د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۱۲:۴۰

د ولسمشرۍ د کاندیدانو شورا: بیا د ملي یووالي په څېر حکومت د منلو نه دی


د جمهوري ریاست د انتخاباتو کاندیدانو په یوې خبري ناستې کې وویل، د انتخاباتو کمېسیون دې د پاکو ورایو وړونکی کاندید بریالی اعلان کړي.
د جمهوري ریاست د انتخاباتو کاندیدانو په یوې خبري ناستې کې وویل، د انتخاباتو کمېسیون دې د پاکو ورایو وړونکی کاندید بریالی اعلان کړي.

د افغانستان د جمهوري ریاست د کاندیدانو شورا وايي، یوشمېر هېوادونه هڅه کوي چې په افغانستان کې ۲۰۱۴ میلادي کال سناریو تکرار شي.

د دغې شورا غړو نن (عقرب دویمه) په کابل کې یوې خبري ناستې ته وویل، د انتخاباتو کمېسیون دې د پاکو ورایو وړونکی کاندید بریالی اعلان کړي.

که څه هم د جمهوري ریاست د انتخاباتو د پایلو د اعلان کره نېټه نه ده معلومه، خو ورځ تربلې یې په اړه شکونه او اندېښنې زیاتیږي.

د جمهوري ریاست د کاندیدانو شورا وايي، یوشمېر هېوادونه هڅه کوي، چې یو ځل بیا د ملي یووالي حکومت تکرار شي.

د جمهوري ریاست کاندید احمد ولي مسعود چې د پنجشنبې په ورځ یې د نورو کاندیدانو په استازتیوب خبرې کولې که څه هم د کوم هېواد نوم وانخیست، خو ټینګار یې وکړ چې دغه سناریو ورته د منلو نه ده.

هغه وویل: "هېوادونه شته چې سکوت یې اختیار کړی، د دوی یوشمېر یې هڅې کوي چې د ۲۰۱۴ کال سناریو تکرار کړي، دا سناریو افغانانو ته د منلوړ وړ نه ده، اوسنی نسل پوه ده او د خپل برخلیک په اړه حساس دی."

د جمهوري ریاست بل کاندید عنایت حافظ په همدې خبري غونډه کې وویل، د انتخابات له خپلواک کمېسیون غواړو چې د انتخاباتو اصلي وړونکی په جدیت او قاطعیت سره اعلان کړي چې موږ او نړیواله ټولنه به یې ملاتړ وکړو.

بل خوا د جمهوري ریاست بل کاندید شهاب حکیمي ادعا وکړه چې د تېرې پنجشنبې په شپه د ډیټا سنټر قفل له ماتېدو وروسته هکرانو شاه خوا درې لکه رایې د سیسټم ته داخلې کړې.

دا هغه ادعا ده چې د انتخاباتو خپلواک کمېسیون یې ردوي، خو دا مني چې د ډیټا سنټر د لومړۍ دروازې قفل مات شوی.

د ټاکنو کمېسیون ویانده شیما رضايي وايي، که څوک په دې برخه کې اسناد لري له دوی سره دې شریک کړي، که نه په داسې څرګندونو دې د خلکو افکار نه ګډوډوي.

اغلې رضايي ټینګار وکړ چې کمېسیون به د خلکو له پاکو رایو ساتنه کوي او ګټوونکی به اعلانوي.

"د انتخاباتو خپلواک کمېسیون په ټول توان سره هڅه کوي چې د خلکو له رایو ساتنه وکړي او هغه څه چې خلکو تصمیم نیولی هغه اعلان کړي."

ټاکل شوې وه چې د انتخاباتو خپلواک کمېسیون د جمهوري ریاست د انتخاباتو لومړنۍ پایلې د میزان په ۲۷ اعلان کړي، خو کمېسیون په دې ژمنه کې پاتې راغلی او له خلکو یې بخښنه وغوښتله.

له انتخاباتي مهالویش سره سم د جمهوري ریاست د انتخاباتو وروستۍ پایلې د عقرب په شپاړلسمه اعلان شي، خو اوس چې کارونه له انتخاباتي مهالویش نه یو څه پاتې شوي، وبه لیدلای شي، چې دغه پایلې په خپل وخت اعلانیږي کنه؟

XS
SM
MD
LG