کابل کې د سېکهانو پر ګوردواره یا عبادتځای حمله د بېلابېلو سازمانونو او هېوادونو لهخوا وغندل شوه.
د هندوستان صدراعظم نرېندرا مودي د چهارشنبې په ورځ په یوه وېډیویي پیغام کې په کابل کې د سېکهانو پر ګوردواره حمله ترورېستي وبلله او ویېغندله.
بلخوا د هند د بهرنیو چارو وزارت دا یوه بزدلانه حمله بللې او په کلکو ټکو یې غندلې ده.
دغه وزارت په یوه اعلامیه کې ویلي، د وژل شویو د کورنیو له غړو سره خواخوږي ښيي او ټپیانو ته د عاجلې شفا غوښتنه کوي.
وزارت په افغانستان کې د سېکهانو او هندوانو زیانمنو شویو کورنیو سره هر ډول ممکنه همکارۍ ته تیار دی.
په کابل کې د امریکا سفارت هم د حملې د غندنې ترڅنګ د قربانیانو له کورنیو سره خواخوږي ښوولې ده.
سفارت په خپله رسمي ټویټر پاڼه کې لیکلي: "موږ هغه تعصبګر او جنایتکاران چې د بېګناه انسانانو د زیانمنولو لپاره دغه عبادتځای په نښه کړ، غندو."
په کابل کې د ملګرو ملتونو مرستندوی مأموریت یا یوناما هم پر سېکهـ عبادت کوونکو حمله غندلې ده.
یوناما په خپله رسمي ټویټرپاڼه کې لیکلي، په یوه عبادتځای کې د ملکیانو وژنه د توجیه وړ نهده.
په افغانستان کې د اروپايي ټولنې استازولۍ هم په ټویټر کې په کابل کې شوې حمله زړه بوږنوونکې ترورېستي حمله بللې.
دغې ادارې لیکلي چې اروپايي ټولنه د قربانیانو د کورنیو ترڅنګ ده او د ټپیانو د عاجلې شفا غوښتنه لري.
د بخښنې نړیوال سازمان کې د جنوبي اسیا د برخې دفتر په ټویټر کې لیکلي، د دغې زړه بوږنوونکې حملې له کبله دوی ټکان خوړلی.
د دې ادارې په خبره په افغانستان کې د اقلیتونو او د هغوی د عبادتځایونو ساتنه د چارواکو مسؤلیت دی.
د پاکستان د بهرنیو چارو وزارت هم په یوه اعلامیه کې ویلي دا ډول کرکپاروونکې حملې له سیاسي، مذهبي یا اخلاقي اړخه نهشي توجیه کېدای او باید کاملاً وغندل شي.
د روېټرز خبري اژانس په حواله په افغانستان کې د سېکهانو شمېر تر ۳۰۰ کورنیو لږ دی، حال دا چې په ۱۹۸۰مو کلونو کې په افغانستان کې د خورو ورو سېکهانو شمېر نږدې ۵۰۰ زرو ته رسېده.
د هندوانو او سېکهانو ډېری غړي چې له لسیزو راهیسې په افغانستان کې اوسېدلي، د کورنۍ جګړې پر مهال او د طالبانو له ډاره له افغانستانه ووتل.
دوی په هغو مذهبي اقلیتونو کې راځي چې په هندوستان کې د اساسي قانون د نویو تعدیلاتو له مخې د تابعیت پر شرایطو برابر دي.
دغه تعدیلات د صدراعظم نرېندرا مودي د ملتپال ګوند بهارتیا جاناتا لهخوا پېشنهاد شوي وو.
په کابل ښار کې د سېکهانو پر یوه درمسال حمله کې ۲۵ تنه ووژل شول او ۸ نور ټپیان شول.
د کورنیو چارو وزارت په یوه خپره کړې اعلامیه کې ویلي چې دا حمله د یوه حمله کوونکي لهخوا شوې چې دا کس هم د امنیتي ځواکونو لهخوا وژل شوی دی.
د دې وزارت ویاند طارق ارین د چهارشنبې په ورځ «۱۳۹۹ کال د وري ۰۶» له حملې وروسته رسنیو ته وویل چې د افغانانو دښمنانو تل پر عبادتځایونو حملې کړي.
ښاغلی ارین زیاتوي: "ځانګړو ځواکونو څه باندې ۸۰ تنه چې بند پاتې وو وژغورل. دا ترهګریزه حمله وه چې د افغانستان د خلکو د دښمنانو لهخوا ترسره شوه. دا څووم ځل دی چې د اسلام او د افغانانو دښمنان مقدس ځایونه او عبادتګاوې هدف ګرځوي."
دا حمله د چهارشنبې په سهار ۰۷:۴۵ دقیقې کله چې لسګونه سېکهـ افغانان په درمسال کې په عبادت بوخت وو، وشوه.
د افغانستان د کورنیو چارو وزارت وایي چې په وژل شویو او ټپیانو کې ښځې او ماشومان هم شامل دي.
د کابل په زاړه ښار کې د سېکهانو پر درمسال دې حملې د عبادتځایونو د امنیت په اړه اندېښنې هم راپارولې دي.
د مشرانو جرګې غړې انارکلي هنریار هم وایي چې دا پېښه باید په هر اړخیز ډول وڅېړل شي.
اغلې هنریار زیاتوي: "دا حمله چې د هر چا لهخوا ترسره شوې وي هغه د افغانستان د خلکو دښمن دی. پر ملکي وګړو او عبادتځایونو حمله کول جنګي جنایت ګڼل کېږي. زموږ غوښتنه له امنیتی او کشفي ارګانونو څخه دا ده چې په دې هکله څېړنه وکړي ترڅو معلومه شي چې دا څوک په دې حمله کې لاس لري."
فرانس پرس خبري اژانس راپور ورکړی چې د دې حملې مسؤلیت داعش ډلې منلی دی.
داعش تر دې وړاندې هم د ولسمشر د تحلیف پر مراسمو او د عبدالعلي مزاري د تلین په مناسبت د غونډې په ګډون د څو حملو مسؤلیت منلی دی.
د ۲۰۱۸ میلادی کال د جولای په میاشت هم په جلالاباد ښار کې په یوه انتحاري حمله کې د سېکهانو او هندوانو د یوه استازي په ګډون ۲۰ تنه ووژل شول چې د هغې حملې مسؤلیت هم داعش یا اسلامي دولت ډلې منلی وو.
د افغانستان د ملي امنیت شورا او په کابل کې د امریکا سفارت دا حمله سخته غندلې ده.
د افغانستان د کورنیو چارو وزارت وايي چې په شوربازار کې د سېکهانو پر عبادتځای وسلهواله حمله پای ته ورسېده.
د کورنیو چارو وزارت په اعلامیه کې چې څو شېبې مخکې خپره شوه، ویل شوي چې په حمله کې ۲۵ ملکي وګړي وژل شوي او ۸ تنه زخمیان شوي دي.
د خبرپاڼې په حواله، حمله کونکی هم وزل شوی دی.
د کورنیو چارو وزارت ویلي چې پولیس وتوانېدل چې ۸۰ تنه د پېښې له ځایه وژغوري.
د افغانستان د کورنیو چارو وزارت دا یوه ترورېستي پېښه بللې او غندلې یې ده.
په کابل کې د حملې مسؤلیت د داعش وسلهوالې ډلې اخیستی دی.
د پاکستان د بهرنیو چارو وزارت هم یو بیان خپور کړی او په کابل کې نننۍ حملهیې په شدت غندلې ده.
د پاکستان د بهرنیو چارو وزارت په بیان کې لیکل شوي چې دوی هر ډول ترورېزم غندي او د ملکي خلکو عبادتځایونه باید په هر حالت کې خوندي پاتې شي.
د داعش وسلهوالې ډلې په کابل کې د سېکهانو پر عبادتځای د نننۍ حملې مسؤلیت واخیست.
دا خبر (سایټ انټلجنس ګروپ) چې د وسلهوالو انټرنټي فعالیتونه څاري، خپور کړی دی.
د وسلهوالو طالبانو یوه ویاند تر دې وړاندې ویلي و چې حمله دوی نهده کړې.
د افغانستان د کورنیو چارو وزارت ویلي چې حمله پای ته ورسېده.
په حمله کې تر اوسه د ۴ وګړو د وژل کېدو خبر تأیید شوی دی.
د افغانستان د سېکهانو د ټولنې استازي، نرېندر سنګهـ خالصه ازادي راډیو ته ویلي چې د ښځو او کوچنیانو په ګډون، نږدې ۱۵۰ تنه د حملې په ځای کې راګېر دي ځکه ډېر خلک د سهارني عبادت لپاره ورغلي وو.