د لاسرسۍ وړ لېنکونه

تازه خبر
سه شنبه ۶ لړم ۱۳۹۹ کابل ۰۱:۵۱

د ناټو دفاع وزیران د افغانستان د سولې او امنیت په اړه خبرې کوي


په بروکسل کې د ناټو مرکزي دفتر

د ناټو او د دې تړون د شریکو هېوادونو دفاع وزیران به د سولې د هلوځلو او په افغانستان کې د امنیت د ټینګېدو په اړه پر خپلو ژمنو خبرې وکړي.

دوی به د روانې فبرورۍ په دوولسمه او دیارلسمه، یعنې د چهارشنبې او پنجشنبې په ورځو د بلجیم په مرکز بروکسل کې سره وویني.

د ناټو د سرمنشي د ویاند مرستیال پییرز کازالي د غونډې په درشل کې ازادي راډیو ته وویل: "له سختو شرایطو سربېره، افغان ځواکونه پیاوړي شوي دي او دوی د سولې په راوستو کې مرسته کوي، موږ د جګړې پای ته رسېدو او د سولې راوستو لپاره د متحده ایالتونو د هڅو ملاتړ کوو."

د ناټو د سرمنشي د ویاند مرستیال پییرز کازالي
د ناټو د سرمنشي د ویاند مرستیال پییرز کازالي

د افغانستان د سولې لپاره د امریکا د متحدوایالتونو ځانګړي استازي زلمي خلیلزاد د قطر په دوحې کې د طالبانو له استازو سره تر ۱۰ ځله زیات کتلي چې په افغانستان کې د امریکا د اتلس کلنې جګړې د پای ته رسېدو لپاره د حل لار ومومي، خو تر اوسه پورې دواړه خواوې موافقې ته نه دي رسېدلي او د خبرو نتیجه معلومه نه ده.

قطر کې د طالبانو او امریکایانو پلاوي د خبرو پرمهال. March 12, 2019
قطر کې د طالبانو او امریکایانو پلاوي د خبرو پرمهال. March 12, 2019

په لندن کې مېشت افغان شنونکي سمیع یوسفزي ازادي راډیو ته وویل چې د دواړو لورو تر منځ اعتماد جوړونې ته اړتیا ده.

په لندن کې مېشت سیاسي شنونکی سمیع یوسفزی
په لندن کې مېشت سیاسي شنونکی سمیع یوسفزی

هغه زیاته کړه: " امریکایان په دې باور دي چې طالبانو یو داسې قوت دی چې په مشکله به سیاسي حل لارې ته حاضر شي چې په دې کې د افغانستان د خلکو خواهشات او د اوسنۍ نړۍ د ډیموکراسۍ غوښتنه تضمین شي، په همدې حال کې طالبان فکر کوي چې ګنې امریکایان ورسره لوبه کوي، له همدې امله فکر کوم چې په منځ کې د نظر جدي تفاوت موجود دی. "

له پروګرام سره سم، د ناټو سرمنشي ینس سټولټنبرګ به د سې شنبې په ورځ (د فبرورۍ ۱۱) له غونډې مخکې له خبریالانو سره خبرې وکړي.

دا په لندن کې د ۲۰۱۹ کال د ډېسېمبر په میاشت کې د ناټو له سرمشریزې وروسته د ناټو د وزیرانو لومړنۍ غونډه ده چې اوس په بروکسل کې کېږي.

د ناټو سرمنشي ینس سټولټنبرګ
د ناټو سرمنشي ینس سټولټنبرګ

په ډېسېمبر کې سټولټنبرګ له طالبانو غوښتي و چې له کلکې او جدي ارادې سره خبرو ته حاضر شي.

طالبانو ته د ده پیغام دا و چې هېڅکله به له پوځي لارې بریالي نه شي.

د ناټو له دې ډول غوښتنو سره سره طالبانو له افغان او نړیوالو ځواکونو سره جګړې ته دوام ورکړی او په ځلونو یې د افغانستان له حکومت سره له خبرو انکار کړی دی.

د امریکا دفاع وزارت په خپل تازه راپور کې ویلي چې د ۲۰۱۹ میلادي کال د جون د میاشتې له لومړۍ څخه د همدې کال د اکټوبر تر پایه پورې دښمن "د افغانستان د دولت وسله والو مخالفانو" تر ۶ زره ډېرې حملې کړي وې.

په دې راپور کې وړم کال ته اشاره شوې او ویل شوي چې د ۲۰۱۸ میلادي کال تقریباً په ورته موده کې تر ۵ زره ډېر بریدونه شوي وو.

ټاکل شوې ده چې په دې ناسته کې د افغانستان سرپرست دفاع وزیر اسدالله خالد په افغانستان کې د غوڅ ملاتړ ماموریت عمومي قوماندان جنرال سکاټ مېلر، په افغانستان کې د ناټو ملکي استازی نیکولاس کې او همداراز د ملګروملتو، اروپايي اتحادیې او نړیوال بانک استازي ګډون وکړي.

د افغانستان سرپرست دفاع وزیر اسدالله خالد
د افغانستان سرپرست دفاع وزیر اسدالله خالد

ناټو حاضر دمه په افغانستان کې نږدې ۱۷ زره پوځیان لري چې اکثره یې امریکایان دي.

د دغو ځواکونو لویه برخه د افغان امنیتي او دفاعي ځواکونو په روزلو بوخته ده.

د ناټو د دفاع وزیرانو د غونډې په دُرشل کې د روانې اوونۍ د شنبې په ورځ په ننګرهار کې لږترلږه دوه امریکايي پوځیان ووژل شول او ۶ نور ژوبل شول.

د امریکا پوځ وویل، د لومړنیو راپورونو پر اساس حمله کوونکي د افغان ملي اردو یونېفورم اغوستی و.

داعش او طالبان دواړه د ننګرهار ولایت په یو شمېر سیمو کې فعال دي.

پر امریکايي پوځیانو د شنبې ورځې د دې برید مسوولیت تراوسه پورې کومې ډلې پر غاړه نه دی اخیستی.

وبه کتل شي چې د بروکسل په راروانه غونډه کې د دې پېښې اغېز څه دی.

عام افغانان، چې له دې اوږدې جګړې سخت زیانمن شوي، هیله لري چې اوربند وشي، خو دا لا نه ده معلومه چې کله به اوربند شی.

XS
SM
MD
LG