په افغانستان کې د ملګرو ملتونو د سیاسي دفتر مشر په نیویارک کې امنیت شورا ته د خبرو پر مهال پر بینالافغاني خبرو ټینګار وکړ.
په نیویارک کې د ملګرو ملتونو د امنیت شورا په غونډه کې د افغانستان لپاره د دغه سازمان ځانګړي استازي له طالبانو سره د سولې روانو خبرو ته خوشبیني هم ښکاره کړه.
تدامیچي یاماموتو وویل:"د امریکا د متحده ایالاتو او طالبانو ترمنځ د مخامخ خبرو هرکلی په نړیواله کچه په پراخه سطحه روان دی. افغانستان او یو شمېر نړیوال متحدانیې په ځانګړې توګه جرمني او قطر د بینالافغاني خبرو لپاره چمتو کېږي."
د ملګرو ملتونو ځانګړي استازي پر دې ټینګار وکړ چې طالبان باید بینالافغاني خبرو ته چمتو شي.
ده پهدې ترڅ کې په وروستیو کې د مسکو غونډې ته اشاره وکړه چې پهکې یو شمېر افغان سیاستوالو برخه واخیسته او ویېویل: "یو شمېر مطرح افغانانو دا فرصت ترلاسه کړ چې د مې میاشت په وروستیو کې د طالبانو له استازو سره نظر تبادله کړي دا ټولې هڅې باید د یوه هدف په لور روانې شي، څو رسمي خبرې د افغانستان د حکومت او طالبانو ترمنځ پیل شي چې سولې ته ورسېږو."
تر اوسه د افغانستان د سولې لپاره د امریکا ځانګړي استازي زلمي خلیلزاد شپږ ځله له طالبانو سره کتلي دي او ښاغلي خلیلزاد د سې شنبې په ورځ په ټویټر کې ولیکل چې د اووم پړاو خبرو ته د چمتو کېدو په حال کې یو او د سولې د پراخ تړون کوو، یوازې له افغانستانه د بهرنیو ځواکونو د وتلو تړون نهکوو.
طالبانو له ښاغلي خلیلزاد سره خبرو ته بیا هم چمتوالی ښودلی، خو ویلي یې دي چې د افغانستان له حکومت سره خبرې نهکوو.
ښاغلي یاماموتو د امنیت شورا غونډې ته دا هم وویل چې د سولې په خبرو کې باید د ښځو حقوق تر پښو لاندې نهشي.
غونډې ته د افغانستان د بشري حقونو د خپلواک کمېسیون مشرې سیما سمر هم په خپلو خبرو کې د سولې په بهیر کې د ښځو پر ونډې ټینګار وکړ او ویېویل: "ښځې د هېواد له ټولو سیمو زموږ د اساسي قانون پر ساتنې ټینګار کوي، دوی دا غواړي چې د ښځو حقوق، نور بشري حقوق او ډموکراسي باید د سیاسي خبرو پر مهال معامله نهشي او د سولې د خبرو لپاره د بحث په خاطر د اجنډا برخه نهشي."
امنیت شورا ته د ملګرو ملتونو ځانګړي استازي تدامیچي یاماموتو وویل چې د افغانستان سولې ته اوږده لار په مخکې ده، خو افغانستان د ملګرو ملتونو دایمي غړی هېواد دی او ګډو هڅو ته چې ګورو نو زه ویلی شم چې په سمه لار روان یو.