امریکا ایران ته مخکې تر مخکې خبرداری ورکړ چې فضا ته د درېيو راکتونو له توغولو ډډه وکړي.
امریکا باور لري چې د ایران رژیم له بالستیکي یا لرواټنو توغندیو څخه په کار اخېستو د امنیت شورا د پرېکړهلیک سرغړونه کوي.
د امریکا د بهرنیو چارو وزیر مایک پامپیو وايي، ایران ویلي چې په راتلونکو څو میاشتو کې درې راکټونه فضا ته استوي چې د ده په وینا پهدې کې له قاره ویشتونکو بالسټیکي توغندیو کار اخېستل کېږي.
ده وویل:
"موږ د ایران رژیم ته مشوره ورکوو چې له دې ډول لمسوونکو اقداماتو لاس واخلي او د بالستیکي راکټونو اړوند ټول فعالیتونه ودروي، څو له لا زیاتې اقتصادي او سیاسي انزوا سره مخامخ نهشي."
ایراني رسنیو څه باندې یوه میاشت وړاندې د ایران د مرستیال دفاع وزیر جنرال قاسم تقيزاده په قول راپور ورکړ چې ایران غواړي په نژدې راتلونکې کې درې سپوږمکۍ فضا ته وتوغوي.
ښاغلي تقيزاده ویلي، د ایران له لوري دا جوړې شوې سپوږمکۍ په بېلابېلو مدارونو کې ځای پر ځای کېږي.
خو د امریکا د بهرنیو چارو وزیر وايي، د دې ډول راکټونو توغول د ملګروملتونو د امنیت شورا د ۲۲۳۱ نمبر پرېکړهلیک سرغړونه ده.
په دې پرېکړهلیک کې له ایرانه غوښتل شوي چې د هغو بالستیکي راکټونو له اړوندو فعالیتونو څخه ډډه وکړي چې د اټمي وسلې د لېږدولو ظرفیت لري.
امریکا د تېرکال په مې میاشت کې له ایران سره له اټمي موافقې ووته.
د امریکا د بهرنیو چارو وزیر وايي، ایران د امنیت شورا د ۲۲۳۱ پرېکړهلیک له تصویبه وروسته څو ځلي بالسټیکي توغندي توغولي دي.
د ده په وینا ایران د تېر دسمبر په لومړۍ نېټه یو منځ واټنه بالستیکي توغندۍ چې د څو سرګلولو د وړلو وړتیا لري، وازمایه.
ایران د تېر ۲۰۱۷ میلادي کال په جولای کې یو راکټ واستاوه او ویې ویل چې دا توغندۍ فضا ته سپوږمکۍ لېږلی شي.
د امریکا د بهرنیو چارو وزارت د ایران دا اقدام لمسوونکی وباله.
تردې وړاندې امریکا د ایران د راکټي پروګرام په خاطر پر دې هېواد تازه اقتصادي بندیزونه لګولي وو.
ایران وايي، فضايي پروګرام یې د سولهییزو هدفونو لپاره دی، خو لوېدیځ متخصصان ګومان کوي چې ممکن ایران د دې پروګرام په پلمه پوځي راکټونو ته انکشاف ورکړي.