د لاسرسۍ وړ لېنکونه

تازه خبر
چهارشنبه ۱۷ لیندۍ ۱۴۰۰ کابل ۰۷:۲۹

سپاه پاسداران ځواک: تهران به هېڅ کله له امریکا سره خبرې ونه کړي


د ایران د سپاه پاسداران ځواک مرستیال مشر یدالله جواني

د ایران د سپاه پاسداران انقلاب ګارد وايي، تهران به هېڅ کله له امریکا سره خبرې ونه کړي.

ایراني لوري دا خبرې د امریکا د جمهور رئیس د وروستیو څرګندونو په اړه په غبرګون کې کړي دي.

د واشنګټن او تهران ترمنځ کړکېچ د زیاتېدو په حال کې دي.

د ایران د دې پیاوړي ځواک مرستیال مشر یدالله جواني پرون د مې په لسمه ویلي، له امریکا سره به هېڅ ډول مذاکرې ونه شي.

د جواني دا خبرې د ایران خبري اژانس تسنیم خپرې کړي دي.

جواني همدا راز ادعا کړې چې متحده ایالات به هېڅ کله د ایران پر ضد د پوځي اقدام جرات ونه کړي.

تر دې یوه ورځ وړاندې د امریکا د متحدو ایالاتو ولسمشر ډونالد ټرمپ وویل چې ایراني چارواکي دي ټيليفون ورته وکړي.

ټرمپ د ایران پرضد د پوځي اقدام امکان هم رد نه کړ.

خو ويې ویل چې له ایراني لوري سره خبرو ته تیار دی.

ټرمپ د پنجشنبې په ورځ په سپینه ماڼۍ کې خبریالانو ته وویل:

د امریکا د متحدو ایالاتو ولسمشر ډونالد ټرمپ
د امریکا د متحدو ایالاتو ولسمشر ډونالد ټرمپ

"هغوی باید زنګ را ووهي او که داسې وکړي موږ خبرو ته تیار یوو، موږ هېڅ پټه خبره نه لرو."

ډونالد ټرمپ تقریباً یو کال مخکې له ایران سره د نړیوالو قدرتونو له اټمي موافقې ووت.

له هغه راهیسې د تهران او واشنګټن په اړیکو کې کړکېچ زیات شوی دی.

د امنیت شورا پنځو دایمي غړو او جرمني په ۲۰۱۵ میلادي کال کې له ایران سره د اټمي فعالیتونو په اړه د جوړ جاړي موافقه وکړه.

د موافقې پر اساس به ایران د خپلو اټمي پروګرامونو فعالیت محدوداوه او نړیوالو به پر ایران بندیزونه کمول.

خو ټرمپ وویل چې په موافقه کې د ایران د مزائیلو پروګرام او له ترورېستي ډلو د ایران د ملاتړ مسئله نه وه ځای شوې، له دې امله یې کمزورې وبلله او امریکا یې ورڅخه وایسته.

د امریکا د متحدو ایالاتو حکومت پرون وویل چې خپلو ګټو ته د ایران د تهدید له امله یې د سمندري قواوو یوه ډله سیمې ته استولې ده.

د روېټرز خبري اژانس په وینا، د امریکا د سمندري ځواکونو ډله د پنجشنبې په ورځ د سوئز تر کانال تېره شوه.

د رپوټونو په حواله، د امریکا (بي ۵۲) ستراتيژيکي بم غورځوونکې الوتکې هم پرون په قطر کې د امریکايي ځواکونو په پوځي اډې سنټ کام کې ښکته شوې.

XS
SM
MD
LG