ټاکل شوې چې نن په مسکو کې د لیبیا د طرابلس د حکومت او د جنرال خلیفه حفتر ترمنځ اوربند لاسلیک شي.
په لیبیا کې له کله چې د دې هېواد پخوانی دیکتاتور معمرقذافي وژل شوی، شخړې روانې دي.
په طرابلس کې د ملګروملتونو له خوا د په رسمیت پیژندل شوي د لیبیا د حکومت یوه جګپوړي چارواکي ویلي چې دغه اوربند به چې په لیبیا کې د نژدې یوې لسیزې جګړو ته د پای ټکی ږدي، نن په مسکو کې لاسلیک شي.
فرانس پرس خبري اژانس د دغه چارواکي له قوله چې یوې سیمه ییزې خبري رسنۍ ته یې په دې اړه څرګندونې کړي او نوم یې نه دی په ډاګه شوی، ویلي چې په طرابلس کې د ملي وفاق حکومت د دولتي عالي شورا مشر خالد ال میشري اود ملیشه ځواکونو قومندان خلیفه حفتر به دغه اوربند لاسلیک کړي.
د لیبیا لپاره د روسیې د ارتباطي ډلې مشر لیو دینګوف انترفاکس خبري اژانس ته وویل چې حفتر او د ملي وفاق د حکومت مشر فیاض السراج به سره وګوري او د یوه احتمالي اوربند د لاسلیک کېدو او د دغسې سند پرجزییاتو به بحث او خبرې وکړې.
د دغه احتمالي اوربند تر رسمي لاسلیک کېدو مخکې له پرون راهیسې حفتر ته د د وفاداره ځواکونو چې د لیبیا پر شمالي برخه واکمن دي او د طرابلس د حکومت ترمنځ اوربند نافذ شوی دی.
وروستي ځل السراج او حفترد ۲۰۱۸ کال په نومبرکې د ایټالیا په پالرمو کې کتلي چې له هغې وروسته حفتر د وسله والې مبارزې له لارې د طرابلس د حکومت نسکورولو اعلان وکړ.
حفتر چې له خپلې خوا یې د لیبیا د ملې پوځ په نوم واکمني اعلان کړې، ویلي دغه اوربند به مشروط په دې وي چې د طرابلس حکومت یې ومني.
د هغه یوه ویاند احمد مسماري په یوه ویډیوي پیغام کې وویل چې له اوربند څخه هره سرغړونه به له جدي غبرګون سره مخامخ شي.
د طرابلس د ملي وفاق حکومت په یوه انلاین بیان کې چې پرون یې خپورکړ وویل، د یوه اوربند د ټینګېدو لپاره د ترکیې او روسیې د ولسمشرانو د غوښتنې په ځواب کې د جنورۍ د دولسمې له نیمې شپې اوربند اعلانوي.
دغه حکومت مخکې هم د اوربند د غوښتنې هرکلی کړی و خو دا یې هم ویلي و چې د خپلو خلکو د ساتنې مسولیت لري.
د روسیې او ترکیې ولسمشرانو څلور ورځې مخکې په استانبول کې په کتنه کې په لیبیا کې د اوربند غوښتنه کړې وه.
تر دې لیدنې کتنې وروسته دواړو ولسمشرانو ولادیمیر پوتین او رجب طیب اردوغان په ګډ بیان کې وویل، په کار ده چې په لیبیا کې د ثبات لپاره لازمې هڅې وشي.
د جرمنې صدراعظمې انګېلا میرکل چې د شنبې په ورځ یې د روسیې له ولسمشر ولادیمیر پوتین سره په مسکو کې کتلي و، هیله څرګنده کړې وه چې د اوربند د ټینګېدو لپاره د روسیې او ترکیې هڅې نتیجه ورکړي.
برلین او مسکو د دغه کړکیچ د هواري لپاره د منځګړیتوب رول لوبوي او جرمني خبرداری ورکړی چې کېدای شي لیبیا په بله سوریه بدله شي.
په لیبیا کې د ملګرو ملتونو ملاتړي ماموریت هم د دغه اوربند هرکلی کړی او پر ټولو خواوو یې غږ کړی چې هغه په کلکه رعایت کړي او د سولې د هڅو لپاره داسې فضا رامنځه کړي چې په نتیجه کې یې ټول اختلافات په لیبیا کې د خپل منځي خبرو له لارې هوارشي.
په لیبیا کې له ۲۰۱۱ کال راهیسې چې پخوانی مشر معمر قذافي ووژل شو، شخړې روانې دي.