د پیسو د نړیوال صندوق مشرې کریسټین لاګارد پرون د متحده عربي اماراتو په دبۍ ښار کې د پاکستان له صدراعظم عمران خان سره په لیدنه کې له پاکستانه د «ای اېم.اېف» له ملاتړه ډاډ ورکړ.
مېرمن لاګارد د نړۍ د حکومتونو په اوومه سرمشریزه کې له عمران خان سره خپله لیدنه ښه او رغنده وبلله.
هغې په یوه اعلامیه کې ویلي چې پهدې لیدنه کې له پاکستانه د «ای.اېم.اېف» یا د پیسو د نړیوال صندوق په مالي ملاتړ ټینګار وشو.
د پیسو د نړیوال صندوق یو پلاوی د ۲۰۱۸ میلادي کال په نوومبر کې له پاکستان سره د احتمالي مالي مرستو پر سر د خبرو لپاره دغه هېواد ته تللی و، خو کومې موافقې ته ونه رسېد.
پاکستان بیا وروسته د پور د اخېستلو لپاره د خبرو د دوام اعلان وکړ.
د «ای اېم.اېف» مشرې مېرمن لاګارد ویلي چې له صدراعظم عمران خان سره په لیدنه کې یې د کلکو پالیسیو او قوي اقتصادي اصلاحاتو په راوستلو ټینګار وکړ، څو د پاکستان اقتصاد خوځنده او تاب راوړونکی شي او د دې په خبره د یو پیاوړي او پراخ پرمختګ بنسټ یې کېښودل شي.
د پاکستان صدراعظم عمران خان د نړۍ د حکومتونو اوومې سرمشریزې ته په وینا کې وویل چې حکومت یې کلک اقتصادي اصلاحات پیل کړي.
هغه وویل چې دا اصلاحات دردناکه خو له اوسنیو ستونزو د وتلو لپاره اړین دي:
"کله چې تاسو اصلاحات راولی خلک کړیږي، له ستونزو سره مخ کیږي. اصلاحات د جراحۍ عملیاتو په څېر دي او کله چې دا عملیات کیږي ناروغ د یوې مودې لپاره کړیږي خو بیا وروسته بېرته ښه کیږي."
عمران خان زیاته کړه چې حکومت یې د مالي کسر د کمولو لپاره هڅه کوي.
پاکستان چې له ۱۹۸۰ کلونو راهیسې څو واره د پیسو له نړیوال صندوق یا «ای اېم.اېف» پور اخېستی پيسې یې کمې شوي او له مالي کړکېچ سره مخ دی.
اسلاماباد وروستی وار په ۲۰۱۳ میلادي کال کې د پیسو له نړیوال صندوقه شپږ میلیارده او شپږ میلیونه ډالره پور ترلاسه کړی و.
سعودي عربستان بیا د شپږو میلیارده ډالرو ژمنه ورسره کړې
عمران خان واک ته له رسېدو سره سم د سپما "صرفه جويي" یو پروګرام پیل کړی چې پهکې لوکس دولتي موټر او نور جایدادونه خرڅلاو ته وړاندې شوي دي.
خان د پاکستان له ملګرو هېوادونو هم د پور غوښتنه کړې.
متحده عربي امارات چې د پاکستان یو لوی تجارتي شریک دی پهدې وروستیو کې یې درې میلیارده ډالره پور ورکړی.
سعودي عربستان بیا د شپږو میلیارده ډالرو ژمنه ورسره کړې.
د پیسو نړیوال صندوق «ای اېم.اېف» او نړیوال بانک وړاندوینه کوي د پاکستان اقتصاد چې تېر کال پنځه اعشاریه اته فیصده پرمختګ درلود سږ کال به یې دا پرمختګ څلورو یا څلورنیمو ته راښکته شي.
صفيالله ستانکزی