په افغانستان کې د سړک پر غاړه د ماین د چاودنې له امله ۴ امریکايي عسکرو ته مرګ ژوبله اوښتې ده.
د کندهار والي، حیات الله حیات پرون، د جنورۍ په ۱۱مه، ازادي راډیو ته وویل چې چاودنه د ډنډ ولسوالۍ د حقدار کارېز په سیمه کې شوې ده.
دا په ۲۰۲۰ میلادي کال کې په افغانستان کې د امریکایي ځواکونو لومړی وار تلفات دي.
حیات وویل چې د امریکايي ځواکونو د ګزمې ټانک د سړک پرغاړه په ماین الوتی دی.
د هغه په وینا، ۲ امریکايي عسکر وژل شوي او ۲ نور ټپیان دي.
حیات الله حیات: "د امریکايي قواوو یوه ګزمه چې د کندهار د هوايي ډګر جنوبي لوري ته د سړک پر غاړه د ماین ښکار شوه، دوه امریکايي سرتېري وژل شوي او دوه زخمیان دي."
د پېښې مسئولیت وسله والو طالبانو اخیستی دی.
د وسله والو طالبانو یوه ویاند پر ټوېټر لیکلي چې پېښه د کندهار هوايي ډګر ته نږدې شوې او په موټر کې ټول سپاره کسان وژل شوي دي.
په افغانستان کې د ناټو په مشرۍ د غوڅ ملاتړ ماموریت تائید کړې چې په کندهار کې د امریکايي ځواکونو د ګزمې پر موټر چاودنه شوې ده.
د ناټو په اعلامیه کې ویل شوي چې دامریکا دفاع وزارت ښايي تر پېښې ۲۴ ساعته وروسته د وژل شوو کسانو معلومات خپاره کړي.
په کندهار کې د ناټو په مشرۍ د غوڅ ملاتړ ماموریت په چوکاټ کې د امریکا او رومانیا ځواکونه مېشت دي.
په افغانستان کې د امریکا د متحدو ایالاتو پوځي ماموریت په ۲۰۱۴ میلادي کال کې محدود شو.
له هغه راهیسې، تېرکال په افغانستان کې د امریکايي ځواکونو لپاره تر ټولو خونړۍ کار و.
تېر کال په افغانستان کې د امریکايي ځواکونو ۲۰ غړي وژل شوي وو.
خو له ۲۰۰۱ میلادي کال راهیسې چې د امریکا په مشرۍ ائتلافي قواوو په افغانستان کې د تروریزم پر ضد جګړه پېل کړې، ۲۴۰۰ امریکايي عسکر او منصبدار وژل شوي دي.
په افغانستان کې اوسمهال ۱۲ زره امریکايي عسکر مېشت دي چې نږدې ۸ زره یې د ناټو په مشرۍ د غوڅ ملاتړ ماموریت په چوکاټ کې خدمت کوي.
هغوی تر ډېره حده د افغانستان د امنیتي ځواکونو په روزنه او له هغوی سره په همکارۍ لګیا دي.
په کندهار کې پر امریکايي ځواکونو حمله په داسې حال کې شوې چې په دوحه کې د امریکا او وسله والو طالبانو سیاسي استازو څو واره په افغانستان کې د روان تاوتریخوالي د پای ته رسولو په اړه مخامخ خبرې کړې دي.
امریکا له وسله والو طالبانو په ځلونو غوښتنه کړې چې د افغانستان له حکومت سره د سولې لپاره مخامخ خبرې وکړي او له تاوتریخوالي لاس واخلي.
