کې د طالبانو له استازو او په اسلاماباد او نوې ډېلي کې له پاکستاني او هندي چارواکو سره په لیدنو کتنو کې د شخړو د کمېدو او د بینالافغاني خبرو د ملاتړ لپاره فشارونه زیات کړي.
د اعلامیې له مخې ښاغلي خلیلزاد سیمې ته دا سفر د سې شنبې په ورځ پیل کړی، خو د مشخص مهالوېش چې کله به نوموړی دوحې او نورو پلازمېنو ته ځي، یادونه نهده شوې.
د روېټرز خبري اژانس د راپور له مخکې دا به د اپرېل له ۱۲مې وروسته سیمې ته د ښاغلي خلیلزاد دوهم سفر وي او هغه داسې مهال ترسره کېږي چې د طالبانو لهخوا د حملو زیاتوالي او په دې هېواد کې د کرونا خپرې شوې وبا د نوموړي هغه هڅې زیانمنې کړې چې په دې هېواد کې د جګړې د پای ته رسېدو لپارهیې مخ ته وړي.
د اعلامیې له مخې ښاغلی خلیلزاد به د قطر پلازمېنې دوحه کې چې هغه د تېرې فبرورۍ میاشتې په ۲۹مه له طالبانو سره د سولې تړون لاسلیک کړی، د طالبانو له استازو وغواړي چې شخړې کمې کړي، بینالافغاني خبرو ته اماده شي او په افغانستان کې د کرونا له وبا سره مبارزره کې همکاري وکړي.
د امریکا د بهرنیو چارو وزارت ویلي چې خلیلزاد به پر طالبانو فشار راوړي چې د سولې تړون بشپړ عملي کړي.
د روېټرز د راپور له مخې په نوې ډېلي کې به چې د افغانستان د حکومت مهم ملاتړی دی، د سولې په ټپه درېدلې پروسه کې د هند پر رول خبرې وکړي او په اسلاماباد کې به هم له پاکستاني چارواکو سره د دغه بهیر د پرمختګ په اړه وغږېږي.
روېټرز د امریکایي چارواکو له قوله وایي، پاکستان د دې لپاره له لسیزو راهیسې په خپله خاوره کې د طالبانو لپاره پټنځایونه برابر کړي او د هغوی نهیې نور ملاتړ کړی چې پر کابل د خپل زاړه دښمن، هند د نفوذ د زیاتوالي مخه ډب کړي، خو پاکستان د طالبانو د ملاتړ ادعاوې ردوي.
د امریکا او طالبانو ترمنځ د سولې د شوي تړون له مخې باید د افغانستان حکومت او طالبانو شپږ زره بندیان د مارچ تر ۱۰مې نېټې مخکې چې د بینالافغاني خبرو د پیلېدو لپاره ټاکل شوې وه، خوشې کړي وی.
کابل د طالبانو پنځه زره بندیان او طالبانو هم د حکومت زر تنه، خو د بندیانو د خوشې کېدو په اړه د افغانستان حکومت او طالبانو ترمنځ اختلافات د دې سبب شوي چې د بینالافغاني خبرو پیلېدل وځنډېږي.
بله مسئله چې د روېټرز په لیکنه د دغه بهیر د پیلېدو په وړاندې یې خنډ رامنځته کړی هغه د افغان ولسمشر اشرف غني او د هغه د انتخاباتي مهم سیال پخواني اجرائیه رئیس عبدالله عبدالله ترمنځ د اختلافاتو دوام دی.
ولسمشر غني چې د انتخاباتو خپلواک کمېسیون ګټونکی اعلان کړی، د ولسمشرۍ د بلې دورې لوړه وکړه، خو د هغه سیال عبدالله هم په هماغه ورځ د ده په وینا د یوه "ټولشموله ولسمشر" په توګه لوړه پر ځای کړه.
د دواړو مشرانو ترمنځ د اختلافاتو د هواري لپاره کورنیو او نړیوالو هڅو تر اوسه د پام وړ نتیجه نهده ورکړې.
د روېټرز په لیکنه د فبرورۍ له ۲۹مې راهیسې چې د طالبانو او امریکا ترمنځ د سولې تړون شوی، وسلهوالو طالبانو څه باندې څلورنیم زره حملې کړې دي.
ډېرې حملې هم په هغو ولایتونو کې شوي چې د کرونا یا 'کووېډ-۱۹' خپرې شوې ناروغۍ ډېر ځپلي دي.
طالبان د شخړو د زیاتوالي ملامتي د افغانستان پر حکومت او متحده ایالاتو اچوي.
