د ناټو سرمنشي ینس سټولټنبرګ وايي، په افغانستان کې د دوی حضور د سولې او ثبات د هڅو لپاره اړین دی.
د ان بي سي تلویزوني شبکې د راپور پر بنسټ ښاغلي ټرمپ دغه خبره تېره ورځ خپلو سلاکارانو ته کړې ده.
خو د امریکا د ولسمشر له دې څرګندونو ورسته د ناټو سر منشي ينس سټولټنبرګ نن سه شنبه په يو تازه ويډيويي پيغام کې ويلي، چې په افغانستان کې د يوې تل پاتې سولې راوستلو لپاره د دوي پاتې کېدل اړين دي.
هغه زیاته کړه: "غواړم له تاسې نه په افغانستان کې د خپل خدمت او ژمنې له امله مننه وکړم، ستاسې خدمت هلته ډېر د ارزښت وړ دی، ځکه افغان امنیتي ځواکونو نه ملاتړ کوئ، او هغوی نه یوازې د امنیتي ګواښونو او ترهګرۍ په وړاندې بلکې د کويډ ۱۹ ناروغۍ د پایلو په وړاندې هم مبارزه کوي، زمونږ ماموریت په افغانستان کې د یوې تلپاتې سولې د ټينګېدو لپاره د هڅو په بري کې له ځانګړي اهمیت څخه برخمنې دي."
ان بي سي تلویزیوني شبکې د دوو برحاله لوړ پوړو او یوه پخواني امریکايي چارواکو له خولې راپور ورکړی چې د امريکا ولسمشر ډونالډ ټرمپ په دې وروستیو کې خپل پوځي او امنیتي سلاکاران هڅولي څو له افغانستان څخه خپل ټول ځواکونه وباسي.
دغو امریکايي چارواکو ان بي سي تلویزون ته د خپلو نومونو د نه اخيستلو په شرط ویلي، چې د کرونا ویروس څخه د امریکايي ځواکونو د خوندیتوب په خاطر له افغانستان نه د ټولو امریکايي ځواکونو د ایستلو په اړه د ټرامپ په تازه هڅو سره، له طالبانو سره د سولې په هوکړه کې د پرمختګونو په ټپه درېدو اندېښنې هم مل دي.
هڅه مو وکړه په دې اړه د افغان حکومت نظر هم واخلو خوبریالي نه شوو.
طالبانو بیا د امريکا ولسمشر د دې څرګندونو هرکلی کړی.
په قطر کې د طالبانو سياسي دفتر وياند سهيل شاهين د سه شنبې په ورځ ازادي راډيو ته وويل: "له افغانستان څخه د امريکايي ځواکونو وتل به د سولې پروسه چټکه کړي، دا يو ښه اقدام دی، اوس تاسې ټول ګورئ چې د بنديانو د خوشې کېدو پروسه په بېلابېلو پلمو ځنډول کېږي چې دا د سولې پروسه له خنډ مخ کوي."
د ښاغلي شاهين په خبره، د افغانستان سياسي حل د امريکا او طالبانو ترمنځ د هوکړه عملي کول دي.
خو د نړیوالو اړیکو افغان کارپوه داوود مایار بیا دغې موضوع ته په دې نظر ګوري: "د افغانستان په سياست کې دغه ګام مثبت دي خو يو شمېر فشارونه به هم په حکومت باندې راشي، بله خبره دا ده چې د امريکايانو وتل له افغانستان څخه هغه څه وه چې د امريکا او طالبانو په موافقت ليک کې ذکر شوي وه زه فکر کوم دا اقدام د سولې لپاره يو فرصت دی."
ښاغلی مايار وايي اوس بايد د سولې له هر ډول فرصت څخه ګټه واخيستل شي.
په ورته وخت کې بيا ان بي سي تلويزيون د درېیو امريکايي چارواکو له قوله ویلي چې
پوځي سلاکارانو ولسمشر ټرمپ ته په خطاب کې ويلي، که غواړي د کرونا ویروس له کبله، له افغانستان نه په دې شمېر سرتېري وباسي، نو پکار ده چې پنتاګون له نورو هېوادونو لکه ايټالیا نه هم خپل سرتېري وباسي.
ايټالیا د نړۍ هغه هېواد دی چې، کرونا ویروس سخت ځپلی.
له دې وړاندې د روانکال د مارچ په ۲۴مه په افغانستان کې د غوڅ ملاتړ ماموریت اعلان وکړ چې په نړیوالو ځواکونو کې د کرونا ویروس ۴ مثبت موارد تایید شوي خو د امریکا دفاع وزارت نه دي ویلي چې په دغو ځواکونو کې امریکايي عسکر هم شامل دي او که نه؟
دا موضوع په داسې حال کې مطرح کېږي چې په افغانستان کې د کرونا ویروس مثتبې پېښې هره ورځ زیاتېږي.
د عامې روغتیا وزارت لهخوا ورستۍ اعلان شوې شمېرې ښيي، چې تر اوسه په افغانستان کې له ۱۸۰۰ زیات کسان په کرونا ویروس اخته شوي دي.
