د بلوڅانو ازادي بخښونکي غورځنګ تأیید کړه چې یو مشر یې په یوه برید کې وژل شوی دی.
د بلوڅانو د ازادي بخښونکي غورځنګ ویاند جیاند بلوڅ په یوې اعلامیه کې چې د چهارشنبې په ورځ «۱۳۹۷ کال د مرغومې ۰۵» خپره کړې ویلي چې د دې ډلې مشر اسلم بلوڅ او د هغه پنځه ملګري په یوه چاودنه کې چې ځای یې نهدی ښودلی، وژل شوي.
په اعلامیه کې پهدې اړه نور جزئیات نهدي ورکړل شوي.
خو افغان چارواکو ویلي چې وړمه ورځ د کندهار په عینو مېنه کې په یوې ځانوژونکې حمله کې د بلوڅانو یو کور په نښه شوی و.
د بلوڅ بېلتونپالو مشر او ملګري یې وروسته له هغې وژل کېږي چې تېره میاشت درې وسلهوالو په کراچۍ کې د چین پر قونسلګرۍ حمله کړې وه چې په نتیجه کې یې درې واړه برید کوونکي، دوه پولیس او دوه ملکیان ووژل شول.
د پاکستان سما ټلوېزیون راپور ورکړی چې اسلم بلوڅ د افغانستان په جنوبي ولایت کندهار کې چې له بلوچستان سره پوله لري، وژل شوی دی.
تر اوسه د دې برید مسؤلیت چا نهدی منلی او د پاکستان د بهرنیو چارو وزارت هم په دې اړه له څه ویلو ډډه کړې ده.
پاکستان له اوږدې مودې راهیسې خپل پخوانی سیال هند تورنوي چې په بلوچستان کې د بېلتونپالو ملاتړ کوي.
هند بیا د بلوڅو بېلتونپالو سره مرسته نهمني او پاکستان تورنوي چې په سیمه کې د اسلامپالو تُندلارو ملاتړ کوي.
بلوچستان چې ایران او افغانستان سره پوله لري، له منرالونو او طبیعي ګازو څخه بډای دی، خو بیا هم د پاکستان یو له تر ټولو بېوزلو ایالتونو ګڼل کېږي.
بېلتونپالي له څو لسیزو راهیسې د هغه پر ضد کمپاین کوي چې دوی یې د زېرمو ناسم کارول یادوي.
د بلوڅانو ازادي بخښونکی غورځنګ په تېره بیا د هغو پروژو سره مخالفت لري چې چینیې په پاکستان کې پلې کوي.
دوی وایي، د چین هر ډول اقتصادي پروژو کې د دوی له زېرمو کار اخیستل کېږي، خو بېرته د پنجاب په ګټه تمامېږي.
بلوڅان پر پاکستان تور لګوي چې بلوڅانیې د هغوی د خپلې خاورې د زېرمو څخه قصداً محرومه کړي دي.
د چین او پاکستان ترمنځ د اقتصادي دهلېز پروژه «CPEC» د چین یوې لویې اقتصادي پروژې "د یو کمربند-یوه لار" برخه ده.
دغه پروژه د چین د ولسمشر شي جین پېنګ پروژه ده چې چین به د مرکزي، جنوبي اسیا او د اروپا سره ونښلوي.
دا پروژه د ورېښمو تاریخي لار ته عصري بڼه ورکوي.
دغه لار له بلوچستانه تېرېږي.